Zakarías 2
2
Di tres vishon: E hòmber ku e sinta di midi
1Mi a bolbe haña un vishon: mi a mira un hòmber ku un sinta di midi den su man. 2Mi a puntr'é: ‘Unda bo ta bai?’ El a rospondé: ‘Mi ta bai Herusalèm pa midi su largura i hanchura.’#Ezekiel 40:3-4; Revelashon 11:1; 21:15-17 3E angel ku tabata papia ku mi, a kana bai dilanti pa kontra ku un otro angel ku tabata bini den su direkshon. 4I el a bisa e angel akí: ‘Kore bai lihé serka e yònkuman aya ku e sinta di midi den su man i bis'é ku Herusalèm lo yena ku asina tantu hende i bestia di kria, ku lo no por traha muraya rònt di dje. 5SEÑOR ta bisa: “Mi mes lo ta un muraya di kandela ku ta rondoná e siudat. Mi mes lo biba ku tur mi gloria den e siudat.” ’#Isaías 4:5; Ezekiel 43:4-5; Revelashon 21:3,23
SEÑOR ta yama e eksiliadonan pa nan bolbe Herusalèm
6SEÑOR ta bisa: ‘Mi a plama boso den tur direkshon. Pero awor Mi ta bisa: Hasi lihé! Bini! Hui for di e pais den nort! 7Bini, boso tur ku ta biba na Bábel! Bin buska seguridat riba seru di Sion.’ 8SEÑOR soberano, ku a manda mi ku su outorisashon serka e pueblonan ku a sakia boso, ta bisa: ‘Ken ku hasi boso daño ta mishi ku mi pret'i wowo.#2:8 mi pret'i wowo; literalmente: su pret'i wowo 9Mi ta lanta mi man kontra nan i laga nan mes katibunan sakia nan.’ E ora ei boso lo rekonosé ku ta SEÑOR soberano a manda ami, Zakarías, serka boso.
10SEÑOR ta bisa: ‘Grita di alegria, habitantenan di Sion, pasobra Mi ta bin biba serka boso. 11Ora e dia ei yega, hopi pueblo lo djòin Mi, nan lo bira mi pueblo. I Ami lo biba serka boso.’ E ora ei boso lo rekonosé ku ta SEÑOR soberano a manda ami, Zakarías, serka boso.
12Huda lo bolbe bira propiedat di SEÑOR den e pais konsagrá n'E, i Herusalèm lo bolbe bira e lugá ku E ta skohe pa biba. 13Tur loke tin rosea, keda ketu den presensia di SEÑOR! Pasobra E ta bai sali for di su kas sagrado.#Habakuk 2:20; Sofonías 1:7
Currently Selected:
Zakarías 2: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013