Kolosensenan 2
2
1Boso mester sa kon duru mi ta lucha pa boso, pa e hendenan na Laodisea#Revelashon 3:14-22 i pa hopi otro hende ku nunka no a yega di mira mi personalmente. 2Mi ta hasi esei pa nan haña kurashi i keda íntimamente uní den amor. Asina nan por risibí komprondementu profundo i kompleto, ku ta hiba nan na konosementu di e plan skondí di Dios, ku ta Kristu mes.#2:2 ku ta Kristu mes: tin manuskrito ku no tin e palabranan akí 3Anto den Kristu tur e tesoronan di sabiduria i konosementu ta skondí. 4Mi ta bisa esaki pa evitá ku hende ta gaña boso ku argumento bunita. 5Ounke mi no ta personalmente serka boso, den spiritu sí mi t'ei, i mi ta gosa di mira ku kos ta bai na òrdu i ku boso ta keda firme den boso fe den Kristu.
Muri i lanta for di morto, huntu ku Kristu
6Ya ku boso a aseptá Kristu-Hesus komo boso Señor, biba den union kunÉ. 7Sòru pa boso ta ankrá profundamente den djE i laga E ta fundeshi di boso bida. Keda firme den e fe ku a siña boso i laga palabra di gradisimentu na Dios brota sali for di boso boka. 8Tene kuidou pa niun hende no sedusí boso ku teoria bashí i engañoso ku ta basá riba tradishon di hende. E teorianan ei ta bini di e podernan spiritual ku ta dominá mundu i no di Kristu.#Galatanan 4:3,9 9Pasobra Dios su naturalesa dibino ta kompletamente presente den Kristu su kurpa físiko 10i komo boso ta uní ku Kristu, boso ta tuma parti kompletamente na loke ta yen'É. E ta riba tur outoridat i poder spiritual.
11Den union ku Kristu boso a keda sirkunsidá, no na man di hende, pero pa medio di Kristu ku a kita boso naturalesa pekaminoso for di boso. 12Ora a batisá boso, a dera boso huntu kunÉ i den e boutismo ei mes tambe, boso a lanta for di morto huntu kunÉ,#Romanonan 6:4 pasobra boso a kere den poder di Dios, ku a lant'É for di morto. 13Boso tabata spiritualmente morto pa motibu di boso desobediensia i boso bida komo hende no hudiu sin Lei di Moises, pero Dios a rebibá boso huntu ku Kristu.#Efesionan 2:1-5 El a pordoná boso tur boso#2:13 boso tur boso; otro manuskrito tin: nos tur nos desobediensia. 14El a kanselá e dokumento di nos debe ku su stipulashonnan, ku tabata akusá nos. El a kita e dokumento ei for di kaminda, ora El a klab'é na krus.#Efesionan 2:15 15Dios a desarmá tur outoridat i poder spiritual i pa medio di Kristu El a pone nan kara públikamente na bèrgwensa dor di hiba nan komo prezu den su marcha di viktoria.
16P'esei antó, no laga niun hende kritiká boso a base di loke boso ta kome i bebe, òf pasobra boso ta selebrá e fiestanan religioso, fiesta di luna nobo òf dia di sabat.#Romanonan 14:1-6 17E kosnan ei no ta nada mas ku sombra di e kosnan ku tin ku bini; nan ta djis representashon di e realidat ku tin den Kristu. 18No preokupá tampoko antó, ora sierto hende kondená boso, hende ku ta kana broma ku nan ta humiliá nan mes, ku nan ta adorá angel i mira vishon ekstátiko. Hende asina ta broma ku un manera di pensa humano, pero e no tin niun motibu pa hasi esei! 19E no ta atené su mes na Kristu, kabes di e kurpa. Kristu ta hasi ku henter e kurpa, sostené i wantá huntu pa e kabuyanan di múskulo i e skarnirnan di wesu, ta krese manera Dios ke.#Efesionan 1:22; 4:15-16
Bida nobo den Kristu
20Boso a muri huntu ku Kristu#Romanonan 6:6-11; Galatanan 2:19-20 i keda librá di e podernan spiritual ku ta dominá mundu. Pakiko antó boso ta obedesé sierto regla komo si fuera boso ta pertenesé na e mundu akí ainda? Regla manera: 21‘no mishi ku esaki’, ‘no kome esei’ i ‘laga esaya para’. 22Tur e reglanan akí tin ke ber ku kos ku ta kaba na nada unabes usa nan; nan no ta nada mas ku regla i siñansa di hende! 23E reglanan ei, ku nan sistema ku hende a inventá pa adorá Dios, práktika di humildat falsu i trato severo di kurpa, por parse di ta basá riba sabiduria. Pero en realidat niun di nan no ta sirbi pa dominá deseo pekaminoso.
Currently Selected:
Kolosensenan 2: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013