Isaías 18
18
E profeta ta atvertí e embahadornan di Etiopia
1Ai di e pais ku botonan rápido,#18:1 ku botonan rápido: segun vershon griego; e teksto hebreo no ta kla, kisas: ku ta zona di insektonan
situá na riunan di Etiopia.#Sofonías 2:12
2E pais ei ta manda su embahadornan
nabegá riba awa,
baha riu den boto di kabana.
‘Bai bèk, mensaheronan rápido,
bai boso pueblo bèk!
E pueblo ku su hendenan di estatura altu
i kútis lombrá,
e pueblo ku ta plama miedu tur kaminda,
e pueblo kurpa ankrá i dominadó,
bai boso tera bèk,
e tera kòrtá pa riu.
3I boso, habitantenan di mundu,
boso ku ta yena e paisnan,
ora lanta un master riba seru,
hisa boso wowo n'e.
I ora e señal di kachu zona,
skuch'é.
4Pasobra SEÑOR a bisa mi lo siguiente:
“For di kaminda Mi ta biba
Mi ta sinta ketu mira, sin move,
manera kalor ku ta kologá mèrdia,
manera neblina den tempu kayente di kosecha.
5Pasobra ora e tempu akí yega,
mata kaba di floria
i kònòpi kambia bira fruta,
ta snui e rankanan
i kibra e stèkinan ku ta krese pa loko bent'afó.
6Asina tambe lo laga kadaver dje enemigu bentá
pa warawara i bestia di mondi,
ku ta biba di nan,
den tempu friu i di kalor.” ’
7Lo yega un tempu
ku e pueblo akí di hende di estatura altu
i kútis lombrá,
ku ta plama miedu tur kaminda,
ku tin kurpa ankrá i ta dominadó,
lo yega un tempu
ku e pais akí kòrtá pa riu,
lo trese ofrendanan pa SEÑOR soberano.
Nan lo subi seru di Sion,
n'e lugá kaminda ta ador'É.
Currently Selected:
Isaías 18: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
