1 Litaba 29
29
Limpo za ku yahisa Tempele
1 #
1 Lita 22.5
Mulena Davida a bulelela mukopano kaufela, a li, “Mwan'a ka Salumoni ki yena ya ketilwe ki Mulimu, kono u sa li yo munyinyani, mi h'a na zibo. Musebezi o swanezi ku eziwa ki o mutuna hahulu, kakuli yeo ha si ndu ya bulena, kono ki Tempele ya Mulimu, Muñ'a Bupilo. 2Ni likile mo ne ni konela kaufela ku lukisa za muyaho wa Tempele, ili gauda, silivela, kopa, butale, likota ni macwe a mibala-bala a bulilo. 3Fahalimw'a zeo ze ni fumani, na, ni zwisize silivela ni gauda mwa bufumu bwa ka luli, kakuli ne ni ikutwa ni tamehile ka Tempele ya Mulimu. 4Bukiti bwa gauda ye ni file bu likana ni bukiti bwa likilo ze likiti ze mwanda, ni bwa silivela bo bu likana ni likilo ze likiti ze mianda ye mibeli ka mashumi a mane ili gauda ni silivela ye nde luli ya ku kabisa mamota a Tempele. 5Ki ya ni ku lukisa lika ze ñwi ze ta eziwa ka gauda ki batu ba likwala. Ki mañi cwale ku mina ya tabela ku fa Muñ'a Bupilo?”
6Litoho za mishiku, manduna ba masika, bazamaisi ba limpi ni bazamaisi ba liluwo la bulena ba ikalabela ku tusa mwa musebezi wo. 7Kwa musebezi wa Tempele, ba fitisa gauda ya bukiti bo bu bata ku likana ni bwa likilo ze likiti ze mwanda ka mashumi a supile, ni silivela ye bata ku likana ni bwalikilo ze likiti ze mianda ye milalu ka mashumi a mane ni ze ketalizoho. Kopa yona ya likana ni bwa likilo ze likiti ze mianda ye silezi ka mashumi a mabeli, mi butale bona bwa likana ni masaka a likiti ze mashumi a malalu ka ze ne ni mianda i ketalizoho ni saka i liñwi ni i liñwi ya ba bukiti bwa likilo ze mwanda. 8Ba ba ne ba na ni macwe a butokwa, ba a fitisa ku Jehiele, Mulivi wa mushiku wa Gerishoni, ya n'a buluka mali a Tempele. 9Batu ne ba file Muñ'a Bupilo ka tabo, mi ne ba tabisizwe ki ku bona buñata bwa limpo ze ne fitisizwe. Mane ni yena Mulena Davida cwalo n'a tabile hahulu.
Davida u lumbeka Mulimu
10Hona foo, fapil'a mukopano kaufela Davida a lumbeka Muñ'a Bupilo, a li, “Muñ'a Bupilo, Mulimu wa kukw'a luna Jakobo, u lumbekwe kamita ni mita! 11#Mat 6.13 U yo mutuna, mi u na ni maata, kanya ni bunde. Bulena bwa hao ki bo butuna. Ze mwa lihalimu ni mwa lifasi kaufela ki za hao, mi u mulena, mubusi wa lika kamukana. 12Bufumu ni maata kaufela li zwa ku wena. U busa lika kamukana ka maata a hao, mi u kona ku hulisa ni ku tiisa mañi ni mañi. 13Cwale, Mulimu wa luna, lwa itumela ku wena, mi lu lumbeka libizo la hao.
14“Nihakulicwalo na, ni batu ba ka, ha lu koni ku ku fa se siñwi, kakuli lika kaufela ki limpo ze zwa ku wena, mi lu kutisize feela s'e li sa hao. 15Oho Muñ'a Bupilo, wa ziba kuli mwa bupilo lu swana ni baenyi ba ba yembana feela, sina mo ne ba inezi bo kukw'a luna. Mazazi a luna a fita sina muluti, mi ha lu koni ku pima lifu. 16Oho Muñ'a Bupilo, Mulimu wa luna, lu kubukanyize hamoho bufumu bo kaufela bwa ku yahisa Tempele, ili ku kuteka libizo la hao le li kenile, kono ze kaufela li zwa ku wena, mi ki za hao kamukana. 17Na ziba kuli wena u lika pilu ya mañi ni mañi, mi u tabiswa ki batu ba ba sepahala. Ka pilu ni niti ya ka ni ku file zeo kaufela ni nze ni tabile, mi ni boni batu ba hao, ba ba kopani fa, mo ba tabezi ha ba ku tiseza limpo. 18Muñ'a Bupilo, Mulimu wa bo kukw'a luna bo Abrahama, Isaka ni Jakobo, tiisa lilato le li cwalo mwa lipilu za batu ba hao kuya kuile, mi kamita u ba eze ba ba sepahala ku wena. 19U fe mwan'a ka Salumoni pilu ye lakaza ku mamela litaelo kamukana z'o laela, ni ku yaha Tempele ye se ni kalisize ku eza litukiso za yona.”
20Davida kiha s'a laela batu, a li, “Mu lumbeke Muñ'a Bupilo, Mulimu wa mina!” Mi kopano kamukana ya lumbeka Muñ'a Bupilo, Mulimu wa bo kukw'a bona, mi ba boola ku kuteka Muñ'a Bupilo ni mulena cwalo.
21Habusa ba bulaya limunanu za ku ezeza Muñ'a Bupilo litabelo, mi li ciswa mutumbi. Ba taba lipoho ze sikiti, lipoho za lingu ze sikiti, ni lingunyana ze sikiti, kwand'a limpo za waine ni limunanu ze ñata ze tabilwe kuli batu ba Isilaele kamukana ba ce. 22Cwale zazi leo batu ba taba hahulu ha ba nze ba ca ni ku nwa fapil'a Muñ'a Bupilo.
Mi ba tumisa hape lwa bubeli, ba li, “Salumoni ki yena mulena!” Ba mu yolisa ni ku mu toza mafula ka libizo la Muñ'a Bupilo, mi Zadoki yena a toziwa ku ba muprisita. 23#1 Male 2.12 Cwale Salumoni a yola ndat'ahe fa lubona lw'a n'a tomile Muñ'a Bupilo. A ba mulena ya kondisa lika, mi a utwiwa ki sicaba kamukana sa Isilaele. 24Manduna kamukana ni masole, mane nihaili bana ba Davida ba bañwi, ba sepisa ku ipeya mwatas'a Mulena Salumoni. 25Muñ'a Bupilo a sikululela sicaba kaufela ku Salumoni, mi a mu hulisa hahulu ku fita mulena ufi ni ufi n'a busize Isilaele.
Kakalezo ya puso ya Davida
26Davida, mwan'a Jese, u busize Isilaele kaufela. 27#2 Sam 5.4-5; 1 Lita 3.4 U busize lilimo ze mashumi a mane, a nz'a li mwa Heberoni lilimo ze supile, ni mwa Jerusalema lilimo ze mashumi a malalu ka ze talu. 28A shwa s'a supezi, a fumile ni ku kutekeha, mi mwan'a hae Salumoni a mu yola fa bulena. 29Litaba za Mulena Davida ku kala kwa makalelo ku y'o fita kwa mafelelezo li ñozwi mwa libuka za bapolofita ba balalu, ili bo Samuele, Natani ni Gadi. 30Li bulela ka mw'a buselize, ka maata a n'a na ni ona, ni lika kaufela ze ne ezahalile ku yena, mwa Isilaele, ni kwa mibuso ye n'e bapani ni yena.
Currently Selected:
1 Litaba 29: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.