Ɖɛhan 79
79
1 Asáfu sín han.
Mawu ce, akɔta ɖěvo ɖěvo lɛ́ɛ vun gba ayǐkúngban towe;
yě ɖu su nú sinsɛnxɔ mímɛ́ towe;
yě zé Jeluzalɛ́mu dó húzú dǒglin.
2Yě jǒ mɛ e nɔ sɛn we lɛ́ɛ sín cyɔ dó nú xɛ, bɔ xɛ ɖu;
yě jǒ mɛ e ɖo gbejí nú we lɛ́ɛ sín lan dó nú gběkanlin, bɔ gběkanlin ɖu.
3Yě kɔn hun yětɔn kɔn nyi ayǐ sin ɖɔhun lɛ́ lɛ̌ dó Jeluzalɛ́mu,
mɛ ɖěbǔ ká ɖe bó ná ɖi cyɔ yětɔn ǎ.
4A sɔ́ mǐ dó húzú zuntín nú mɛ e ɖo akpá mǐtɔn lɛ́ɛ;
mǐ húzú slǎmɛ ɖɔ nú,
mǐ húzú nǔkiko nú mɛ e lɛ́ lɛ̌ dó mǐ lɛ́ɛ.
5Mawu Mavɔmavɔ, xomɛ e sin dó mǐ wɛ a ɖe ɔ́,
hwetɛ́nu wɛ a nǎ jǒ dó dó?
Xomɛsin towe e ɖo nǔ fyɔ́ wɛ myɔ ɖɔhun ɔ́,
hwetɛ́nu wɛ a nǎ jǒ dó dó?
6Sin xomɛ dó akɔta e ma tunwun we ǎ lɛ́ɛ,
sin dó axɔ́súɖuto e ma nɔ sɛn we ǎ lɛ́ɛ.
7Đó yě vúnvún Jakɔ́bu togun ɔ́;
yě gba nɔtɛn tɔn hánnyá.
8Ma sɔ́ flín hwɛ e tɔ́gbó mǐtɔn lɛ́ɛ hu lɛ́ɛ ó.
Nǔbláwǔkúnúmɛ towe ní yá wǔ wá,
ɖó mǐ jɛ ayǐ bǐ sésé.
9Mawu gbɛxɔnúmɛtɔ́ mǐtɔn, gɔ̌ alɔ nú mǐ,
ɖó susu e nyǐkɔ towe ɖó ɔ́ wú;
hwlɛ̌n mǐ, bó sɔ́ hwɛ mǐtɔn lɛ́ɛ kɛ mǐ,
ɖó nyǐkɔ towe wú.
10Étɛ́wú akɔta ɖě lɛ́ɛ ná kanbyɔ́ ɖɔ:
“Fítɛ́ Mawu yětɔn ká ɖe?”
Mɛsɛntɔ́ towe e sín hun è kɔn nyi ayǐ lɛ́ɛ ɔ́,
lě e a nɔ ba hlɔn nú yě gbɔn ɔ́,
ɖe xlɛ́ akɔta énɛ́ lɛ́ɛ ɖo nukún mǐtɔn mɛ.
11Mavɔmavɔ, vo e sa wɛ gantɔ́ ɖe ɔ́
ní hun káká wá gɔ̌n towe.
Hwlɛ̌n mɛ e ɖo nǎ dɔn wɛ lɛ́ɛ gán,
ɖó a dǒ hlɔ̌nhlɔ́n sɔ mɔ̌.
12Aklúnɔ, togun e ɖo akpá mǐtɔn lɛ́ɛ ɔ́,
cí e yě kɔn dó wǔ we lɛ́ɛ ɔ́,
sú axɔ́ tɔn yě;
sú axɔ́ tɔn yě azɔn tɛ́nwe.
13Énɛ́ ɔ́, mǐdɛɛ lɛ́ɛ e nyí togun towe ɔ́,
mǐ lɛ̌ngbɔ́hwan e a nyǐ lɛ̌ngbɔ́nyitɔ́ ná lɛ́ɛ ɔ́,
mǐ ná nɔ́ ji han dó kpa we káká sɔ́yi;
mǐ nǎ nɔ́ kpa susu nú we sín jijimɛ ɖě jí yi ɖě jí.
Lɛ̌ngbɔ́nyitɔ́ Izlayɛ́li tɔn, ɖǒtó!
Currently Selected:
Ɖɛhan 79: Fon13
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.
