Buka ya Bubeli ya Makabaeusi 4
4
Lifoso za Simoni, muzamaisi wa Tempele
1Cwale Simoni yani, y'a s'a talusizwe ka za hae, ya kile a y'o biha za mali a mwa Tempele ni ku lwanisa naha ya habo, a tameleza Oniasi taba ya kuli ne li yena muprisita yo muhulu ya n'a lwanisize Heliodorusi ni ku mu tahiseza likozi ze, ze sabisa. 2Cwale Simoni a kala ku toya Oniasi, mutu ya lukile cwalo, mutusi yo mutuna wa muleneñi, musilelezi wa batu ba habo, mutu ya bulukile Mulao hakalo kuli kuti ki sila sa buiketo bwa batu. 3Cwale sitoyo se si cwalo sa hula maswe hahulu kuli mane lipulao ne li eziwa ki ba bañwi ba ba ne ba lumiwanga ki Simoni. 4Kamukwaocwalo Oniasi n'a zibile mo ne bu inezi bumaswe bwa ku pihisana kwa bona ko, ni kuli Apoloniusi mwan'a Menesteusi, yo muhulu wa masole ba Coele-Siria ni Fenisia, n'a susueza Simoni ku zwelapili mwa likezo za hae za lunya. 5A ya ku mulena, isiñi ku y'o biha bana ba naha ya habo, kono ili ka muhupulo wa ku tusa batu kaufela ka mikwa ye miñata. 6A bona kuli kwand'a ku zibisa mulena, ha ku na kozo ye ta ba teñi, kamba ku kona ku hanisa Simoni ku eza mukwa wa hae o maswe wa butoto.
Muprisita yo muhulu Jasoni u kalisa Tuto ya Sigerike
7 #
1 Mak 1.10
Selukusi ha s'a shwile, mi a yolilwe ki Antiokusi ya n'a bizwa Epifanesi, Jasoni mwanahabo Oniasi, n'a ikungezi situlo sa ku ba muprisita yo muhulu ka bupumi. 8A ya ku mulena, mi a mu sepisa kuli u ta mu fa mali a eza litalenta ze mianda ye milalu ka mashumi a silezi a silivela, ni mali a litalenta ze mashumi a supile ka li li liñwi a ta zwa kwa mutelo. 9Hape a itama kuli u ta fa mulena mali a mañwi a eza litalenta ze mwanda ka mashumi a ketalizoho, haiba n'a ka lumelelwa ku itusisa maata a hae kuli a tome sibaka sa lipapali, ni ku ba ni mitangana kwateñi, hamoho ni ku ñola batu ba Jerusalema kuli ba be ba Antiokusi.
10Mulena ha s'a mu lumelezi, Jasoni a kalisa muhupulo wa hae, mi a kenya Majuda mwa mikwa ya Sigerike. 11#1 Mak 8.17 A zwisa litukelo za silena kwa Majuda ze ne tisizwe ki Joani, ndat'ahe Eupolemusi ya n'a kile a lumwa ku y'o ba yemela ni ku y'o eza tumelelano ya silikani ni Baroma. Hape a zwisa mikwa ye minde ye ne lumelelana ni Mulao, mi a beya ye maswe. 12A beya sibaka sa lipapali kwatukw'a ona Munzi wa Davida mi a eza kuli mane micaha ye lukile hahulu ba apale likuwani ze bonisa bulateleli bwa Sigerike. 13Kabakala bumaswe bwa ku hana Mulimu kwa hae, ni ku tokwa niti ye swanela muprisita yo muhulu, Jasoni a zwelapili ku eza maswe hahulu. Kaniti tuto yeo ya Sigerike ya zwelapili hahulu. 14Baprisita ba tuhela ku bonisa takazo ya ku eza lisebelezo za katala. Ba nyefula Tempele, mi ba tokwa ku tokomela litabelo. Ba akufelanga kapili kwa sibaka sa libapalelo ha ba utwa pizo ya mukopano. 15Ba nyaziseza ze ne li kutekwa ki bo bukw'a bona kaufela mi ba lakaza hahulu mipuzo ya Sigerike. 16Kabakala cwalo, ba tahelwa ki kozi ye tuna mi batu bao, ba mikwa ye ne ba lakaza ku latelela ni ku ba likanyisa, ba ba fetuhela ni ku ba lila ni babulai ba bona. 17Ha si nto ye nyinyani ku lwanisa milao ya Mulimu, sina nako ye tatama ha i ta bonisa niti yeo.
18Ka nako ya lipapali ze ne li ezwanga mwamulaho wa lilimo ze ketalizoho kwa Tire mulena n'a nz'a li teñi. 19Yena litanya yo Jasoni a lumela batu ba bañwi ba ba latelela Sigerike ku y'o yemela Jerusalema. Bao ba lwala mali a silivela a eza lidirakima ze mianda ye milalu a sitabelo sa Herkulusi. Kono nihaili bona ba ba ne ba tisize mali ao ba hupula kuli ne i ta ba hande ku sa itusisa ona kwa sitabelo, mi ba hupula kuli a te a itusizwe kwa misebezi i sili. 20Cwale s'a n'a hupuzi yena ya n'a ba lumile ku ezeza Herkulusi sitabelo, sa itusiswa ka muhupulo wa ba ba ne ba si tisize, ili ku ezisa lisepe za ndwa.
Antiokusi u amuhelwa ka likute mwa Jerusalema
21Apoloniusi, mwan'a Menesteusi, n'a lumezwi kwa Egepita kwa coliso ya Mulena Filometa. Antiokusi, ka ku lemuha kuli mulena Filometa n'e se li sila sa mikwa ya hae, a kala ku hupula mw'a n'a ka pilela. Cwale a zwa mwa Jopa mi a ya kwa Jerusalema. 22A amuhelwa hande hahulu ki Jasoni ni ba muleneñi cwale, ili ka mamonyi ni miluluezo. Ku zwa fo, a zwisa mpi ya hae kwa Fenisia.
Menelausi u ba muprisita yo muhulu
23Ha se ku fitile lilimo ze talu, Jasoni a luma Menelausi, mwanahabo Simoni ya s'a talusizwe pili, ku isa mali ku mulena ni ku amuhela litaelo za hae ka za lika ze ñwi za butokwa. 24Kono yena h'a y'o fita ku mulena a ipumanela situlo sa ku ba muprisita yo muhulu ka ku hulisa butumo bwa mulena, ni ka ku sepisa ku mu fa litalenta ze mianda ye milalu ku fita Jasoni. 25Kasamulaho a ku amuhela litaelo za mulena a kuta, kono n'a sa swaneli ni hanyinyani ku ba muprisita yo muhulu kakuli n'a na ni bunyemi bo butuna ni buhali bo bu swana ni bwa sibatana. 26Cwalehe Jasoni, ya n'a tuluzi mwanahabo, a tululwa cwalo ki yo muñwi wa bulalu, mi a sabela mwa naha ya Maamoni. 27Haili ka za Menelausi, yena a ina cwalo mwa situlo sa hae ili muprisita yo muhulu. Kono n'a sa zwisangi ka swanelo mali a n'a sepisize mulena. 28N'a sa lifangi nihaike Sositratusi, mulaeli wa mpi ya mwa Lukwakwa lwa Jerusalema, n'a nz'a mu buzanga hañata, kakuli musebezi wa ku amuhela mali a mulena n'e li wa hae. Kabakaleo sibeli sa bona ba biziwa ki mulena. 29Yena Menelausi a siya mwanahabo Lisimakusi mwa sibaka sa hae ku ba muprisita yo muhulu. Ni yena Sositratusi a siya Kratesi mulaeli wa Masipera ku mu swalela sibaka.
Pulao ya Oniasi
30Linto ze kamukana ha ne li nze li ezahala cwalo, batu ba mwa Tarese ni mwa Malusi ba fetuha kakuli minzi ya bona ne i filwe Antiokisi, siendi sa mulena. 31Kabakaleo mulena a akufela ku ya kwateñi ku y'o atula taba yeo, mi mwa sibaka sa hae a siya Andronikusi, yo muñwi wa batu ba hae ba ba sepahala, ku ba yena ya mu bakwela. 32Cwale Menelausi, ka ku hupula kuli u fumanezi fateñi sibaka, a uzwa linkwana ze ñwi za gauda za mwa Tempele, a li fa Andronikusi mi a lekisa ze ñwi kwa Tire ni kwa mileneñi ye ne bapani ni ona. 33Oniasi ha s'a fumani bupaki hande, a ya kwa sibaka sa sisabelo kwa Dafine fakaufi ni Antioke mi a y'o mu nyaza ka kezo yeo. 34#Dan 9.26 Kabakaleo Menelausi a ya ku Andronikusi kwa mukunda mi a y'o mu susueza kuli a bulaye Oniasi. Andronikusi a bata Oniasi mi ka bupumi a mu kolwisa ka ku konka, mane a mu susueza kuli a zwe mwa sibaka sa sisabelo, mi kapili-pili a mu bulaya ku si na libaka. 35Ka lona libaka le batu kamukana, isiñi Majuda feela kono ni ba bañwi ba macaba a mañwi, ba utwa butuku ni ku nyema hahulu bakeñisa pulao ye maswe cwalo yeo.
36Mulena h'a kutile ku zwa kwa Silisia, Majuda ba mwa muleneñi, ni Magerike ba ba ne ba utwa butuku bakeñisa mulatu wo, ba t'o bilaela ku yena ka za pulao ya bukuba ya Oniasi. 37Antiokusi a utwa butuku mi a swaba hahulu mane a lila bakeñisa lifu la Oniasi, mutu ya butali ya n'a lukile hahulu. 38Cwale ka ku nyema hahulu a zwisa liapalo za bulena za Andronikusi. A pazaula ni liapalo za hae ze ñwi cwalo, a mu zamaisa mwahal'a muleneñi ku mu isa hona kwa sibaka ko kw'a n'a bulaezi Oniasi, mi a y'o mu bulaela kwateñi. Ka mukwa wo, Mulimu u mu kutiselize se ne si mu lukela.
Lisimakusi u bulaiwa mwa petuhelo
39Cwale Lisimakusi n'a s'a uzwize linto ze ñata za mwa Tempele mwa muleneñi bakeñisa bumaswe bwa Menelausi. Litaba zeo ha li se li utwahalile ni ku zibahala hande mwa libaka kamukana, batu kaufela ba kopana mi ba fetuhela Lisimakusi ya n'a s'a lekisize linto ze ñata za gauda za mwa Tempele. 40Mi kabakala kuli batu ba bañata cwalo ba ne ba se ba nyemile hahulu, Lisimakusi a fa batu ba ba bata ku fita fa likiti ze talu lilwaniso, mi a kala ku lwana. Mpi ya hae ya zamaiswa ki Auranusi, munna-muhulu ya n'a s'a hulile, wa sikuba. 41Cwale batu ha ba se ba lemuha kuli kezo ye maswe cwalo i eziwa ki Lisimakusi, ba bañwi ba nopa macwe, ba bañwi milamu. Ba bañwi ba ñwatanga feela mulola. Kaufel'a bona ba kena ku titika batu ba Lisimakusi. 42Ba holofaza hahulu ba bañata, ni ku bulaya ba bañwi ba ba likana ku bona. Ba ba tula mi ba mata kaufela. Ha n'e li yena lisholi luli kasibili, ya n'a uzwanga libyana za mwa Tempele, ili yena Lisimakusi, ba mu bulaela kwatukw'a sibulukelo ya bufumu.
Menelausi u leka mulena kweta
43Kabakala kezo ye, Menelausi a zekiswa. 44Mulena h'a taha kwa Tire, banna ba balalu ba ba ne ba lumilwe ki ba bahulu ba fitisa taba yeo ku yena. 45Cwale Menelausi ha s'a boni kuli u tuzwi, a sepisa Pitolemi mwan'a Dorimenesi kuli u ta mu fa mali a mañata hahulu, haiba n'a ka kona ku susueza mulena kuli a mu yemele. 46Cwale Pitolemi a isa mulena kwande ku y'o fukelwa ki moya, mi a mu susueza ku fetula muhupulo wa hae. 47Mulena a felisa mulatu wa Menelausi, yena mutisi wa bumaswe bo kaufela, mi a atulela lifu batu ba babotana ba ba ne ba si na mulatu, ili ba ba ne ba ka be ba lukuluzwi haiba ne ba ka fitisa taba ya bona nihaiba kwa Masitia. 48Ha ku si ka fita nako ye telele, kiha ku bulawa bona bani ba ba ne ba utwela butuku muleneñi wa bona, bañi ba naha, ni bufumu bwa Tempele. 49Mane ni ba bañwi ba Tire ba bonisa ku sa lata kwa bona mulatu ka ku ba ezeza kepelo ye komokisa hahulu ye bonisa ku tokwa mulatu kwa bona. 50Kono kabakala muna wa ba ba ne ba li mwa litulo ze pahami Menelausi a zwelapili mwa situlo sa buhulu. A zwelapili mwa bumaswe ni ku ikeza sila se situna sa banabahabo.
Currently Selected:
Buka ya Bubeli ya Makabaeusi 4: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
Buka ya Bubeli ya Makabaeusi 4
4
Lifoso za Simoni, muzamaisi wa Tempele
1Cwale Simoni yani, y'a s'a talusizwe ka za hae, ya kile a y'o biha za mali a mwa Tempele ni ku lwanisa naha ya habo, a tameleza Oniasi taba ya kuli ne li yena muprisita yo muhulu ya n'a lwanisize Heliodorusi ni ku mu tahiseza likozi ze, ze sabisa. 2Cwale Simoni a kala ku toya Oniasi, mutu ya lukile cwalo, mutusi yo mutuna wa muleneñi, musilelezi wa batu ba habo, mutu ya bulukile Mulao hakalo kuli kuti ki sila sa buiketo bwa batu. 3Cwale sitoyo se si cwalo sa hula maswe hahulu kuli mane lipulao ne li eziwa ki ba bañwi ba ba ne ba lumiwanga ki Simoni. 4Kamukwaocwalo Oniasi n'a zibile mo ne bu inezi bumaswe bwa ku pihisana kwa bona ko, ni kuli Apoloniusi mwan'a Menesteusi, yo muhulu wa masole ba Coele-Siria ni Fenisia, n'a susueza Simoni ku zwelapili mwa likezo za hae za lunya. 5A ya ku mulena, isiñi ku y'o biha bana ba naha ya habo, kono ili ka muhupulo wa ku tusa batu kaufela ka mikwa ye miñata. 6A bona kuli kwand'a ku zibisa mulena, ha ku na kozo ye ta ba teñi, kamba ku kona ku hanisa Simoni ku eza mukwa wa hae o maswe wa butoto.
Muprisita yo muhulu Jasoni u kalisa Tuto ya Sigerike
7 #
1 Mak 1.10
Selukusi ha s'a shwile, mi a yolilwe ki Antiokusi ya n'a bizwa Epifanesi, Jasoni mwanahabo Oniasi, n'a ikungezi situlo sa ku ba muprisita yo muhulu ka bupumi. 8A ya ku mulena, mi a mu sepisa kuli u ta mu fa mali a eza litalenta ze mianda ye milalu ka mashumi a silezi a silivela, ni mali a litalenta ze mashumi a supile ka li li liñwi a ta zwa kwa mutelo. 9Hape a itama kuli u ta fa mulena mali a mañwi a eza litalenta ze mwanda ka mashumi a ketalizoho, haiba n'a ka lumelelwa ku itusisa maata a hae kuli a tome sibaka sa lipapali, ni ku ba ni mitangana kwateñi, hamoho ni ku ñola batu ba Jerusalema kuli ba be ba Antiokusi.
10Mulena ha s'a mu lumelezi, Jasoni a kalisa muhupulo wa hae, mi a kenya Majuda mwa mikwa ya Sigerike. 11#1 Mak 8.17 A zwisa litukelo za silena kwa Majuda ze ne tisizwe ki Joani, ndat'ahe Eupolemusi ya n'a kile a lumwa ku y'o ba yemela ni ku y'o eza tumelelano ya silikani ni Baroma. Hape a zwisa mikwa ye minde ye ne lumelelana ni Mulao, mi a beya ye maswe. 12A beya sibaka sa lipapali kwatukw'a ona Munzi wa Davida mi a eza kuli mane micaha ye lukile hahulu ba apale likuwani ze bonisa bulateleli bwa Sigerike. 13Kabakala bumaswe bwa ku hana Mulimu kwa hae, ni ku tokwa niti ye swanela muprisita yo muhulu, Jasoni a zwelapili ku eza maswe hahulu. Kaniti tuto yeo ya Sigerike ya zwelapili hahulu. 14Baprisita ba tuhela ku bonisa takazo ya ku eza lisebelezo za katala. Ba nyefula Tempele, mi ba tokwa ku tokomela litabelo. Ba akufelanga kapili kwa sibaka sa libapalelo ha ba utwa pizo ya mukopano. 15Ba nyaziseza ze ne li kutekwa ki bo bukw'a bona kaufela mi ba lakaza hahulu mipuzo ya Sigerike. 16Kabakala cwalo, ba tahelwa ki kozi ye tuna mi batu bao, ba mikwa ye ne ba lakaza ku latelela ni ku ba likanyisa, ba ba fetuhela ni ku ba lila ni babulai ba bona. 17Ha si nto ye nyinyani ku lwanisa milao ya Mulimu, sina nako ye tatama ha i ta bonisa niti yeo.
18Ka nako ya lipapali ze ne li ezwanga mwamulaho wa lilimo ze ketalizoho kwa Tire mulena n'a nz'a li teñi. 19Yena litanya yo Jasoni a lumela batu ba bañwi ba ba latelela Sigerike ku y'o yemela Jerusalema. Bao ba lwala mali a silivela a eza lidirakima ze mianda ye milalu a sitabelo sa Herkulusi. Kono nihaili bona ba ba ne ba tisize mali ao ba hupula kuli ne i ta ba hande ku sa itusisa ona kwa sitabelo, mi ba hupula kuli a te a itusizwe kwa misebezi i sili. 20Cwale s'a n'a hupuzi yena ya n'a ba lumile ku ezeza Herkulusi sitabelo, sa itusiswa ka muhupulo wa ba ba ne ba si tisize, ili ku ezisa lisepe za ndwa.
Antiokusi u amuhelwa ka likute mwa Jerusalema
21Apoloniusi, mwan'a Menesteusi, n'a lumezwi kwa Egepita kwa coliso ya Mulena Filometa. Antiokusi, ka ku lemuha kuli mulena Filometa n'e se li sila sa mikwa ya hae, a kala ku hupula mw'a n'a ka pilela. Cwale a zwa mwa Jopa mi a ya kwa Jerusalema. 22A amuhelwa hande hahulu ki Jasoni ni ba muleneñi cwale, ili ka mamonyi ni miluluezo. Ku zwa fo, a zwisa mpi ya hae kwa Fenisia.
Menelausi u ba muprisita yo muhulu
23Ha se ku fitile lilimo ze talu, Jasoni a luma Menelausi, mwanahabo Simoni ya s'a talusizwe pili, ku isa mali ku mulena ni ku amuhela litaelo za hae ka za lika ze ñwi za butokwa. 24Kono yena h'a y'o fita ku mulena a ipumanela situlo sa ku ba muprisita yo muhulu ka ku hulisa butumo bwa mulena, ni ka ku sepisa ku mu fa litalenta ze mianda ye milalu ku fita Jasoni. 25Kasamulaho a ku amuhela litaelo za mulena a kuta, kono n'a sa swaneli ni hanyinyani ku ba muprisita yo muhulu kakuli n'a na ni bunyemi bo butuna ni buhali bo bu swana ni bwa sibatana. 26Cwalehe Jasoni, ya n'a tuluzi mwanahabo, a tululwa cwalo ki yo muñwi wa bulalu, mi a sabela mwa naha ya Maamoni. 27Haili ka za Menelausi, yena a ina cwalo mwa situlo sa hae ili muprisita yo muhulu. Kono n'a sa zwisangi ka swanelo mali a n'a sepisize mulena. 28N'a sa lifangi nihaike Sositratusi, mulaeli wa mpi ya mwa Lukwakwa lwa Jerusalema, n'a nz'a mu buzanga hañata, kakuli musebezi wa ku amuhela mali a mulena n'e li wa hae. Kabakaleo sibeli sa bona ba biziwa ki mulena. 29Yena Menelausi a siya mwanahabo Lisimakusi mwa sibaka sa hae ku ba muprisita yo muhulu. Ni yena Sositratusi a siya Kratesi mulaeli wa Masipera ku mu swalela sibaka.
Pulao ya Oniasi
30Linto ze kamukana ha ne li nze li ezahala cwalo, batu ba mwa Tarese ni mwa Malusi ba fetuha kakuli minzi ya bona ne i filwe Antiokisi, siendi sa mulena. 31Kabakaleo mulena a akufela ku ya kwateñi ku y'o atula taba yeo, mi mwa sibaka sa hae a siya Andronikusi, yo muñwi wa batu ba hae ba ba sepahala, ku ba yena ya mu bakwela. 32Cwale Menelausi, ka ku hupula kuli u fumanezi fateñi sibaka, a uzwa linkwana ze ñwi za gauda za mwa Tempele, a li fa Andronikusi mi a lekisa ze ñwi kwa Tire ni kwa mileneñi ye ne bapani ni ona. 33Oniasi ha s'a fumani bupaki hande, a ya kwa sibaka sa sisabelo kwa Dafine fakaufi ni Antioke mi a y'o mu nyaza ka kezo yeo. 34#Dan 9.26 Kabakaleo Menelausi a ya ku Andronikusi kwa mukunda mi a y'o mu susueza kuli a bulaye Oniasi. Andronikusi a bata Oniasi mi ka bupumi a mu kolwisa ka ku konka, mane a mu susueza kuli a zwe mwa sibaka sa sisabelo, mi kapili-pili a mu bulaya ku si na libaka. 35Ka lona libaka le batu kamukana, isiñi Majuda feela kono ni ba bañwi ba macaba a mañwi, ba utwa butuku ni ku nyema hahulu bakeñisa pulao ye maswe cwalo yeo.
36Mulena h'a kutile ku zwa kwa Silisia, Majuda ba mwa muleneñi, ni Magerike ba ba ne ba utwa butuku bakeñisa mulatu wo, ba t'o bilaela ku yena ka za pulao ya bukuba ya Oniasi. 37Antiokusi a utwa butuku mi a swaba hahulu mane a lila bakeñisa lifu la Oniasi, mutu ya butali ya n'a lukile hahulu. 38Cwale ka ku nyema hahulu a zwisa liapalo za bulena za Andronikusi. A pazaula ni liapalo za hae ze ñwi cwalo, a mu zamaisa mwahal'a muleneñi ku mu isa hona kwa sibaka ko kw'a n'a bulaezi Oniasi, mi a y'o mu bulaela kwateñi. Ka mukwa wo, Mulimu u mu kutiselize se ne si mu lukela.
Lisimakusi u bulaiwa mwa petuhelo
39Cwale Lisimakusi n'a s'a uzwize linto ze ñata za mwa Tempele mwa muleneñi bakeñisa bumaswe bwa Menelausi. Litaba zeo ha li se li utwahalile ni ku zibahala hande mwa libaka kamukana, batu kaufela ba kopana mi ba fetuhela Lisimakusi ya n'a s'a lekisize linto ze ñata za gauda za mwa Tempele. 40Mi kabakala kuli batu ba bañata cwalo ba ne ba se ba nyemile hahulu, Lisimakusi a fa batu ba ba bata ku fita fa likiti ze talu lilwaniso, mi a kala ku lwana. Mpi ya hae ya zamaiswa ki Auranusi, munna-muhulu ya n'a s'a hulile, wa sikuba. 41Cwale batu ha ba se ba lemuha kuli kezo ye maswe cwalo i eziwa ki Lisimakusi, ba bañwi ba nopa macwe, ba bañwi milamu. Ba bañwi ba ñwatanga feela mulola. Kaufel'a bona ba kena ku titika batu ba Lisimakusi. 42Ba holofaza hahulu ba bañata, ni ku bulaya ba bañwi ba ba likana ku bona. Ba ba tula mi ba mata kaufela. Ha n'e li yena lisholi luli kasibili, ya n'a uzwanga libyana za mwa Tempele, ili yena Lisimakusi, ba mu bulaela kwatukw'a sibulukelo ya bufumu.
Menelausi u leka mulena kweta
43Kabakala kezo ye, Menelausi a zekiswa. 44Mulena h'a taha kwa Tire, banna ba balalu ba ba ne ba lumilwe ki ba bahulu ba fitisa taba yeo ku yena. 45Cwale Menelausi ha s'a boni kuli u tuzwi, a sepisa Pitolemi mwan'a Dorimenesi kuli u ta mu fa mali a mañata hahulu, haiba n'a ka kona ku susueza mulena kuli a mu yemele. 46Cwale Pitolemi a isa mulena kwande ku y'o fukelwa ki moya, mi a mu susueza ku fetula muhupulo wa hae. 47Mulena a felisa mulatu wa Menelausi, yena mutisi wa bumaswe bo kaufela, mi a atulela lifu batu ba babotana ba ba ne ba si na mulatu, ili ba ba ne ba ka be ba lukuluzwi haiba ne ba ka fitisa taba ya bona nihaiba kwa Masitia. 48Ha ku si ka fita nako ye telele, kiha ku bulawa bona bani ba ba ne ba utwela butuku muleneñi wa bona, bañi ba naha, ni bufumu bwa Tempele. 49Mane ni ba bañwi ba Tire ba bonisa ku sa lata kwa bona mulatu ka ku ba ezeza kepelo ye komokisa hahulu ye bonisa ku tokwa mulatu kwa bona. 50Kono kabakala muna wa ba ba ne ba li mwa litulo ze pahami Menelausi a zwelapili mwa situlo sa buhulu. A zwelapili mwa bumaswe ni ku ikeza sila se situna sa banabahabo.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.