2 Bakorinte 2
2
1Cwale, ni lelile ku sa taha ku mina, kuli ni si ke na t'o mi swabisa hape. 2Kakuli haiba ni ka mi swabisa, ya ka ni tabisa hape ki mañi? Haisi bona feela be ni swabisize! 3Ki lona libaka ha ni mi ñolezi ze ni mi ñolezi. Ne ni sa lati ku t'o fita ku mina ni ku swabiswa ki bona ba ba swanezi ku ni tabisa. Kakuli ni kolwa kuli ha ni tabile, ni mina cwalo mu tabile. 4Ni mi ñolezi ka pilu ye butuku ye mwa ñalelwa, mane ne ni lila, isiñi kuli ne ni bata ku mi swabisa, kono kuli mu lemuhe mo ni mi latela kaufel'a mina.
Ya fosize a swalelwe
5Cwale haiba ku na ni ya tahisize maswabi, h'a si ka swabisa na, kono u swabisize mina kaufela, kamba ba bañwi ku mina, ka ku sa lata ku ekeza. 6Mutu yo, ku mu likani h'a nyazizwe ki buñata bwa mina. 7Swanelo, kikuli mu mu swalele ni ku mu tiisa pilu. Mu mu feze maswabi, a si ke a welela. 8Hakulicwalo, ni mi kupa kuli mu mu bonise ka likezo kuli mwa mu lata luli. 9Ki lona libaka ha ni mi ñolezi liñolo lani. Ne ni bata ku bona mo mu ka tulela muliko o cwalo, ni bone hape kapa mu sa itukiselize ku buluka likelezo za ka. 10Ha mu swalela mutu ka s'a fosize, ni na, na mu swalela. Kakuli ha ni swalela, haiba ni swanezi ku swalela foso, ni eza cwalo kabakala mina fapil'a Kreste. 11Ni eza cwalo kuli Satani a si ke a ba ni maata fahalimu a luna. Kakuli lu ziba hande-nde milelo ya hae ku luna.
Sabo ya Paulusi mwa Troasi
12 #
Lik 20.1
Ha ni fita mwa Troasi ku luta Litaba ze Nde za Kreste, na fumana kuli Mulena u kwaluzi nzila ya musebezi wa hae mwateñi. 13Kono na katazeha hahulu kakuli ne ni si ka fumana mwanahabo luna Tite. Kiha ni laeza batu ba Troasi, mi na ya kwa Masedonia.
Ku tula ka Kreste
14Kono ku iswe buitumelo ku Mulimu! Kakuli ka kopano ye lu na ni yona ni Kreste, u lu etelela ka linako kaufela mwa nzila ya ku tula. Sina muunko o munde o hasanela kai ni kai, Mulimu u itusisa luna kuli batu kamukana ba zibe Kreste. 15Kakuli lu swana ni muunko o munde wa insense, ye cisezwa Mulimu ki Kreste, ili muunko o ya ku ba ba li mwa nzila ya bupilo ni ku bona ba ba mwa nzila ya lifu. 16Ku ba bañwi, ki muunko wa lifu o' bulaya, mi ku ba bañwi ki muunko wa bupilo o' pilisa. Ki mañi ya kona ku peta musebezi o kuma fa? 17Ha lu swani ni ba bañwi ba bañata, ba ba swala linzwi la Mulimu inge ki nto ye cipile. Kono kakuli lu lumilwe ki Mulimu, lu bulela sina batanga ba Kreste.
Currently Selected:
2 Bakorinte 2: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
