Nehemías 11
11
Lista di habitante di Herusalèm
1E lidernan di pueblo a bai biba na Herusalèm. Pero a tira lòt entre e otro hendenan di pueblo pa indiká kua di kada dies famia ta bai biba na e siudat santu Herusalèm; e otro nuebenan por a keda biba den e otro siudatnan. 2E pueblo a gaba esnan ku boluntariamente a bai biba na Herusalèm.
3Den e otro siudatnan di Huda tabatin tambe, aparte di e otro israelitanan: saserdote, levita, sirbiente di tèmpel i desendiente di e sirbientenan di Salomon. Kada hende tabatin su mes pida tereno den su mes siudat.
Aki ta sigui nòmber di e hefenan di provinsia ku tabata biba na Herusalèm.#1 Krónikanan 9:2; Nehemías 7:72
4Di tribu di Huda:
Ataya, yu di Uzías. E tabata desendiente di Pèrès, yu di Huda, pa parti di su antepasadonan Zekarías, Amarías, Shefatías i Mahalalel.
5Maasea, yu hòmber di Barug. E tabata desendiente di Shèla, yu di Huda pa parti di su antepasadonan Kòl-Hozè, Hazaías, Adaías, Yoyarib i Zekarías.
6E desendientenan di Pèrès ku tabata biba na Herusalèm tabata na tur 468 hòmber balente.
7Di tribu di Benhamin:
Salu, yu di Meshulam. E tabata desendiente di Yeshaías pa parti di su antepasadonan Yoed, Pedaías, Kolaías, Maasea i Itiel.
8Tabatin tambe Gabai, Salai. En total nan tabata 928 hende. 9Yoel, yu di Zikri, tabata nan lider. Huda, yu di Hasnua, tabata supkomandante.
10Di e saserdotenan:
Yedaías, yu di Yoyarib i ñetu di Yakin. 11Seraías tabata hefe prinsipal, enkargá ku kuido di tèmpel; e tabata desendiente di Ahitub, pa parti di su antepasadonan Hilkías, Meshulam, Sadok i Merayot. 12Huntu ku e saserdotenan akí tabatin 822 kolega ku tabata hasi sirbishi den tèmpel.
Tabatin tambe Adaías, yu di Yeroham. E tabata desendiente di Malkías pa parti di su antepasadonan Pelalías, Amsi, Zekarías i Pashur. 13Entre e miembronan di su famia tabatin 242 kabes di famia.
Amasai, yu di Azarel. E tabata desendiente di Imer pa parti di su antepasadonan Agzai i Meshilemot. 14Tabatin tambe 128 otro saserdote, tur tabata hòmber balente. Zabdiel, yu di Hagdolim, tabata nan lider.
15Di e levitanan:
Shemaías; e tabata desendiente di Buni pa parti di su antepasadonan Hashub, Azrikam i Hashabías.
16Shabtai i Yozabad, kabesnan di famia, ku tabata lider di tur esnan enkargá ku e trabounan pafó di tèmpel di Dios.
17Matanías, yu hòmber di Mikas i ñetu di Zabdi, un desendiente di Asaf. E tabata dirigí e kanto di alabansa i na ora di orashon é tabata kuminsá ku e gradisimentu. Bakbukías, famia di Matanías, tabata su remplasante.
Tambe tabatin Abda, yu di Shamúa i ñetu di Galal, un desendiente di Yedutun. 18Na tur e levitanan den e siudat santu tabata 284.
19Guardianan na entrada di tèmpel tabata Akub, Talmon i algun famia di nan, 172 hende en total.
20Tur e otro israelitanan, ku saserdote i levita tambe aden, tabata biba riba nan mes tereno, nan patrimonio, den e otro siudatnan di Huda. 21E sirbientenan di tèmpel, ku tabata bou di guia di Siha i Guishpa, tabata biba riba e seritu Ofèl na Herusalèm.
22Hefe di e levitanan na Herusalèm tabata Uzi, yu di Bani. E tabata desendiente di Mikas pa parti di su antepasadonan Hashabías i Matanías. E tabata pertenesé na famia di Asaf, e famia ku tabata perkurá pa e kanto durante sirbishi den tèmpel. 23Un dekreto real tabata regla e sirbishi diario di e kantornan den tèmpel.
24Petaías, yu di Meshezabel, un desendiente di Zèrag, yu di Huda, tabata representá pueblo israelita serka rei di Persia.
E pueblo hudiu pafó di Herusalèm
25Esaki ta e siudatnan pafó di Herusalèm kaminda esnan di tribu di Huda tabata biba: Kiriat-Arba, Dibon, Yekabseel i e pueblonan i e pueblesitonan ku tabata rondoná nan; 26Yeshua, Molada, Bet-Pèlèt, 27Hasar-Shual, Beer-Shèba ku su pueblonan, 28Siklag, Mekona ku su pueblonan, 29En-Rimon, Sora, Yarmut, 30Zanoag i Adulam ku nan pueblonan, Lakish ku su kunukunan i Azeka ku e pueblonan ku tabata rondon'é. Asina ta ku nan a establesé nan mes for di Beer-Shèba parti zùit te na vaye di Hinom parti nort.
31Esnan di tribu di Benhamin tabata biba na Gueba, Mikmas, Aya, Betel i su pueblonan, 32tambe Anatot, Nob i Anaías, 33Hasor, Rama i Guitaim, 34Hadid, Seboim, Nebalat, 35Lod, Ono i den Vaye di Artesano. 36Algun grupo di levita for di region di Huda tambe a bai biba den teritorio di Benhamin.
Currently Selected:
Nehemías 11: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013