1 Samuel 13
13
Desobediensia di Saul
1Saul tabatin trinta#13:1 trinta: segun algun manuskrito di e vershon griego. Hebreo no tin e sifra akí. aña dia el a bira rei. Ora el a goberná dos aña na Israel, 2el a skohe 3000 hòmber di Israel. Dos mil a keda serka dje na Mikmas i den e serunan di Betel, e otro 1000 a keda serka Yonatan na Guibea den teritorio di Benhamin. E sobrá hendenan Saul a manda kas bèk.
3Yonatan a kaba ku un pòst militar filisteo ku tabata na Gueba i e filisteonan a haña sa esaki. E ora ei Saul a manda nan supla kachu den henter e pais pa pone e hebreonan na altura di loke a pasa. 4Tur e israelitanan a haña sa ku Saul a kaba ku e pòst militar filisteo i ku e israelitanan a bira insoportabel pa e filisteonan. E ora ei Saul a yama pueblo pa reuní kuné na Guilgal. 5E filisteonan di nan banda a bini huntu pa bringa kontra e israelitanan. Nan tabatin 30.000 garoshi di guera, 6000 sòldá di kabayeria i un infanteria di un kantidat mes numeroso ku santu di laman. Nan a kohe kaminda pa Mikmas, na ost di Bet-Awèn, i aya nan a lanta nan kampamentu. 6Ora e israelitanan a haña nan den pèrtá grandi i nan ehérsito tabata den peliger, nan a buska kaminda di skonde den kueba-, spelònk- i klofnan, den roi- i posnan seku. 7Tambe tabatin hebreo ku a krusa Yordan te na region di Gad i di Guilead. Pero Saul tabata na Guilgal ainda i tur e hòmbernan ku a bai kuné tabata yen di miedu. 8Ei na Guilgal Saul a warda shete dia manera palabrá ku Samuel,#1 Samuel 10:8 ma Samuel no tabatin fin di yega i e hendenan pokopoko a kuminsá bai lag'é. 9E ora ei Saul a duna òrdu: ‘Trese e bestianan pa e sakrifisio di kandela i pa e sakrifisionan di pas pa mi.’ El a ofresé e sakrifisio di kandela. 10I nèt ora Saul a kaba di ofresé e sakrifisio di kandela Samuel a yega. Saul a sali bai risibié i kumind'é, 11pero Samuel a bis'é: ‘Ta kiko e kos ku bo a hasi ei?’ Saul a kontest'é: ‘Ora mi a mira ku e hendenan a kuminsá bai i ku bo no a yega na e ora palabrá i ku e filisteonan tabata reuniendo na Mikmas, 12mi a pensa ku nan lo a baha ataká mi na Guilgal sin ku mi a hasi un sakrifisio pa hasi SEÑOR kontentu. E ora ei mi a haña mi ta ofresé e sakrifisio di kandela mi mes.’ 13Samuel a kontest'é: ‘Loke bo a hasi ta un lokura. Si bo a obedesé e òrdu ku SEÑOR, bo Dios, a duna bo lo El a sigurá bo ku reino di Israel lo keda pa semper den man di bo desendientenan. 14Pero awor bo reino lo no dura. SEÑOR a buska un hòmber na su agrado#Echonan 13:22 i a nombr'é hefe di su pueblo, pasobra bo a desobedesé e òrdu ku SEÑOR a duna bo.’ 15Mesora Samuel a bai for di Guilgal pa sigui su kaminda. Sobrá di e ehérsito a sigui Saul pa kuminsá bringa i for di Guilgal nan a yega#13:15 pa sigui su kaminda…i for di Guilgal nan a yega: segun vershon griego. Den teksto hebreo no tin e frase akí. Guibea na Benhamin. Ei Saul a konta e trupanan ku tabata huntu kuné; tabatin mas o ménos 600 hòmber. 16Saul, su yu Yonatan i e trupanan ku tabata huntu ku nan tabata na Guibea den region di Benhamin, miéntras e filisteonan tabatin nan kampamentu na Mikmas. 17Tres grupo di filisteo a sali for di e kampamentu akí pa hòrta i bai ku tur loke nan por a haña; un di nan a bai direkshon di Ofra den region di Saul, 18otro a bai Bet-Horon i e di tres a bai na e seru#13:18 e seru: segun vershon griego; hebreo tin: frontera ku ta sali riba vaye di Seboim den direkshon di desierto. 19Den henter teritorio di Israel no por a haña un smet, pasobra e filisteonan a pensa ku di e manera akí e hebreonan lo no por traha ni spada ni lansa pa nan mes. 20P'esei e israelitanan mester a bai serka e filisteonan pa laga sleip nan heru di plug i chapi, hacha i machete.#13:20 machete: segun vershon griego; hebreo tin: heru di plug 21E filisteonan tabata kobra dos terser parti di un siklo#13:21 un siklo ta diesseis gram di plata pa sleip nan heru di plug i chapi, i un terser parti di siklo pa sleip harka i hacha i drecha punta di bion. 22P'esei ni un di e hendenan ku tabata serka Saul ku Yonatan no tabatin ni spada ni lansa dia di bataya. Ta nan dos so tabatin spada i lansa. 23Algun dje sòldánan di e pòst filisteo a sali bai na e pasashi den seru banda di Mikmas.
Currently Selected:
1 Samuel 13: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
