1 Litaba 28
28
Litaelo za Davida bakeñisa Tempele
1Davida a laela manduna ba Isilaele kaufela ku t'o kopana mwa Jerusalema. Cwalehe, manduna ba masika kamukana, manduna ba ba ne ba zamaisa musebezi wa sicaba, baeteleli ba mishiku, bababaleli ba liluwo ni limunanu za mulena ni bana ba hae, hamoho ni likombwa za mwa lapa la mulena, baeteleli ba masole, ni batu ba ba kutekeha ba t'o kopanela mwa Jerusalema.
2 #
2 Sam 7.1-16; 1 Lita 17.1-14 Mulena Davida a yema fapil'a bona, mi a bulela, a li, “Banabahesu, mu ni teeleze hande. Ni batile ku yahela Likwati la Bulikani ndu ye tiile, ili lona lubona lwa Muñ'a Bupilo, Mulimu wa luna. Ni se ni ezize litukiso za ku yaha Tempele, ili ku kuteka Mulimu. 3Kono u ni hanisize ku eza cwalo, kakuli na, ni musole mi ni suluzi mali a mañata hahulu mwa lindwa. 4Muñ'a Bupilo, Mulimu wa Isilaele, u ni ketile hamoho ni ba mba ya ka cwalo ku busa Isilaele kuya kuile. U ketile ba lusika lwa Juda ku ba baeteleli, mi hona mwa Juda mo, u ketile ba mba ya ndate. Mwa mba yeo kamukana i bile tato ya hae ya ku ni nga ni ku ni eza mulena wa Isilaele kaufela. 5U ni file bana ba bañata, mi ku bona kamukana u ketile Salumoni ku busa Isilaele, ili ona mubuso wa Muñ'a Bupilo.
6“Muñ'a Bupilo u ize ku na, ‘Mwan'a hao Salumoni ki yena ya ta ni yahela Tempele. Ni mu ketile kuli a be mwan'a ka, mi na, ni be ndat'ahe. 7Mubuso wa hae ni ta u tiisa kuya kuile, haiba a zwelapili ku utwa litaelo ni milao ya ka kamukana sina mw'a ezeza ka nako ye.’
8“Cwalehe banabahesu, fapil'a Mulimu wa luna ni fapil'a kopano ye, ya Isilaele kaufela, ili mina batu ba Muñ'a Bupilo, ni mi laela kuli mu tokomele lika kamukana z'a lu laezi Muñ'a Bupilo, Mulimu wa luna, ili kuli mu zwelepili ku luwa naha ye nde ye, ni kuli mu i siyele masika a mina a sa taha, kuya kuile.
9“Ni wena Salumoni, mwan'a ka, ni ku laela kuli u latelele Mulimu wa bo ndat'aho ni ku mu sebeleza ka pilu i liñwi ni ka kutwisiso ya hao kaufela. U ziba mihupulo ni litakazo za luna kamukana. Haiba u taha ku yena, u ta ku amuhela, kono ha u mu hana, u ta ku fulalela kuya kuile. 10U swanezi ku lemuha kuli Mulimu u ku ketile kuli u yahe Tempele ya hae ye kenile. Cwale u i yahe! U i yahe ka mutundamenyi!”
11Davida a fa Salumoni mulalo wa mandu a Tempele kaufela, mandu a libyana, ni mandu a mañwi kamukana, ni ka Sibaka se si Kenile Hahulu, mo ku swalelwa libi. 12A mu felela cwalo ni milalo y'a n'a hupula ka malapa ni mandu a n'a potoloha malapa ao, ni milalo ya mandu a libyana ze sebeliswa mwa Tempele ni a limpo ze fitiswa ku Muñ'a Bupilo. 13Davida a bonisa hape Salumoni mukwa wa ku abela baprisita ni Malivi misebezi ya bona mwa Tempele, ni ku babalela libyana za mwateñi. 14A fa likelezo ka buñata bwa silivela ni gauda ye ka itusiswa ku eza libyana za mwa Tempele, 15sina lilampi ni mapahekelo a zona, 16litafule za silivela, ni litafule kaufela za gauda fo ne ku beiwa linkwa ze ne fiwa Mulimu. 17A fa likelezo ka fo i kuma gauda ye nde ye ta itusiswa kwa ku eza litabisa, mikeke, ni lijaki, ni fo i kuma silivela ni gauda ye ta itusiswa kwa ku eza likotolo, 18ni fo i kuma gauda ye nde ye ta itusiswa kwa ku eza katala fo ku cisezwa insense, ni koloi ya lifolofolo ze na ni mafufa a pakulezwi fa Likwati la Bulikani bwa Muñ'a Bupilo. 19Mulena Davida a li, “Ze kamukana li teñi fa mulalo o ñozwi ka ku ya ka likelezo z'a ni file Muñ'a Bupilo kasibili.”
20Cwale Davida a li ku mwan'a hae Salumoni, “U tiye, mi u be ni bundume. U kale musebezi, mi u si ke wa yemiswa ki sifi ni sifi. Muñ'a Bupilo, Mulimu ye ni sebeleza, u ta ba ni wena. H'a na ku ku fulalela, kono u ta ku tusa ku fitela u feza musebezi wa Tempele. 21Baprisita ni Malivi ba filwe misebezi ya bona mwa Tempele. Babeleki kaufela ba ba na ni bukwala ba lakaza ku ku tusa, mi batu kaufela, hamohocwalo ni baeteleli ba bona, ba litezi taelo ya hao.”
Currently Selected:
1 Litaba 28: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.