Dt. Estere 2
2
Estere u ezwa Muoli
1 Mwamulaho, mulena ha s'a itetuluzi, a ba ni mihupulo ye miñwi ka se ne si ezizwe ki Vashiti, ni ka taelo y'a n'a tomile bakeñisa hae. 2 Cwale, baelezi ba mulena ba bañwi, ba ba ne ba li fakaufi ni yena, ba mu eleza, ba li, “Kiñi ha u sa batisisi kuli u ipumanele balyanjo ba bande? 3 Wa kona ku keta manduna mwa naha ye ñwi ni ye ñwi mwa mubuso wa hao, kuli ba tise basizana ba bande mwa ndu ya liendi za hao, hona mo mwa Shushani, munzi wa muleneñi. U ba beye mwa pabalelo ya Hegai, sikombwa ya babalela basali ba hao, mi a ba fe ze tokwahala kuli ba be ba bande. 4 Cwalehe, u ikungele ku bona musizana y'o ta lata hahulu, mi u mu eze muoli mwa sibaka sa Vashiti.”
Mulena a hupula kuli yeo n'e li kelezo ye nde, kih'a eza cwalo.
5 Cwale hona mwa muleneñi mo, mwa Shushani, ne ku pila Mujuda ya n'a bizwa Morodekai, mwan'a Jairi. N'a simuluha mwa lusika lwa Benjamine, mi n'e li muikulu wa Kishi ni Shimei. 6 #2 Male 24.10-16; 2 Lita 36.10 Mulena Nebukadenezare wa Babilona h'a y'o hapa Mulena Jekonia wa Juda mwa Jerusalema, ku mu isa kwa butanga hamoho ni sitopa sa ba ba hapilwe, ni yena Morodekai n'a li mwahal'a bona. 7 N'a na ni mwan'a malum'ahe, yena Estere, ya n'a bizwa Hadasa ka Siheberu. N'a añuzwi ki Morodekai, bashemi ba hae ha ba se ba shwile, mi a mu hulisa sina mwan'a hae luli.
Estere n'e li musizana wa sibupeho se sinde, mi a yemi hande. 8 Kwa ba cwalo, kuli mulena ha s'a file taelo ya hae ye nca, mi basizana ba bañata ba nze ba tiswa mwa Shushani, ni yena Estere a isiwa kwateñi. Ni yena a y'o beiwa mwa pabalelo ya Hegai ya n'a tokomela ndu ya bulena. 9 Hegai a katelwa Estere, mi a mu olisa. H'a si ka liyeha ku mu fa ze ne ka mu eza yo munde, ili mafula ni lico ze swanela. A mu fa sibaka se sinde mwa ndu ya liendi, mi kwa ketwa basizana ba supile mwa ndu ya bulena ku t'o mu tusa.
10 Cwale Estere n'a si ka talusa kuli ki Mujuda, kakuli Morodekai n'a mu bulelezi kuli a si ke a bulela cwalo. 11 Ka zazi ni zazi Morodekai n'a nz'a yanga ni ku kuta mwa lapa fapil'a yona ndu yeo, a bata ku ziba mw'a zuhela, ni se si ta ezahala ku yena.
12 Likalafo za ku eza basali bunde za tanda silimo mutumbi ili ku tola mafula a mira likweli ze silezi, ni mafula a nunka hande ka likweli ze silezi hape. Zeo ha li se li felile, musizana yo muñwi ni yo muñwi n'a na ni ku isiwa ku Mulena Asuerusi. 13 Musizana ha n'a zwa mwa ndu ya liendi ku ya mwa ndu ya bulena, n'a ka apala siapalo sifi ni sifi s'a n'a lata. 14 N'a ya kwateñi ka swalala, mi kakusasana n'a isiwa mwa ndu i sili, ni ku y'o beiwa mwa pabalelo ya Shaashigazi, yena mubabaleli wa liendi za mulena. Musizana ha s'a isizwe ku mulena, n'a sa kuteli kwateñi hape, konji haiba mulena n'a mu latile, mi a mu biza ka libizo la hae.
15 Nako ya Estere ya ku ya ku mulena ya fita, yena Estere, mwan'a Abihaili ili malum'ahe Morodekai, ya n'a s'a mu ngile ku mu eza mwan'a hae, yena Estere ya n'a buhiwa ki mañi ni mañi ya n'a mu bona! Nako ya hae ha i se i fita, a apala ka mw'a n'a elelelizwe ki Hegai mubabaleli wa basizana ba mulena. 16 Cwale, mwa silimo sa busupa Asuerusi a nz'a li mulena, ka kweli ya bulishumi, ili kweli ya Tebeti, Estere a tiswa ku Mulena Asuerusi mwa ndu ya bulena. 17 Mulena a mu lata hahulu ku fita mw'a n'a latezi basizana ba bañwi kaufela, mi ku fita basizana ba bañwi, Estere a latiwa ni ku tabelwa hahulu ki mulena. A mu apesa kuwani ya buoli kwa toho, mi a mu eza muoli mwa sibaka sa Vashiti. 18 Cwale mulena kiha s'a eza mukiti o mutuna wa ku kuteka Estere, mi a memela kwateñi manduna ba hae kaufela ni babusisi. A laela kuli ku be ni pumulo mwa mubuso wa hae kaufela, mi a fana limpo ka bulena.
Morodekai u pilisa mulena
19 Ka yona nako yeo, Morodekai n'a s'a filwe ki mulena situlo sa bubusisi. 20 Haili ka Estere, n'a si ka zibisa ni hanyinyani kuli n'e li Mujuda. Morokedai n'a mu bulelezi kuli mane a si ke a lika, ni hanyinyani, mi a mu utwa sina mw'a n'a mu utwelanga ha n'a sa li mwanana.
21 Ka nako yeo Morodekai ha n'a s'a li mubusisi mwa ndu ya bulena, Bigitani ni Tereshi, ili likombwa ze peli za linumbulwa ba ba ne ba libelela minyako ye kena mwa mandu a mulena, ba fetuhela Mulena Asuerusi, mi ba lela ku mu bulaya. 22 Morodekai a ziba taba yeo, mi a y'o bulelela Muoli Estere. Estere yena kiha s'a y'o bulelela mulena ka z'a n'a utwile Morodekai. 23 Kwa ba ni patisiso, mi kwa fumanwa kuli piho yeo i n'e li ya niti. Cwale batu bao ba babeli ba y'o silahiwa, mi ba shwa cwalo. Mulena a laela kuli taba ye i ñolwe mwa libuka za mubuso wa hae.
Lozi Interconfessional Bible, Catholic Edition © Bible Society of Zambia, 2009.