2 Reinan 20
20
Enfermedat i kura di Ezekías
(2 Krónikanan 32:24-26; Isaías 38:1-8)
1Den e tempu ei Ezekías a bira malu pa muri. Profeta Isaías, yu di Amoz, a bai serka dje i bis'é: ‘Asina SEÑOR ta bisa: “Duna bo famia bo último instrukshonnan, pasobra bo dianan ta kontá. Bo no ta bira bon mas.” ’
2Ezekías a bira kara pa muraya i a resa na SEÑOR: 3‘Ai SEÑOR, kòrda ku mi a sirbi Bo fielmente i di henter mi kurason i ku mi a hasi loke ta bon den bo bista.’ Despues el a grita yora.
4Isaías no a kaba di krusa e patio sentral di palasio ku el a haña un palabra di SEÑOR: 5‘Bai bèk i partisipá Ezekías, rei di mi pueblo, ku SEÑOR, Dios di su antepasado David, ta bisa: “Mi a skucha bo orashon i mira bo lágrimanan; p'esei Mi ta kura bo i denter di tres dia bo por bai tèmpel di SEÑOR. 6Mi ta duna bo diessinku aña mas di bida. Ademas Mi ta salba abo i e siudat akí for di gara di rei di Asiria. Mi ta protegé e siudat akí pa mi mes honor i pa kara di mi sirbidó David.” ’ 7Isaías a bisa: ‘Trese un kataplan di figo pa mi.’ Nan a hiba e kataplan, pon'é riba e postema i Ezekías a kura.
8Promé ku Ezekías a bira bon, el a puntra Isaías: ‘Kiko ta e señal ku SEÑOR ta kura mi i ku denter di tres dia mi por bai tèmpel atrobe?’ 9E ora ei Isaías a rospondé: ‘SEÑOR ta duna bo un señal pa mustra bo ku E ta tene su palabra. Bo ke pa e sombra riba e trapi di Ahas hala bai dies tret mas dilanti òf bin dies tret mas patras?’ 10Ezekías a kontestá: ‘Hala bai dies tret dilanti no t'asina difísil, mihó e sombra hala bin dies tret patras.’ 11E ora ei Isaías a resa na SEÑOR i SEÑOR a laga e sombra ku ta marka posishon di solo riba e trapi di Ahas, hala bin dies tret patras.
Ezekías ta risibí un delegashon di Babilonia
(2 Krónikanan 32:27-33; Isaías 39:1-8)
12Den e tempu ei rei Merodak-Baladan, yu di Baladan, rei di Babilonia, a manda su mensaheronan ku karta i regalo serka Ezekías, komo el a tende ku el a kaba di lanta for di kama di malu. 13Ezekías a skucha nan i a laga nan weta tur su kambernan di warda tesoro, su plata, oro, perfume i zeta kostoso, henter su depósito di arma i tur loke e tabatin wardá den su depósitonan. No tabatin nada den su palasio ni den su reino, ku e no a mustra nan.
14E ora ei profeta Isaías a bai serka rei Ezekías i a puntr'é: ‘Kiko e hòmbernan ei a bin papia ku bo i di unda nan a bini?’ Ezekías a kontestá: ‘Nan a bini di un pais mashá leu, di Babilonia.’ 15Isaías a puntra: ‘Kiko nan a weta den bo palasio?’ Ezekías a kontestá: ‘Nan a weta tur kos ku tin den mi palasio; no tin nada den mi kambernan di warda tesoro, ku mi no a mustra nan.’
16Isaías a bisa Ezekías: ‘Skucha palabra di SEÑOR: 17“Tende un kos akí, ta yega un tempu, ku nan lo bai Babilonia ku tur loke tin den bo palasio, tur loke bo antepasadonan a spar te dia djawe. Nada lo no keda atras,#2 Reinan 24:13; 2 Krónikanan 36:10 SEÑOR ta bisa. 18Nan lo bai ku algun di bo desendientenan, bo mes sanger, Babilonia pa nan sirbi komo funshonario di korte na palasio di rei di Babilonia.” ’#2 Reinan 24:14-15; Deuteronomio 1:1-7 19Ezekías a pensa: ‘A lo ménos durante mi bida lo tin pas i seguridat.’ El a kontestá Isaías: ‘E mensahe di SEÑOR, ku bo a trese pa mi ta bon.’
20Sobrá historia di Ezekías, su hazañanan, kon el a traha e tanki di awa i e tùnel den baranka pa hiba awa siudat, ta skibí den buki di krónika di reinan di Huda.#Sirag 48:17-22 21Ezekías a bai sosegá i su yu Manase a siguié komo rei.
Currently Selected:
2 Reinan 20: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
