2 Reinan 12
12
Yoash, rei di Huda
(2 Krónikanan 24:1-27)
1Yoash tabatin shete aña dia el a bira rei. El a bira rei tempu Yehu tabatin shete aña rei i a goberná kuarenta aña na Herusalèm. Su mama tabata yama Sibia i tabata di Beer-Shèba. 2Yoash tabata hasi loke ta bon den bista di SEÑOR durante e tempu ku saserdote Yoyada tabata su maestro. 3Solamente e seritunan di sakrifisio no a disparsé; e pueblo a keda mata i kima bestia riba nan. 4Yoash a bisa e saserdotenan: ‘Tur e plaka di ofrenda ku nan trese tèmpel di SEÑOR, esta plaka bálido, sea ku ta loke ta stipulá ku kada hende mester paga#Éksodo 30:11-16 òf loke kada hende ta trese di su propio boluntat, 5tur e plaka ei e saserdotenan mag aseptá di e hendenan ku nan ta sirbi, pero un kos sí, nan mester drecha tur e partinan di tèmpel ku ta den mal estado.’
6Ma te ku e di bintitres aña di reinado di Yoash, ainda e saserdotenan no a drecha nada na e tèmpel. 7E ora ei rei Yoash a yama saserdote Yoyada i e sobrá saserdotenan i bisa nan: ‘Di kon boso no ta drecha e partinan di tèmpel ku ta den mal estado? For di awe padilanti boso no mag tene plaka di e hendenan ku boso ta sirbi, pero mester entreg'é pa drecha tèmpel.’ 8E saserdotenan a bai di akuerdo pa no risibí plaka mas di e pueblo, ya ku e ora ei nan no tabatin mester di drecha e tèmpel tampoko.
9Saserdote Yoyada a kohe un kaha, traha un skref den e tapadera i pon'é banda di altá na man drechi di entrada di tèmpel di SEÑOR. E saserdotenan ku tabata tene vigilansia einan tabata pone tur plaka ku e hendenan trese kas di SEÑOR aden. 10Kada be ku nan a ripará ku tabatin hopi plaka den e kaha, sekretario di rei i gransaserdote tabata bini i pone e plaka na stapel traha paki. 11Despues di pisa e plaka, nan tabata entreg'é na e kontratistanan ku tabata enkargá ku e trabounan na e tèmpel. Eseinan tabata paga e kapatasnan, e karpinténan, 12e mèslanan i e kapdó di piedra ku tabata traha na e tèmpel. Tambe nan tabata kumpra palu i piedra kòrtá i nan tabata paga pa tur otro gastu pa drechamentu di tèmpel di SEÑOR. 13No a usa e plaka, ofresé den tèmpel di SEÑOR, pa traha skalchi di plata, kuchú, kòmchi pa sprengu sanger, tròmpèt òf otro kos di uso di oro òf plata, 14pero a duna e kontratistanan e plaka solamente pa drecha tèmpel di SEÑOR. 15E kontratistanan ku tabata risibí e plaka pa paga trahadó no tabatin mester di duna kuenta i rason, pasobra nan tabata hende ku bo por a konfia. 16Plaka ku tabata drenta di sakrifisio di debe i di sakrifisio pa pordon di piká, no tabata destiná pa tèmpel di SEÑOR, esei tabata pa e saserdotenan.#Levítiko 7:7
17Den e tempu ei Hazael, rei di Aram, a bai ataká siudat Gat i a okup'é. Despues Hazael a prepará pa e sali bai ataká Herusalèm. 18Yoash, rei di Huda, a kohe tur e ofrendanan ku e mes i su antepasadonan, e reinan di Huda, esta Yoshafat, Yoram i Ahazías a konsagrá na SEÑOR, huntu ku tur e oro ku tabatin den e kambernan di tesoro di tèmpel i di palasio, manda pa rei Hazael di Aram. E ora ei Hazael a keda sin ataká Herusalèm.
19Sobrá historia di Yoash i tur loke el a hasi ta skibí den buki di krónika di reinan di Huda. 20Su funshonarionan di korte a traha un kòmplòt kontra dje i a mat'é na Bet-Milo, ora e tabata baha bai Sila. 21Tabata su sirbidónan Yozakar, yu di Shimat, i Yozabad, yu di Shomer, ku a dal e mata. Nan a der'é huntu ku su antepasadonan den Siudat di David. Amasías, yu di Yoash, a siguié komo rei.
Currently Selected:
2 Reinan 12: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
