Isaías 56
56
Dios no ta ekskluí niun hende
1SEÑOR ta bisa:
‘Hasi loke ta hustu,
respetá derecho.
Djis akí Mi ta bin salba boso,
e ora ei boso lo mira
ku Mi ta kumpli ku mi promesanan.
2Felis e hende ku ta hasi loke ta hustu
i no ta keda sin respetá derecho,
e hende ku no ta profaná sabat#Éksodo 20:8-11; Isaías 58:13-14; Yeremías 17:19-27 ku trabou
i no ta mete ku maldat.’
3Un strañero ku djòin pueblo di Dios no mester bisa:
‘SEÑOR ta kore ku mi sigur fo'i su pueblo.’
I un hòmber kapá no mester pensa:
‘Mi no ta nada mas ku palu seku.’
4Pasobra t'esaki SEÑOR ta bisa:
‘Si un hòmber kapá tene mi sabat,
hasi loke ta na mi agrado ku amor
i aten'é na e aliansa entre Ami ku e pueblo,
5e ta haña un plachi ku su nòmber grabá ariba
parti paden dje murayanan di mi tèmpel.
Esei lo mantené su rekuerdo mas bibu
ku kualke yu hòmber o muhé por hasi.
Asin'ei lo Mi perkurá pa su nòmber nunka no pasa pa olvido.#Sabiduria 3:14
6I si strañeronan djòin mi pueblo
pa honra Mi i stima Mi
i bira mi sirbidónan,
Mi ta primintí:
Si nan no profaná sabat ku trabou
i si nan atené nan n'e aliansa ku Mi tin ku mi pueblo,
7Mi ta laga nan bini mi seru sagrado.
Den tèmpel kaminda nan ta bin resa na Mi,
Mi ta yena nan kurason ku legria.
Mi ta aseptá ku gustu
e sakrifisionan di kandela i vegetal
ku nan ofresé riba mi altá.
Pasobra mi tèmpel lo yama:
“Kas di orashon pa tur nashon”.’#Mateo 21:13; Marko 11:17; Lukas 19:46
8Skucha palabra di SEÑOR Dios,
ku ta trese e yunan plamá di Israel bèk:
‘Mi ta hala mas hende trese aserka,
Mi ta laga nan djòin e otronan.’#Isaías 60:1-14
Keho kontra lidernan iresponsabel
9SEÑOR ta bisa lo siguiente:
‘Ban mira, pueblonan,
bula riba mi pueblo manera bestia di mondi riba nan víktima,
habraká nan manera bestia feros.
10E hendenan ku mester kuida e pueblo ta siegu,
nan no ta ripará nada.
Nan ta kachó muda ku ta warda kas,
ni grita nan no por grita;
nan ta blo drumi soña i kabishá.
11Nan ta kachó haragan tambe,
nunka nan no tin basta.
Anto ta nan ta lider di pueblo!
Nan no tin niun klase di komprondementu;#Ezekiel 34:2
tur ta kohe nan mes kaminda,
tur ta buska nan propio probecho.
12“Ban, shonnan,” nan kada un ta bisa,
“Un beter ámi t'ei dal,
ban ranka un kañá
i ora nos kurpa ta bon zetá,
nos ta laga sobrá pa mañan.” ’
Currently Selected:
Isaías 56: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
