Romanonan 2
2
Dios ta husga tur hende konforme bèrdat
1P'esei mes, mi amigu, — no ta importá ken abo ku ta husga tur otro hende ta — abo mes no tin diskulpa. Pasobra ora bo ta husga otro hende, ta bo mes bo ta kondená!#Mateo 7:1; Lukas 6:37 Ya ku bo ta hasi nèt e kosnan ku bo ta husga otro hende p'e. 2Nos sa ku Dios ku rason ta husga hende ku ta hasi e tipo di kos akí. 3Pero abo, mi amigu, ta hasi e mes kosnan ku bo ta kondená! Akaso bo ta kere ku bo por skapa di huisio di Dios? 4Òf ta menospresiá bo ta menospresiá bondat, toleransia i pasenshi abundante di Dios? Ta sa bo no sa ku Dios ta bondadoso i p'esei E ke trese un kambio den bo bida? 5Pero bo kurason ta duru, bo ta tèrko. P'esei bo ta kumpra kastigu pa bo kurpa ku lo bo haña riba dia di kastigu, ora Dios aparesé pa dikta sentensia hustu! 6Lo E paga kada hende segun su aktonan.#Salmo 62:11-12; Proverbionan 24:12; Yeremías 17:10; Ezekiel 18:30; 33:20; Sirag 16:12,14; Mateo 16:27 7Esnan ku ta sigui perseverá den loke ta bon i ta buska gloria, honor i bida ku no ta kaba nunka, Dios lo duna bida eterno. 8Otro hende ta egoista, ta rechasá bèrdat i ta sigui loke ta robes. Riba nan Dios lo baha su rabia i furia. 9Tur hende ku ta praktiká maldat lo sufri i pasa angustia, esnan ku ta hudiu na promé lugá i esnan no hudiu tambe. 10Pero tur hende ku hasi bon lo haña gloria, honor i pas, esnan ku ta hudiu na promé lugá i esnan no hudiu tambe. 11Pasobra Dios no ta hasi distinshon di persona.#Deuteronomio 10:17
12Esnan ku no tin Lei di Moises ta peka i bai pèrdí sin Lei, ma e hudiunan ku sí tin Lei di Moises, ora nan peka, ta keda kondená pa medio di Lei. 13Dios no ta aseptá hende komo hustu djis pasobra e ta skucha Lei di Moises, sino pasobra e ta kumpli ku e Lei. 14Esnan no hudiu, ku no tin Lei di Moises, pero ku di nan mes ta hasi loke e Lei ei manda, ta bira nan mes lei! 15Nan kondukta ta mustra ku e Lei ta skibí den nan kurason. Nan konsenshi tambe ta komprobá esei i nan pensamentu#2:15 esei i nan pensamentu; otro posibel tradukshon: esei, pasobra nan pensamentu tin be ta akusá nan i otro be ta defendé nan. 16Esaki lo sosodé riba e dia ku Dios ta husga e sekretonan di hende su kurason, pa medio di Kristu-Hesus i di akuerdo ku e bon notisia ku mi ta prediká.
E hudiunan i Lei di Moises
17Pero abo ta yama bo mes hudiu, bo ta konfia riba Lei di Moises i ta orguyoso di bo Dios. 18Bo a siña kiko boluntat di Dios ta i bo por diserní bon for di malu, pasobra bo a haña instrukshon den Lei di Moises. 19Bo ta sigur ku bo por guia hende siegu i ku bo ta lus den kaminda di esun den skuridat, 20edukadó di esun ku ta ignorante i maestro di hende simpel, pasobra den lei bo ta haña formulashon perfekto di konosementu i bèrdat. 21Bon antó, si bo ta siña otro, di kon bo no ta instruí bo mes? Bo ta prediká pa no hòrta, anto bo mes ta hòrta? 22Bo ta bisa pa no kometé adulterio, anto bo mes ta kometé adulterio? Idolatria ta repugná bo, anto tòg bo ta enrikesé bo mes ku kos hòrtá for di tèmpel pagano? 23Abo ta broma ku Lei di Moises, pero bo ta kibra lei i asina bo ta rebahá Dios. 24Ku rason tin skibí: ‘Ta boso falta ku e paganonan ta blasfemá nòmber di Dios!’#Isaías 52:5
25Ta bèrdat ku sirkunsishon tin balor pa esun ku ta kumpli ku Lei di Moises, pero si bo no ta kumpli kuné, ta komo si fuera bo no ta sirkunsidá! 26Meskos tambe lo konsiderá esun ku no ta sirkunsidá, pero ta tene su mes na e reglanan di Lei di Moises, komo sirkunsidá! 27Esun ku físikamente no ta sirkunsidá, pero tòg ta tene su mes na Lei, lo husga abo ku ta kibra Lei, ounke bo tin Lei i ta sirkunsidá.#2:27 abo ku ta kibra Lei, ounke bo tin Lei i ta sirkunsidá; otro posibel tradukshon: abo ku tin tantu buki di Lei komo sirkunsishon i tòg ta kibra lei 28Pasobra no ta kos eksterno ta determiná ken ta hudiu berdadero, ni sirkunsishon no ta solamente loke ta hasi na kurpa di un hende. 29Ma hudiu di bèrdè ta esun ku ta hudiu di paden, esta esun ku tin su kurason sirkunsidá. Anto e sirkunsishon ei ta trabou di Spiritu Santu, no di loke ta skibí! Hende asina ta haña elogio, no di hende, sino di Dios!#Deuteronomio 10:16; 30:6; Yeremías 4:4
Currently Selected:
Romanonan 2: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013