1 Batesalonika 2
2
Musebezi wa Paulusi mwa Tesalonika
1Banabahesu, ni mina mwa ziba hande kuli ku mi potela kwa luna ku bile ni tuso. 2Mwa ziba mo ne lu nyandiselizwe ni ku lwahiwa mwa Filipi pili lu si ka t'o fita ku mina mwa Tesalonika. Kono Mulimu a lu fa bundume bwa ku mi bulelela Litaba ze Nde ze zwa ku yena, nihaike ba bañwi ne ba lu hanyeza ka tata. 3#Lik 16.19-24; 17.1-9 Likutazo za luna, ha li si ka tomwa fa mafosisa, ze masila, kamba za ku puma. 4Kono, kamita lu bulela mw'a latela Mulimu, kakuli u boni kuli ne lu swanelwa ki ku luta Litaba ze Nde za hae. Ha lu bati ku tabisa batu, kono lu bata ku tabisa Mulimu ya tatuba lipilu za luna. 5Mu ziba hande kuli ha lu si ka taha ku mina ka lingambolo ze colaula, kamba ku itusisa manzwi a pata takazo ya ku fuma. Mulimu, fo, ki paki ya luna! 6Hape, ha lu si ka bata ku lumbiwa ki batu, i ka ba mina, kamba ba bañwi. 7Ne lu lukela ku kupa ze tuna ku mina sina ha lu li baapositola ba Kreste. Kono lwa ba ni musa ku mina, musa o' swana ni wa mushemi h'a babalela bana ba hae. 8Kabakala lilato la luna ku mina, ne lu lakaza ku mi fa, isiñi Litaba ze Nde za Mulimu feela, kono ni bona bupilo bwa luna, kakuli ne mu fetuhile balatiwa ba luna ba butokwa! 9Luli, banabahesu, mu sa hupula ku ikataza ni ku sebeza ka tata kwa luna! Ne lu sebeza musihali ni busihu kuli lu si ke lwa mi kataza, ha ne lu nze lu mi taluseza Litaba ze Nde za Mulimu.
10Mu lipaki za luna hamoho ni Mulimu cwalo. Mikwa ya luna ku mina balumeli i ne li ye kenile, ye lukile, ye sa nyazahali. 11Mu ziba mo lu ezelize yo muñwi ni yo muñwi wa mina. Lu ezize sina mushemi h'a babalela bana ba hae. 12Lu mi kutalize, mi lu mi tiisize lipilu, lu nze lu mi lemusa ni ku mi susueza kuli mu pile bupilo bo bu tabisa Mulimu, yena ya mi biza kuli mu kene mwa Mubuso ni mwa kanya ya hae.
13Lu itumela ku Mulimu kamita ka libaka li sili hape. Ha lu mi tiselize linzwi la Mulimu, mu li teelelize ni ku li amuhela, isiñi sina le li zwa ku mutu, kono sina linzwi la Mulimu, ili lona luli. Kakuli Mulimu ki yena ya sebeza mwahal'a mina ba ba lumela. 14#Lik 17.5 Banabahesu, mu likanyisize likeleke za Mulimu za mwa Judea, ze li za Jesu Kreste. Ni mina mu nyandisizwe ki banabahabo mina, sina mo ba nyandiselizwe balumeli ba koo ki Majuda. 15#Lik 9.23, 29; 13.45, 50; 14.2, 5, 19; 17.5, 13; 18.12 Majuda bao ba bulaile Mulena Jesu ni bapolofita, mi ba lu nyandisize ni luna. Ha ba tabisi Mulimu, mi ki lila za batu kamukana! 16Ba lu hanisa ku taluseza Balicaba linzwi le li kona ku ba pilisa, ba nze ba ekeza cwalo, sina kamita, kwa libi za bona. Kono kwa mafelelezo buhali bwa Mulimu bu wezi fahalimw'a bona.
Paulusi u lakaza ku potela Batesalonika
17Haili luna, banabahesu, isamba lu kauhana ni mina nakonyana, isiñi ka moya kwa utwahala, kono ka mubili, lwa ba ni takazo ye tuna hahulu ya ku mi potela hape, kabakala ku mi shukelwa. 18Ne lu lakaza ku kutela ku mina. Sina na, Paulusi kasibili, ni likile mane habeli kamba ku fita. Kono Satani u lu palelisizwe ku eza cwalo. 19Sepo ni tabo ya luna ki ifi? Kana ha si mina luli libaka le lu ka itumba ka lona fapil'a Mulen'a luna Jesu Kreste, h'a ka taha, nji? 20Kaniti luli be lu itumba ka bona ki mina. Ki mina tabo ya luna!
Lozi Interconfessional Bible, Catholic Edition © Bible Society of Zambia, 2009.