2 Samuele 7
7
Manzwi a Natani ku Davida
(1 Lita 17.1-15)
1Mulena Davida n'a s'a sweli hande puso ya naha ya hae, mi Muñ'a Bupilo n'a mu sileleza kwa lila za hae kaufela. 2Zazi le liñwi, mulena a li ku mupolofita Natani, “Bona! Na, ni pila mwa ndu ye yahilwe ka likota za sidare, kono Likwati la Bulikani bwa Mulimu li inzi mwa tende!”
3Natani a li, “Eza s'o bata ku si eza kamukana, kakuli Muñ'a Bupilo u na ni wena.” 4Kono bona busihu bo Muñ'a Bupilo a li ku Natani: 5“Zamaya, u y'o bulelela mutang'a ka Davida, u li, ‘Ha si wena ya ka ni yahela tempele mo ni ka ina. 6Ku zwa nako ye ni zwisize sicaba sa Isilaele mwa Egepita ku fitela la kacenu le, ha ni si ka pila mwa tempele. Ni zamaile ni nze ni potoloha ni pila mwa tende. 7Mwa misipili ya ka kamukana ye ni zamaile ni batu ba Isilaele, ha ni si ka buza bazamaisi be ne ni ketile, kuli kiñi ha ba si ka ni yahela tempele ya likota za sidare.’
8“Cwale u y'o bulelela mutang'a ka Davida kuli, na, Muñ'a Bupilo ya Maata Kaufela ni li ku yena, ‘Ni ku zwisize kwa ku lisa lingu mwa naheñi ku t'o ba mubusi wa ka wa sicaba sa ka sa Isilaele. 9Ne ni li ni wena k'o n'o ya kamukana, mi ni tuzi lila za hao kaufela. Ni ta ku hulisa, u be yo mutuna sina bazamaisi ba batuna hahulu mwa lifasi. 10Ni ta ketela batu ba ka ba Isilaele sibaka, ba y'o pila mwateñi, ku si na se si ka ba kataza hape. Kakuli ba li ku fitela mwa naha mo, ne ba lwaniswa ki batu ba balwani, kono zeo ha li sa tola li ezahala hape. 11Batu ba balwani ba mi hatelezi haisamba ni ketela baeteleli ba batu ba ka Maisilaele. Ni ku sepisa kuli ni ta ku sileleza hape. Ni ku sepisa kuli ni ta ku sileleza kwa lila za hao kaufela, ni ku ku fa lusika. 12#Lipi 89.3-4; 132.11; Joa 7.42; Lik 2.30 Ha u shwa, mi u pumbekiwa ni bo kukw'a hao, ni ta eza yo muñwi wa baikulu ba hao mulena, mi ni ta tiisa mubuso wa hae. 13U ta ni yahela tempele, mi ni ta bona kuli baikulu ba hae ba buse kuya kuile. 14#Lipi 89.26-27; 2 Bakor 6.18; Maheb 1.5 Ni ta ba ndat'ahe, mi yena a be mwan'a ka. H'a ka fosa, ni ta mu kalimela sina mushemi h'a kalimela mwan'a hae. 15Kono ha ni na ku lisela ku swalisana ni yena sina mo ne ni ezelize ku Saule, ye ni zwisize kuli wena u be mulena. 16#Lipi 89.36-37 Lusika lwa hao lu ta busa sicaba sa ka kuya kuile. Bulena bwa hao ha bu na ku fela.’ ”
17Natani a bulelela Davida litaba kamukana z'a n'a sinulezwi ki Mulimu.
Tapelo ya Davida ya buitumelo
(1 Lita 17.16-27)
18Mulena Davida a ya mwa Tende ye Kenile ya Muñ'a Bupilo, a ina fafasi mi a lapela, a li, “Muñ'a Bupilo ya Pahami, z'o ni ezelize kaufela ha li ni swaneli, mi ha li swaneli ni lona lubasi lwa ka. 19Nihakulicwalo u sa ekeza kwa sishemo sa hao ni ka nako ye, Mulena Mulimu. U sepisize lituso za hao kwa baikulu ba ka mwa lilimo ze taha. Mi Mulena Mulimu, zeo li ta bonwa ki mutu! 20Se ni ka bulela hape ku wena ki sifi! Wa ni ziba, na mutang'a hao. 21I n'e li tato ni mulelo wa hao wa ku eza cwalo, mane u ni zibisize lika ze tuna kaufela. 22Mulena Mulimu, u yo mutuna hahulu! H'a yo ya swana ni wena. Ha ku na yo muñwi hape haisi wena, sina mo lu utwezi luna kasibili. 23#Mul 4.34 Ha ku na sicaba se siñwi fafasi se si swana ni sicaba sa hao sa Isilaele, s'o pilisize kuli si be sicaba sa hao. U itumisize ili wena ka ku ezeza ba sicaba seo ze tuna ni ze komokisa. U lelekisize macaba ni milimu ya ona fapil'a bona batu b'o n'o lukuluzi mwa Egepita kuli ba be ba hao. 24U ketile sicaba sa Isilaele ku ba batu ba hao kuya kuile, ni wena, Muñ'a Bupilo, wa ba Mulimu wa bona.
25“Mi cwale, Muñ'a Bupilo, tiisa sepiso y'o ni sepisize na, ni lubasi lwa ka, mi u eze mo n'o bulelezi kuli u ta eza. 26Libizo la hao li ka tuma kuya kuile, mi batu ba ta li, ‘Muñ'a Bupilo ya Maata Kaufela ki Mulimu wa Isilaele.’ Mi u ta tiisa sepiso ya hao ya kuli mwa lusika lwa ka ku ta na ku ketwa malena nako kaufela. 27Muñ'a Bupilo ya Maata Kaufela, Mulimu wa Isilaele! Ni na ni bundume bwa ku fitisa tapelo ye ku wena kakuli u ni zibisize zeo, mi u ni bulelezi kuli mwa lubasi lwa ka ki mona mo ku ta ketwanga malena.
28“Mi cwale, Muñ'a Bupilo, wena u Mulimu. Ka linako kaufela u buluka lisepiso za hao, mi cwale u ezize sepiso ye, ye komokisa ku na. 29Cwale Muñ'a ka, u fuyaule lubasi lwa ka kuli lu zwelepili, mi lu pile hande ka sishemo sa hao. Wena, Mulena Mulimu, ki wena ya sepisize cwalo, ni limbuyoti za hao li be kwa lubasi lwa ka kuya kuile.”
Lozi Interconfessional Bible, Catholic Edition © Bible Society of Zambia, 2009.