Sabiduria 1
1
I. REKOMPENSA DI SABIDURIA
Sabiduria di Dios ta hiba na bida
1Gobernantenan di tera, stima loke ta hustu. Dirigí boso pensamentunan na Señor i busk'É ku un kurason sensio i sinsero. 2Pasobra E ta laga esnan ku busk'É ku seriedat hañ'É, i esnan ku ta konfia den djE E ta laga mir'É. 3Pensamentu robes ta tene hende leu for di Dios, i Dios ta tapa boka di esnan ku ta balotá poder di Dios.
4Sabiduria no ta drenta den un alma maligno; e no ta biba den un kurpa mará na piká. 5Sabiduria ta un spiritu santu di Dios ku ta siña hende loke ta bon. Pa hende ku dos kara e ta hui; pa pensamentu bobo e ta bira lomba, i ora maldat presentá, sabiduria ta sinti su mes strobá.
6Sabiduria ta un spiritu amigu di hende; p'esei esnan ku nan boka ta yen di blasfemia ta haña kastigu severo serka dje. Dios ta na altura di tur nan pensamentunan; kla E ta mira henter nan kurason; E ta komprondé kada palabra ku sali fo'i nan boka. 7Spiritu di Señor ta yena mundu henter; e ta abarká tur kos, p'esei e ta tende kada palabra ku hende papia. 8E ta ripará ora un hende papia malu di un otro hende; p'esei e no ta skapa di un kastigu hustu. 9Pensamentunan di mal hende ta bini dilanti di tribunal di Dios, su palabranan ta penetrá yega te na trono di Dios i asina ta yama kastigu riba dje. 10Pasobra e oido alerta di Señor ta tende tur kos, asta e kuchikuchi di mas pokopoko E ta kapta.
11Tene kuidou antó ku redu ku ta venená bo i protegé bo lenga kontra kalumnia. Pasobra pa kuchikuchi tambe bo mester duna kuenta; es ku rebahá otro, ta hinka su mes den pèrdishon. 12No kore tras di morto dor di dualu kita for di kaminda di bida, no buska bo pèrdishon dor di bo mes aktonan.
13Morto no ta obra di Dios. Dios no tin goso den pèrdishon di esnan ku ta biba.#Ezekiel 18:32; 33:11; 2 Pedro 3:9 14El a krea tur kos pa nan keda eksistí. Tur kriatura na mundu ta bon trahá. No tin venenu den nan ku ta kousa morto. Morto no tin e último palabra riba mundu, 15pasobra loke ta bon ta inmortal.
Sieguedat ta hiba na morto
16Pero dor di nan palabranan i echonan e mal hendenan a yama morto bin kompañá nan. Nan tabata anhelá morto, komo si fuera e tabata nan mihó amigu. Nan a sera un pakto kuné#Proverbionan 8:36; Isaías 28:15 i asina a bira un kompañero perfekto di dje.
Currently Selected:
Sabiduria 1: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013