2 Reinan 8
8
Rei ta yuda e señora di Shunem
1Eliseo a konsehá mama di e mucha hòmber ku el a rebibá:#2 Reinan 4:8-37 ‘Bai buska un lugá den estranheria, kaminda abo i bo famia por biba, pasobra SEÑOR a manda un hamber grandi den e pais. E hamber a kuminsá kaba i lo e dura shete aña.’ 2E ora ei e señora a hasi manera e hòmber di Dios a bisa. E ku su famia a bai biba shete aña den pais di e filisteonan.
3Despues ku e shete añanan a pasa, e señora a bini bèk i el a bai buska yudansa di rei pa e haña su kas i su kunuku bèk. 4Nèt rei tabata papia ku Guehazi, sirbidó di e hòmber di Dios, i a bis'é: ‘Konta mi tur e kosnan grandi ku Eliseo a hasi.’ 5Miéntras Guehazi tabata konta rei ku Eliseo a yega di rebibá un mucha hòmber, mama di e mucha a bin pidi yudansa di rei pa e haña su kas i su kunuku bèk. E ora ei Guehazi a bisa: ‘Shon rei, ata e muhé i ata e yu ku Eliseo a rebibá.’ 6Rei a interogá e muhé i e muhé a konta su historia. Rei a manda un funshonario di korte bai huntu ku e muhé i sòru pa e muhé haña tur su propiedatnan bèk i tambe tur loke su kunuku a produsí for di dia ku el a sali for di e pais.
Eliseo na Damasko
7Un dia Eliseo a yega Damasko, nèt tempu Bèn-Hadad, rei di Aram, tabata malu. Ora rei a tende ku e hòmber di Dios a yega, 8el a bisa Hazael: ‘Bai ku un regalo serka e hòmber di Dios i pidié konsultá SEÑOR, pa mi sa ku mi ta kura di e malesa akí.’
9Hazael a bai serka e profeta ku kuarenta kamel kargá ku e mihó produktonan di Damasko. Yen di rèspèt el a para su dilanti i bis'é: ‘Rei di Aram, Bèn-Hadad, ku ta konsiderá bo komo su tata, a manda mi puntra bo, si e lo kura di su malesa.’ 10Eliseo a kontestá: ‘Bai bis'é ku e ta kura sigur, pero SEÑOR a laga mi mira ku e ta muri sigur.’ 11Despues e hòmber di Dios su kara a kambia i el a bira asina emoshoná ku el a kuminsá yora. 12Hazael a puntr'é: ‘Di kon mi shon ta yora?’ El a kontestá: ‘Pasobra mi sa kuantu daño bo ta bai hasi e israelitanan. Bo ta bai kima nan fòrtinan, mata nan hòmbernan hóben ku spada, plèchè nan yunan chikitu, mata i habri barika di nan muhénan na estado.’ 13Hazael a kontestá: ‘Pero ta ken mi ta! Bo ta kere un kachó barata manera mi por hasi un kos grandi asina?’ Eliseo a kontestá: ‘SEÑOR a laga mi mira ku bo ta bira rei di Aram.’#1 Reinan 19:15
14Hazael a bai lag'é i a bolbe serka su rei, ku a puntr'é: ‘Kiko Eliseo a bisa bo?’ Hazael a kontestá: ‘El a bisa mi ku bo ta kura sigur.’ 15E siguiente dia Hazael a kohe un paña pap'é ku awa i pon'é riba kara di rei. E ora ei rei a muri. Hazael a siguié komo rei.
Yoram, rei di Huda
(2 Krónikanan 21:1-20)
16Yoram, yu di Yoshafat, a kuminsá goberná na Huda, miéntras su tata tabata rei ainda. Esaki a sosodé den e di sinku aña ku Yoram, yu di Ahab, tabata rei di Israel. 17Yoram tabatin trintidos aña dia el a bira rei; el a goberná ocho aña na Herusalèm. 18El a sigui ehèmpel di reinan di Israel, spesialmente ehèmpel di kas real di Ahab komo ku e tabata kasá ku un yu di Ahab. El a hasi loke ta malu den bista di SEÑOR. 19Pero pa kara di su sirbidó David, SEÑOR no ker a destruí Huda, pasobra El a primintí David ku semper lo tene su rekuerdo bibu dor di laga un di su desendientenan siguié riba trono.#1 Reinan 11:36
20Durante gobernashon di Yoram e edomitanan a lanta kontra dominio di Huda#Génesis 27:40 i a nombra un rei di nan mes. 21E ora ei Yoram a bai Sair ku tur su garoshinan di guera. Den anochi el a ataká i derotá e edomitanan ku tabata rondon'é i su komandantenan di garoshi. E edomitanan a hui bai kas. 22Tòg Edom a logra bira independiente di Huda, i a keda liber te dia djawe. Den e mesun tempu ei e siudat Libna tambe a lanta i a bira independiente.
23Sobrá historia di Yoram i tur loke el a hasi, ta skibí den buki di krónika di reinan di Huda. 24Yoram a bai sosegá serka su antepasadonan den Siudat di David. Su yu Ahazías a siguié komo rei.
Ahazías, rei di Huda
(2 Krónikanan 22:1-6)
25Ahazías, yu di Yoram, a bira rei di Huda den e di diesdos aña ku Yoram, yu di Ahab, tabata rei di Israel. 26Su mama tabata yama Atalia. Ahazías tabatin bintidos aña dia el a bira rei. El a goberná un aña so na Herusalèm. Komo su mama Atalia tabata ñetu di Omri, rei di Israel, Ahazías tabata famia di Ahab. 27El a sigui den mes kaminda ku Ahab i su kas real, i hasi loke ta malu den bista di SEÑOR.
28Ahazías a sera ku Yoram, yu di Ahab, pa bai bringa na Ramot-Guilead kontra Hazael, rei di Aram. Ma e arameonan a heridá Yoram. 29Rei Yoram a bai Yizreel bèk pa e kura di e heridanan ku e arameonan a kous'é na Ramot den e bataya kontra Hazael, rei di Aram. Durante su enfermedat na Yizreel, el a haña bishita di Ahazías, yu di Yoram, rei di Huda.
Currently Selected:
2 Reinan 8: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
