2 Batesalonika 1
1
Litumeliso
1 #
Lik 17.1
Liñolo le, li zwa ku Paulusi, ni Silvano ni Timotea. Li ñolelwa ba keleke ya Tesalonika, bao ili batu ba Mulimu Ndat'a luna, ni ba Mulena Jesu Kreste.
2Sishemo ni kozo li be ni mina ka libizo la Mulimu Ndate ni Mulena Jesu Kreste.
Katulo, Kreste h'a ka taha
3Lu swanezi ku itumela ku Mulimu nako kaufela kabakala mina, banabahesu! Kwa swanela kuli lu eze cwalo, kakuli tumelo ya mina i hula hahulu, mi lilato le mu latana ka lona li ya li nze li ekezeha. 4Ki lona libaka ha lu itumba ka mina mwa likeleke za Mulimu. Lu itumba ka mukwa o mu tiiseza ni ku lumela ka ona, mwa manyando ni mwa liñalelwa kaufela ze mu li ku zona.
5Bo ki bupaki bwa katulo ye lukile ya Mulimu, kakuli se mu nyandela kaufela ki tukelo ya ku amuhelwa mwa Mubuso wa hae. 6Mulimu u ta eza se si lukile h'a ka kutiseza manyando ku ba ba mi nyandisa. 7U ka mi pumulisa, mina ba ba nyanda, mi u ka lu pumulisa ni luna cwalo. U ka eza cwalo, Mulena Jesu h'a ka zwa kwa lihalimu ni mangeloi a hae a mañata. 8Mulilo u ta tuka, mi Mulena u ta bakisa ba ba sa zibi Mulimu ni bao ba ba sa tokomeli Litaba ze Nde za Mulena Jesu. 9#Isa 2.10 Ba ta utwiswa butuku ka palali ye sa feli, ba li kwahule ni pata ya Mulena, kwahule ni maata a bulena bwa hae. 10Ba ta utwiswa butuku h'a ka taha, ka Lizazi leo, ku t'o lumbiwa ki balumeli kamukana. Ni mina mu ka ba ba bañwi ba ku bona, kakuli mu lumezi litaba ze lu mi bulelezi.
11Ki lona libaka ha lu nze lu mi lapelelanga kamita. Lu kupa Mulimu wa luna kuli a mi eze ba ba swanelwa ki bupilo bw'a mi bizelize. Lu kupa kuli, ka maata a hae, a taleleze takazo ya mina ya ku eza hande, mi a kondise misebezi ya tumelo ya mina. 12Kamukwaocwalo, libizo la Mulen'a luna Jesu li ka kutekiwa ka mina, mi ni mina mu ta kutekiwa ka yena, ka sishemo sa Mulimu wa luna ni sa Mulena Jesu Kreste.
Lozi Interconfessional Bible, Catholic Edition © Bible Society of Zambia, 2009.