Huesnan 3
3
E pueblonan ku a keda Kanaan
1Asina ta ku SEÑOR a laga algun pueblo keda den e pais pa E pone e israelitanan, ku no a pasa den e gueranan pa konkistá Kanaan, na prueba. 2El a laga nan djis pa e generashonnan di Israel ku nunka a bringa den guera, haña eksperensia. 3Esnan ku a keda den e pais tabata e sinku hefenan di siudat filisteo, tur kanaanita, sidonita i hiwita ku tabata biba for di e seru di Baal-Hermon te na e kaminda pa bai Hamat.#Yozue 13:2-6 4SEÑOR a usa nan pa wak si e israelitanan tabata obedesé e mandamentunan ku El a duna nan antepasadonan pa medio di Moises. 5Asina e israelitanan a keda biba huntu ku e kanaanita-, hetita-, amorita-, perizita-, hiwita- i yebusitanan. 6E israelitanan a kasa ku yu muhé di e pueblonan ei i a laga nan yu muhénan kasa ku yu hòmbernan di e pueblonan ei. E israelitanan a sirbi dios falsu di e pueblonan ei.
Otniel
7E israelitanan tabata hasi loke ta malu den bista di SEÑOR. Nan tabata lubidá SEÑOR, nan Dios, i tabata sirbi Baal i Ashera. 8E ora ei SEÑOR a haña rabia riba Israel: El a entregá e israelitanan den poder di Kushan-Rishataim, rei di Aram-Naharaim, i e israelitanan a sirbi Kushan-Rishataim ocho aña. 9Despues nan a sklama na SEÑOR i El a laga un hende sali dilanti pa salba nan. E salbadó tabata Otniel,#Huesnan 1:12-13 yu di Kenaz, i ruman mas chikí di Kaleb. 10Spiritu di SEÑOR a yena Otniel ku a bira hues di Israel. El a bai guera i SEÑOR a entregá Kushan-Rishataim, rei di Aram, den su poder. 11Despues di esei a reina pas den e pais durante kuarenta aña.
Ehud ta libra Israel
12Despues di morto di Otniel e israelitanan a bolbe hasi loke ta malu den bista di SEÑOR. P'esei SEÑOR a laga Eglon, rei di Moab, dominá Israel. 13Eglon a uni ku e amonitanan i e amalekitanan. Nan a ataká i derotá Israel. Eglon a konkistá Yériko, e Siudat di Palma. 14Diesocho aña largu e israelitanan mester a sirbi Eglon, rei di Moab. 15Despues nan a sklama na SEÑOR i El a laga un hende sali dilanti pa salba nan. E salbador tabata e slengu Ehud, yu di e benhaminita Guera. Semper e israelitanan tabata manda Ehud hiba e belasting ku nan mester a entregá Eglon, rei di Moab.
16Ehud a traha un spada di kasi mei meter largu i a sleip e tur dos banda. El a mar'é na banda drechi, bou di su paña. 17Despues el a hiba e belasting pa Eglon, rei di Moab. Eglon awor tabata un hòmber mashá gordo. 18-19Ora Ehud a kaba di entregá e belasting, e i e hendenan ku a yud'é a bai bèk. Pero ora nan a yega na e imágennan trahá di piedra, ku tabatin serka di Guilgal, Ehud a bisa e hendenan: ‘Sigui numa.’ E mes a bira bai bèk serka Eglon i a bis'é: ‘Mahestat, mi tin un mensahe sekreto pa bo!’ Rei a ordená: ‘Silensio!’ Tur su sirbidónan a keda ketu i a sali bai afó. 20Despues Ehud a drenta serka rei. Rei tabata sintá den e kuartu fresku ku e tabatin pa su so, den e parti ariba di e kas. Ehud a bai serka rei i a bis'é: ‘Ta un mensahe di Dios mi tin pa bo.’ Ora Eglon a tende esaki, el a lanta for di su trono. 21Ku man robes Ehud a saka e spada for di su banda drechi i a hink'é ku asina tantu forsa den barika di Eglon 22-23ku e kabu di e spada tambe a drenta bai aden. E vèt a tapa e kabu pasobra Ehud no a saka e spada bèk. Promé ku Ehud a sali di patras, el a sera e porta parti paden na yabi i a sali for di palasio, via e adrei. 24E no a kaba di sali ku ata e sirbidónan di Eglon a yega. Ora nan a ripará ku porta di e kamber fresku tabata na yabi, nan a pensa ku rei lo tabata sintá riba tualèt. 25Nan a warda te blikia, pero rei no tabatin fin di habri porta. Nan a buska yabi, habri e porta, i haña nan rei drumí abou na suela, morto.
26Miéntras nan tabata tete, Ehud a hui. El a pasa e imágennan serka di Guilgal i a yega Seíra sano i salvo. 27Ora el a yega aya, el a laga nan supla kachu den e serunan di Efraim. E israelitanan a sali for di e serunan i bini serka dje. 28El a tuma mando i bisa nan: ‘Sigui mi, pasobra SEÑOR ta entregá boso enemigu, e moabitanan, den boso poder.’ Nan a baha bai tras di Ehud i a konkistá e lugánan di krusa Yordan pa bai Moab; nan no a laga ningun hende krusa e riu. 29E tempu ei nan a mata mas o ménos 10.000 moabita. Tur tabata sòldánan fuerte i wapu; ni un no a skapa. 30E dia ei e israelitanan a derotá Moab. Despues a reina pas den e region durante ochenta aña.
31E siguiente hues tabata Shamgar, yu di Anat.#Huesnan 5:6 Ku un bion el a mata 600 filisteo. Asin'ei e tambe a salba Israel.
Currently Selected:
Huesnan 3: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
