Baefese 4

Buñwi bwa mubili

1Na mi kupa cwale, na ya li mwa tolongo kabakala ku sebeleza Mulena. Mu pile bupilo bo bu swanela seo Mulimu n'a si bata ku mina, muta a mi biza. 2#Bakol 3.12-13 Mu ishuwe, mi mu be ni musa ni pilu-telele kamita. Mu swalelane ka lilato. 3Mu eze mo mu konela kaufela ku buluka buñwi bo bu fiwa ki Moya, ka kozo ye mi kopanyize hamoho. 4Ku na ni mubili u li muñwi, ni Moya u li muñwi feela, sina ha ku na ni sepo i liñwi feela ye mu bizelizwe ki Mulimu. 5Ku na ni Mulena a li muñwi, ni tumelo i liñwi ni kolobezo i liñwi feela. 6Ku na ni Mulimu a li muñwi feela, ili Ndat'a batu kaufela, ya ba busa kamukana, ya sebeza ku bona kaufela, mi ya ina ku bona kamukana.

7Yo muñwi ni yo muñwi wa luna u filwe mpo ka ku likanya ni s'a mu file Kreste. 8#Lipi 68.18 Sina mo ku ñolezwi kuli,

“H'a ile kwa lihalimu,

u ile ni ba bañata ba ba ne ba hapilwe,

mi u file batu limpo.”

9Cwale, taluso ya kuli “u ile kwa lihalimu” ki ifi? Kikuli pili u shetumukezi mwa lifasi. 10Ya shetumukile, yo, i sa li yena ya ile kwa lihalimu, kuli a be teñi kai ni kai mwa libaka kamukana. 11Ki yena ya “file batu limpo.” A keta ba bañwi ku ba baapositola, ba bañwi ku ba bapolofita, ba bañwi ku ba babuleli, ba bañwi ku ba baluti ba linzwi ni bakutazi cwalo. 12Musebezi wa bona i ne li ku luta batu ba Mulimu kaufela musebezi wa bulumeli, wa ku yaha mubili wa Kreste. 13Kamukwaocwalo, luna kaufela kwa mafelelezo, lu ta ba nto i liñwi ka tumelo ya luna ni ka ku ziba Mwan'a Mulimu. Lu ta ba batu ba ba lukile kwa maneku kaufela, ba ba likana ni Kreste. 14Ha lu sa na ku ba banana ba ba ngiwa ki mandinda, mi ba ba fefulwa ki moya o fulana wa lituto za bapumi, ba ba kenya ba bañwi mwa lifoso ka makilikicani a ba eza. 15Batili! Mane, ka ku latelela niti feela, lu nze lu zamaiswa ki moya wa lilato, lu swanezi ku hula mwa linto kamukana, ni ku fetuha nto i liñwi ni Kreste, yena toho. 16#Bakol 2.19 Ka yena, lilama za mubili ze fapahani za kopana hamoho, mi mubili kaufela u ngungahanywa ki malukululelo a lilama. Cwale, silama ni silama ha si sebeza ka swanelo, ni mubili u icaha ili ona, mi wa hula ka lilato.

Bupilo bo bunca ku Kreste

17Cwale, se ni bulela ni ku si tiisa ka libizo la Mulena ki se. Mu si ke mwa pila hape sina bahedeni ba ba latelela mihupulo ya bona ye si na tuso. 18Bao, minahano ya bona i li mwa lififi. Ha ba na kabelo mwa bupilo bw'a fana Mulimu, kakuli ha ku na ze ba ziba. Ki mangulunde feela. 19Ha ba sa na maswabi. Ba ikenyize mwa buhule, mi ba eza likezo ze maswe za mifuta-futa ba sa zibi ku iswala.

20Seo, ha si sona se mu itutile bakeñisa Kreste! 21Mu utwile za hae, kwa utwahala, mi ha mu li balateleli ba hae, mu lutilwe niti ye li ku Jesu. 22#Bakol 3.9 Cwalehe, mu swanezi ku tuhela mikwa ya mina ya kale, ye ne mu pila ka yona, mikwa ye shandauzi butu ka litakazo za bupumi. 23Lipilu za mina ni minahano ya mina li swanezi ku bupiwa sinca. 24#Sim 1.26; Bakol 3.10; But 9.3 Mu apale butu bo bunca, bo bu bupiwa ka ku swana ni Mulimu, bo bu iponahaza ka bupilo bo bu lukile, bo bu kenile, bo bu tomilwe fa niti.

25 # Zak 8.16 Cwale buhata bu fele! Yo muñwi ni yo muñwi a bulelele wa habo niti, kakuli kaufel'a luna lu lilama za mubili u li muñwi. 26#Lipi 4.4 Haiba mwa halifa, mu tokomele kuli ku halifa kwa mina ku si ke kwa mi isa mwa sibi. Mu si ke mwa tanda lizazi kaufela mu nze mu halifile.

27Mu si ke mwa fa Satani sibaka. 28Ya n'a uzwa, a tuhele ku uzwa. A kale ku sebeza, mi a ipumanele ka mukwa o munde se si ka mu pilisa, mane a kone ni ku tusa babotana. 29Mu si ke mwa itusisa manzwi a maswe ha mu bulela. Mu sebelise feela manzwi a' na ni tuso, a' ka kona ku tusa ba bañwi ku zwelapili mwa tumelo, ili manzwi a' tiisa ze bulelwa ni a' zusa maikuto a mande ku bona ba ba mi teeleza. 30Mu si ke mwa swabisa Moya o Kenile wa Mulimu, kakuli Moya ki sisupo sa Mulimu se si bonisa kuli mu ba hae, sisupo se si tiisa kuli lizazi la ta, leo Mulimu u ta mi lukulula ka lona. 31Mu tuhele ze baba kaufela, bunyemi ni ku halifa. Mu ambuke likomano, matapa ni lutimbo lwa mufuta ufi kamba ufi. 32#Bakol 3.13 Mu be ni musa, mu utwelane butuku, mi mu swalelane sina Mulimu ni yena h'a mi swalezi ka Kreste.

Currently Selected:

Baefese 4: Lozi09

Highlight

Copy

Compare