Ester (deuterokanóniko) 10
10
Fama di Mordekai
1Rei Asuero a laga tur pais di tera firme i tambe tur isla di su reino paga belasting. 2Tur su echonan grandi i poderoso, i tambe e detayenan di e posishon altu ku el a duna Mordekai ta skibí den krónikanan di Media i Persia. 3Mordekai, e hudiu, tabata esun ku mas poder despues di rei Asuero. E tabata respetá serka e hudiunan i popular serka su famia numeroso, pasobra e tabata bringa pa su pueblo bai dilanti i e tabata buska pas pa tur nan desendientenan. #Ester 10:3a-i
Komplemento G (3a-l)
Splikashon di soño di Mordekai
3aI Mordekai a bisa: ‘Ta trabou di Señor esei. 3bAwor mi ta kòrda e soño ku a mustra mi tur e kosnan akí; nada den e soño akí no a keda sin sali: 3ce bròn chikí ku a bira un riu; klaridat, solo i un kantidat enorme di awa. E riu ta Ester: rei a kasa kuné i hasié su reina. 3dE dos dragonnan ta Haman i ami. 3eE kantidat grandi di pueblonan ta tur hende ku a sera kabes huntu pa kaba ku nòmber di hudiunan. 3fEsun pueblo ei ta mi pueblo, Israel, ku a sklama na Dios i a haña salbashon. Señor a salba su pueblo, Señor a liberá nos di tur e desgrasianan ei. Dios a duna señalnan i hasi milagernan grandi manera no a yega di sosodé nunka serka paganonan. 3gPasobra Dios a prepará dos lòt, unu pa e pueblo di Dios i unu pa tur otro pueblo. 3hDespues e dia, e ora i momento a yega pa saka e dos lòtnan i pa Dios husga tur pueblo. 3iI Dios a kòrda riba su pueblo, su propiedat Israel i El a trat'é ku hustisia. 3kP'esei israelitanan mester selebrá dia dieskuater i diessinku di e luna di Adar ku goso i alegria dilanti di Dios. Tur generashon di Israel, pueblo di Dios, mester sigui hasi esei pa semper.’
Remarke tokante e tradukshon griego
3lDen e di kuater aña di gobernashon di Tolemaio i Kleopatra, Dositeo, ku a afirmá di ta saserdote i di tribu di Levi, a trese e karta akí tokante fiesta di Purim huntu ku su yu Tolemaio. Nan a sigurá ku e tabata outéntiko i tradusí pa Lisimago, yu di Tolemaio, di e komunidat na Herusalèm.
Currently Selected:
Ester (deuterokanóniko) 10: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013