Yozue 17
17
Teritorio di tribu di Manase
1Lòt a indiká tambe kua tereno tabata pa Manase, pasobra Manase tabata yu mayó di Jozef.
Makir, ku tabata yu mayó di Manase i tata di Guilead, ya a haña e terenonan Guilead i Bashan komo propiedat, pasobra e tabata un hòmber ku kurashi. 2Nan a parti e tereno wèst di Yordan entre e sobrá desendientenan hòmber di Manase: Abiezèr, Helèk, Asriel, Shèkèm, Hefèr i Shemida. Nan tabata ñetu di Jozef i tata di e diferente famianan den tribu di Manase. 3Selofhat, ku tabata yu di Hefèr, ñetu di Guilead i bisañetu di Makir, no tabatin yu hòmber, solamente yu muhé; nan tabata yama Magla, Noa, Hogla, Milka i Tirsa. 4E yunan akí a bai serka saserdote Eleazar, serka Yozue, yu di Nun, i e otro lidernan i bisa nan: ‘SEÑOR a ordená Moises duna nos pida tereno komo propiedat, meskos ku ta duna nos otro famianan.’#Numbernan 27:1-7 A kumpli ku e petishon ei, pasobra tabata òrdu di SEÑOR. 5Asina ta ku tribu di Manase a haña en total dies pida tereno, sin konta e terenonan Guilead i Bashan na parti ost di Yordan. 6Esei a sosodé pasobra e desendientenan muhé di Manase a haña propiedat meskos ku su desendientenan hòmber. E region Guilead ya tabata partí den e sobrá desendientenan hòmber di Manase.
7Frontera di e teritorio di tribu di Manase tabata kore di Asher te Mikmetat, na parti ost di Shikem, sigui bai zùit te na Yashub-En-Tapuag. 8E region di e siudat Tapuag tabata pertenesé na tribu di Manase, pero Tapuag mes, ku ta keda na e frontera, tabata pertenesé na tribu di Efraim. 9Despues e frontera tabata baha pasa zùit di roi Kana. E siudatnan eibanda tabata pertenesé na tribu di Efraim, ounke nan tabata situá meimei di e siudatnan di Manase. Frontera di tribu di Manase tabata pasa parti nort di e roi bai kaba den laman. 10Asina ta ku e teritorio parti zùit di e roi tabata pertenesé na Efraim i parti nort na Manase. E frontera wèst tabata laman. Parti nort e teritorio tabata yega te na esun di Asher, parti ost te na esun di Isakar. 11E siguiente siudatnan den region di Isakar i Asher, ku e pueblonan rondó di nan, tambe tabata di tribu di Manase: Bet-Shean, Yibleam, Dor, En-Dor, Tanak i Megido, e tres serunan. 12Sinembargo tribu di Manase no por a konkistá e siudatnan akí, p'esei e kanaanitanan a logra keda biba den e region. 13Ora e israelitanan a haña mas poder, nan a obligá e kanaanitanan traha pa nan, pero nunka no a kore ku nan por kompleto.#Huesnan 1:27-28
E desendientenan di Jozef ta reklamá tereno
14E desendientenan di Jozef a bin reklamá serka Yozue: ‘Di kon bo a duna nos solamente un pida tereno komo propiedat, dia bo a tira lòt? Nos ta nos hopi, pasobra semper SEÑOR a bendishoná nos.’ 15E ora ei Yozue a kontestá nan: ‘Si boso ta haña ku boso ta un pueblo grandi, i e serunan di Efraim ta muchu pèrtá pa boso, bai mas paden den e serunan. Rosa mondi den e region kaminda e perizitanan i e refaítanan ta biba, pa boso haña lugá.’ 16Riba esei nan a kontestá: ‘E serunan ei lo no ta basta pa nos. Ademas e kanaanitanan ku ta biba den e sabananan, tantu esnan na Bet-Shean ku su siudatnan komo esnan den sabana di Yizreel tin garoshi di guera trahá di heru.’ 17E ora ei Yozue a kontestá e desendientenan di Jozef, esta e tribunan di Efraim i Manase: ‘Boso ta un pueblo grandi i boso tin hopi forsa. No ta un parti so lo ta pa boso, 18e region den seru te na e puntanan di mas leu tambe lo ta pa boso. Ounke e ta mondi, boso por ros'é. Boso lo por kore ku e kanaanitanan ounke nan ta fuerte i nan tin garoshi di guera trahá di heru.’
Currently Selected:
Yozue 17: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
