Isaías 13
13
Dianan di Babilonia ta kontá
1Isaías, yu di Amoz, a risibí e mensahe ku Dios ta bai baha pisá riba Babilonia.#Isaías 47:1-15; Yeremías 50:1—51:64
2SEÑOR a bisa:
‘Lanta un master riba kabes pelá di un seru,
atvertí e sòldánan na bos altu,
duna nan un seña ku man
pa nan mèldu n'e portanan
kaminda e komandantenan ta warda.
3T'Ami mes a duna e trupanan konsagrá na Mi, un òrdu;
t'Ami a yama mi sòldánan skohí,
esunnan ku ta grita na mi honor,
pa kumpli ku mi vengansa.’
4Tende,
ata zonido di pia den serunan
manera di un laman di hende,
ata boroto di reinonan,
di pueblonan ku ya ta sera fila;
SEÑOR soberano ta inspektá su ehérsito.
5Ta for di un tera leu nan ta ranka bini,
for di un lugá na rant di horizonte.
Nan a bini pa destruí henter e pais:
instrumento di SEÑOR su furia nan ta.
6Dal gritu di lamento,
pasobra dia di SEÑOR su kastigu ta aserkando.
E dia ta bini ku forsa desastroso
di parti di Dios Todopoderoso.#Ezekiel 30:2-3; Yoel 1:15; Sofonías 1:14-18; Malakías 3:2; Revelashon 6:17
7P'esei man di hende ta pèrdè forsa,
nan kurason ta kai.
8Sobresaltá nan ta keda,
kram ku doló ta dal nan
manera muhé ku ta trose den parto.
Un ta drei wak otro, morto spantá,
ku kara kòrá di agitashon.
9Ata dia di SEÑOR su kastigu ta aserkando,
dia ku SEÑOR ta drenta un furia sin piedat
i ku rabia ardiente E ta destruí e pais,
hasié un desierto i kaba ku tur kulpabel.
10Streanan i konstelashonnan di shelu
ta stòp di duna klaridat,
solo ta sali skur
i luna lo no bria mas.#Ezekiel 32:7; Mateo 24:29; Marko 13:24-25; Lukas 21:25; Revelashon 6:12-13; 8:12
11SEÑOR ta bisa:
‘Mi ta bai regla kuenta ku maldat di mundu
i ku krímen di malbadonan.
Mi ta bai kibra arogansia di sobèrbènan
i humiliá orguyo di tiranonan.
12Mi ta bai hasi hende mas skars ku oro,
e oro puru di Ofir.
13Ora e dia di mi furia yega
i rabia drenta Ami, SEÑOR soberano,
lo Mi pone shelu sakudí,
tera lo tembla i lòs for di su fundeshi.
14Manera biná ta hui pa yagdó,
manera karné ta desampará ora n' tin wardadó,
asina strañeronan den Bábel lo bati huida:
kada ken lo bolbe su mes pueblo,
kada ken lo hui bai su mes pais.#Yeremías 50:16
15Ken ku enemigu haña ta hui
l'e hinka mata.
Ken ku enemigu gara
lo muri morto di spada.
16Lo plèchè nan yunan den nan bista,
lo sakia nan kasnan,
lo violá nan muhénan.
17Mi ta bai instigá habitantenan di Media kontra nan,
hende ku no ta interesá den plata
i ku no ta laga oro yena nan wowo.
18Nan flechanan ta tumba hóbennan.
Nan no konosé piedat ni pa yu resien nasí,
ni nan no ta respetá mucha.
19Babilonia, e pèrla di tur reino,
prenda di kaldeonan orguyoso,
lo keda manera Sódoma i Gomora
despues ku Dios a destruí nan.#Génesis 19:24
20Babilonia lo no ta habitá nunka mas,#Yeremías 50:39-40
ningun generashon lo no pone su bibá aya.
Arabirnan lo no lanta nan tènt,
ningun wardadó lo no laga su bestianan sosegá aya banda.
21Bestia salbahe lo biba ei,
kasnan lo ta yen di palabrua,
abestrus lo hospedá aya,
spiritunan di mondi lo belenkiá rònt.#Revelashon 18:2
22Hienanan lo yora den fòrtinan bandoná,
chakalnan den su palasionan luhoso.
Babilonia su ora a yega,
su dianan ta kontá.’
Currently Selected:
Isaías 13: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
