Yeremías 2
2
Infieldat di Israel
1Mi a haña un palabra di SEÑOR. 2El a manda mi bai Herusalèm pa proklamá pa tur hende tende: ‘Esaki SEÑOR ta bisa:
“Mi ta kòrda kon fiel bo tabata den bo hubentut,#Hoséas 2:15-16
kuantu amor bo tabatin pa Mi
tempu ku nos a kaba di kasa
i kon bo tabata sigui Mi den desierto,#Éksodo 13:17-18; Numbernan 14:33-34; 32:13
e tera ei sin vegetashon.
3Israel, e tempu ei bo tabata di Mi so,
konsagrá na Mi manera promé produkto di mi kosecha;
tur esnan ku a tribi mishi ku bo, tabata kulpabel
i Mi a laga desgrasia baha riba nan.” ’
Asina SEÑOR a bisa.
4Pueblo di Yakob, tribunan di Israel, skucha e palabranan 5ku SEÑOR ta bisa boso:
‘Akaso un dia boso antepasadonan a yega di deskubrí algu malu den Mi?
Pakiko nan a hala leu for di Mi antó?
Nan tabata kore tras di diosnan ku no bal nada
i nan mes a bira un pueblo sin balor.
6Nan no a puntra nan mes: “Unda SEÑOR a keda?
E SEÑOR ku a saka nos for di Egipto,
ku a guia nos pasa desierto,
e pais ei sin awa, kòrtá pa abismonan,
un teritorio asina seku i peligroso,
ku niun hende no ta krus'é ni bib'aden.”#Deuteronomio 8:2-16
7M'a hiba boso un pais fértil
pa boso por a gosa di tur su fruta- i bon produktonan,
pero boso n' yega
ku ata boso a profaná e tera;
mi mes propiedat a para bira repugnante pa Mi.
8Saserdotenan no a puntra nan mes: “Unda SEÑOR a keda?”
Nan ta eksperto den lei ma no a siña konosé Mi a fondo.
E lidernan di pueblo a kibra tur relashon ku Mi,
e profetanan tabata papia na nòmber di Baal,
nan tabata kore tras di diosnan ku no por hasi nada pa nan.
Keho kontra Israel
9P'esei Ami, SEÑOR, mester bolbe akusá boso
i tambe duna keho kontra boso desendientenan.
10Krusa laman i bai wèst, e isla di Chipre,
i wak rònt.
O manda bo embahadornan parti ost, e tribu di Kedar,
i investigá a fondo
pa weta si un kos asina a yega di sosodé ántes.
11Akaso un pueblo a yega di kambia su diosnan?#Salmo 106:20; Romanonan 1:23
Anto ni dios nan no ta!
Pero mi pueblo sí a kambia Mi
pa diosnan ku no por yuda nan ku nada;
anto ta e mes pueblo akí a yega di mira mi gloria.
12Shelu, keda babuká,’
SEÑOR ta bisa,
‘tembla, sí, paralisá di miedu!
13Mi pueblo ta dòbel kulpabel:
nan a bandoná Mi,
Ami, e fuente di awa bibu,#Huan 4:10-14; 7:37-38
i nan a traha renbak, yen di sker,
renbak, ku no ta wanta awa.’
Konsekuensianan di infieldat di Israel
14SEÑOR ta bisa:
‘Akaso Israel ta katibu?
Pió ainda, katibu for di nasementu?#2:14 katibu di nasementu: ku no por a haña libertat
Kon bini antó ku el a kai den gara di otro pueblo?
15Nan ta gruñ'é i grit'é manera leon hambrá.
Nan a hasi su pais un lugá desolá,
su siudatnan ta destruí
i niun alma n' ta biba einan mas.
16Sí, asta hende di Memfis i Tagpanhes
ta bin pela bo chinu.#2:16 pela bo chinu; otro posibel tradukshon: kibra bo kráneo
17No t'abo mes a pidi desgrasia pa bo kurpa,
bandonando Mi?
Ami, SEÑOR bo Dios,
ker a kana bo dilanti pa guia bo,
pero abo a bira lomba pa Mi.
18Tantu bal bo bai Egipto pa bebe awa di Nilo,#Isaías 30:1-3
tantu bal bo bai Asiria pa bebe awa di Eufrat.
19Bo propio krímen ta bira bo desgrasia,
bo infieldat na Mi, bo kondenashon.
Lo bo realisá, kon malu, kon marga ta
ora bo bira lomba pa SEÑOR, bo Dios,
i pèrdè rèspèt pa Mi.’
Asina SEÑOR, Dios Soberano ta bisa.
Israel, muhé kabes habrí i infiel
20SEÑOR Dios ta bisa:
‘Israel, pa basta tempu kaba bo ker a kibra e yugo i soga
ku Mi a usa pa tene bo dominá;
i bo a bisa: “Mi ke mi libertat!”
Sí, riba tur seritu altu
i bou di kada palu bèrdè
bo a kai drumi na bo patarata grandesa
manera un prostituta.#2:20 bo…prostituta: profetanan tabata yama adorashon di diosnan falsu: prostitushon. Hopi be adorashon di diosnan kanaanita tabata tuma lugá huntu ku prostitushon sagrado, pasobra nan tabata pensa ku esei tabata un medio pa optené fertilidat di famia i di bestia.
21Sinembargo Ami a planta bo
manera mata di wendrùif,
un stèk di e mihó kalidat.#Isaías 5:1-7; Lukas 13:6-9
Kon bini antó bo a kambia asina tantu
i bira un mata degenerá i sin balor?
22Ni maske bo hunta bo kurpa ku soda gròf
i baña ku hopi habon,
Mi ta keda mira mancha di bo kulpa tòg.
23Kon bo ta tribi bisa: “Mi no a hasi nada impuru.
Mi no a sigui kulto di Baalnan.”
Wak kon bo ta komportá den e vaye;#2:23 e vaye: probablemente Vaye di Hinom na parti sur di Herusalèm, kaminda nan tabata hasi sakrifisionan ku mucha
atmití loke bo a hasi.
Bo ta kore pariba pabou,
pa bo kuenta manera kamel lops.
24Bo parse buriku muhé di mondi, kustumbrá ku desierto:
su pashon ta pon'é hisa nanishi hole kada brisa.
Ora su kayente subi, no tin nada pa want'é.
E machu ku ker e no tin mashá trabou;
fásilmente por lokalis'é, ora e ta lops.#Hoséas 2:5; 4:12-14
25Ademas Mi a spièrta bo di antemano:
“Israel, no kore keda lenga afó,
bo garganta por seka di tantu kareda.”
Pero bo a rospondé: “Mi n' tin kunes.
Mi stima e diosnan straño ei.
Mi mester bai nan tras.” ’
Dios no t'ei pa yena buraku
26SEÑOR ta bisa:
‘Meskos ku un ladron ta pasa bèrgwensa ora nan gar'é,
asina boso tambe, israelitanan, lo pasa bèrgwensa,
huntu ku boso rei-, ofisial-, saserdote- i profetanan,
27pasobra boso ta bisa pida palu:#2:27 pida palu: probablemente e pilá di palu sagrado, mirá komo un dios femenino
“Abo ta mi tata”,
i pida piedra:#2:27 pida piedra: probablemente e pilá di piedra sagrado, mirá komo e dios maskulino Baal “T'abo a pari mi”.
Na lugá di bira kara pa Mi,
boso a bira lomba pa Mi.
Pero ora boso ta den problema,
anto e ora ei sí boso ta grita: “Bin yuda nos!”
28Unda boso diosnan a keda awó?
Boso no a traha boso mes diosnan?
Laga nan solushoná boso problema antó.#Deuteronomio 32:37-38
Hendenan di Huda, boso tin mes tantu dios ku siudat!’
Huda a lubidá su Dios, e ta haña loke e meresé
29‘Boso no tin derecho di duna keho kontra Mi,
pasobra boso mes a lanta kontra Mi,’
SEÑOR ta bisa.
30‘Mi a kastigá boso yu 'i teranan,
pero tantu bal,
boso no a siña nada;
manera leon feros boso spadanan a habraká e profetanan
ku Mi a manda pa boso.’#1 Reinan 19:10; Mateo 23:37
31Esnan ku tende e palabranan akí,
laga nan skucha ku atenshon
loke SEÑOR ta bisa:
‘Akaso M'a bira spantoso manera un desierto
o manera un pais tapá ku skuridat denso?
Ai mi pueblo, di kon boso ta bisa antó:
“Nos ke nos libertat,
nos no ta bini bèk serka Bo mas”?
32Akaso un mucha muhé ta lubidá su adornonan,
un brùit su bistí di brùit?
Nò, nunka!
Pero boso, mi pueblo, boso sí a lubidá Mi,
ya pa basta aña kaba.
33Huda, bo sa bon bon ki' hasi pa haña hòmber.
Bo tin diploma di mal ehèmpel!#2:33 Huda…ehèmpel; otro posibel tradukshon: Bo ta asina baké den mal ehèmpel, ku asta prostitutanan mes por tuma lès serka bo
34Bo paña ta tur na sanger,
pasobra bo a sali bai mata hende pober inosente
i no pasobra bo a haña nan ta kibra drenta den bo kas.
Pa kolmo bo ta pretendé tambe:
35“Mi ta inosente.
SEÑOR no ta rabiá ku mi mas.”
Pero awor hustamente pasobra bo ta bisa: “Mi no a hasi nada malu”,
p'esei mes Mi ta kuminsá un kaso kontra bo.’
Niun aliansa ku pueblonan strañero no por salba Huda
36‘Pakiko bo ta kore bai bini pa loko,
buskando yudansa aki aya!
Egipto lo desapuntá bo
meskos ku Asiria.
37Lo bo bini bèk djei tur derotá,
ku man na kabes.
Pasobra Ami, SEÑOR,
a rechasá tur esnan ku b'a konfia,
lo bo no tin niun sorto di probecho di nan.’
Currently Selected:
Yeremías 2: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013