Daniele 3
3
Nebukadenezare u laela mañi ni mañi ku lapela siswaniso sa gauda
1Mulena Nebukadenezare n'a ezize siswaniso sa gauda, ili mapeka a mashumi a malalu kwa ku ya mwahalimu ni a malalu mwa butuna, mi a si toma mwa libala la Dura mwa naha ya Babilona. 2Mulena a laela manduna ba hae kamukana kuli ba kopane, ili bana ba malena, babusisi, bazamaisi ba limpi, ba mitelo, babuluki ba mali, baatuli ba bahulu ni ba banyinyani ni manduna kaufela ba mwa naha. Ne ba memilwe kwa mukiti wa ku tomiwa kwa siswaniso s'a n'a ezize Mulena Nebukadenezare. 3Cwale manduna bao kaufela ba t'o kopanela kakulo ya siswaniso mi ba yema fapil'a sona. 4Muhuwelezi a huweleza ka linzwi le lituna, a li, “Batu ba macaba kamukana, ba mishobo, ni lipuo! 5Mu ta utwa mulumo wa litolombita, u latelelwa ki wa balizi ba lipala, ni tuñombyo, ni lihalepa, mi cwale ze lizwa kamukana li ta latelelana. Hona fo lipina li sa kala feela ku lizwa, mu lukela ku inama ni ku ipeya kwatas'a siswaniso sa gauda s'a tomile Mulena Nebukadenezare. 6Mañi ni mañi ya sa inami ni ku ipeya kwatas'a sona u ta nepelwa i sa li hona fo mwa liyonga le li tuka.” 7Mi cwale, ba sa utwa feela mulumo wa lipina, batu ba macaba a mañata, ba mishobo, ni ba lipuo ba inama mi ba ipeya kwatas'a siswaniso sa gauda s'a n'a tomile Mulena Nebukadenezare.
Majuda ba balalu ba zekiswa
8Cwale Mababilona ba bañwi ba fumanela fateñi sibaka sa ku y'o biha Majuda. 9Ba y'o li ku Mulena Nebukadenezare, “Muñ'a ka, u pile kuya kuile. 10Wena muñ'a ka u zwisize taelo kuli mu sa utwa feela lipina li lizwa, mutu kaufela u swanezi ku inama ni ku ipeya kwatas'a siswaniso sa gauda. 11Mi mañi ni mañi ya sa inami ni ku ipeya kwatas'a sona u ta nepelwa mwa liyonga le li tuka. 12Ku na ni Majuda ba bañwi b'o beile ku talima za naha ya Babilona ili bo Shadrake, Meshaki ni Abedi-Nego. Batu bao, muñ'a ka, ba tula litaelo za hao. Ha ba lati ku ipeya kwatas'a mulimu wa hao, kamba ku kubamela siswaniso s'o tomile.”
13Ka piho yeo, mulena a halifa hahulu mi a laela kuli batu bao ba balalu ba tiswe ku yena. 14A li ku bona, “Shadrake, Meshaki ni wena Abedi-Nego, kikuli ki niti luli kuli mwa hana ku ipeya kwatas'a mulimu wa ka ni ku kubamela siswaniso sa gauda se ni tomile, naa? 15Cwalehe, mu sa utwa feela mulumo wa litolombita, wa lipala, tuñombyo, lihalepa ni ze lizwa kamukana, mu kubame mi mu ipeye kwatas'a siswaniso. Mi ha mu sa ezi cwalo, mu ta nepelwa kapili mwa liyonga le li tuka. Kana mu hupula kuli ku na ni mulimu o muñwi o ka mi tusa, naa?”
16Shadrake, Meshaki ni Abedi-Nego ba alaba, ba li, “Muñ'a ka, ha lu na ku lika ku ikalabela ili luna. 17Haiba Mulimu wa luna ye lu sebeleza wa kona ku lu pilisa kwa liyonga le li tuka, ni kwa maata a hao, cwale u ta eza cwalo, muñ'a ka. 18Kono nih'a sa ezi cwalo, muñ'a ka a be ni niti ye tezi kuli ha lu na ku ipeya kwatas'a mulimu wa hao, mi ha lu na ku kubamela siswaniso sa gauda s'o tomile.”
Majuda ba nepelwa mwa liyonga
19Cwale Nebukadenezare a tokwa buiswalo, pata ya hae ya fubela kabakala ku halifela bo Shadrake, Meshaki ni Abedi-Nego. A laela batu ba hae ku tumbula liyonga ka ku fitisisa, ku fita mo li cisezanga kamita. 20Kiha s'a laela banna ba ba na ni maata hahulu mwa mpi ya hae ku tama banna bao ba balalu ni ku ba nepela mwa liyonga le li tuka. 21Cwale ba ba tama, ba ikapalezi hande lihembe ni mikanjo ya bona ni likuwani ni ze ñwi cwalo, mi ba nepelwa mwa liyonga le li tuka. 22Kakuli taelo ya mulena n'e li tata, mi liyonga ne li cisize hahulu, malimi a mulilo a cisa batu ba ba ne ba ba lwezi ku t'o ba nepela mwa liyonga. 23#Dt. Dan 3.1-68 Cwale bo Shadrake, Meshaki ni Abedi-Nego ba wela mwahal'a mulilo o tuka ba nze ba tamilwe.
24Cwale Nebukadenezare a felela mwahalimu, a yema ka mahutu a komokile hahulu. Kih'a buza baelezi ba hae, a li, “Kikuli ne lu si ka tama batu ba balalu ni ku ba nepela mwa mulilo, nji?”
Ba alaba, ba li, “Ku cwalo, muñ'a ka.”
25Mulena a li, “Kikabakalañi ha ni bona batu ba bane ba nze ba pota-pota mwa mulilo? Ha ba si ka tamiwa, mi ha ba bonisi kuli ba utwa butuku, mi wa bune u swana ni mulimu.”
Majuda ba lukululwa mi ba huliswa
26Cwale Nebukadenezare a ya kwa makenelo a liyonga mi a biza, a li, “Shadrake! Meshaki! Abedi-Nego! Batanga ba Mulimu ya Pahami! A mu zwe mwateñi!” Mi ba zwa kapili. 27Bana ba malena kaufela, babusisi, bazamaisi ba limpi ni baelezi ba mulena ba kopana hamoho ku t'o talima batu bao, ba ba si ka cisiwa ki mulilo. Milili ya bona n'e si ka babuha, liapalo za bona ne li si ka ca, mane ni bona kasibili ne ba sa nunki musi.
28Mulena a li, “Mu lumbe Mulimu wa Shadrake, Meshaki ni Abedi-Nego. U lumile lingeloi la hae mi li til'o pilisa batu ba, ba ba mu sebeleza ni ku mu sepa. Ba hanyelize litaelo za ka mi ba itombozi bupilo bwa bona ku fita kuli ba kubamele ni ku ipeya kwatas'a mulimu ufi kamba ufi, konji Mulimu wa bona feela.
29“Mi cwale, ni laela kuli mutu ufi ni ufi, wa sicaba sifi, ni wa mushobo ufi kamba ufi, ya ka bulela ka kashwau ku Mulimu wa Shadrake, Meshaki ni Abedi-Nego, u ta pumakiwa lisuma-suma ni ndu ya hae i ta ba litota, kakuli ha ku na mulimu o muñwi o ka kona ku pilisa sina yena yo.”
30Mi cwale mulena a yolisa Shadrake, Meshaki ni Abedi-Nego litulo ze pahami mwa naha ya Babilona.
Lozi Interconfessional Bible, Catholic Edition © Bible Society of Zambia, 2009.