Tito 2
2
Siñansa di e doktrina sano na diferente grupo
1Abo sí, siña e hendenan loke ta kuadra ku e doktrina sano. 2Hòmber di edat avansá mester ta moderá, digno di rèspèt i prudente; nan mester ta sano den nan fe, amor i perseveransia.
3Meskos tambe hende muhé di edat avansá mester tin e kondukta ku ta kuadra ku un bida santu. Nan no mester hasi redu ni ta bisiá na biña. Nan mester ta siñadó di loke ta korekto, 4ya nan ta instruí e hende muhénan mas yòn kon stima nan esposo i nan yunan, 5kon hiba un bida prudente, un bida puru, kon kuida nan kas, kon ta kariñoso i someté na nan esposo. E ora ei niun hende lo no desakreditá palabra di Dios.
6Meskos tambe kurashá e hòmbernan mas yòn pa nan ta prudente. 7Den tur kos abo mester duna un bon ehèmpel hasiendo loke ta bon. Mustra integridat i seriedat den bo enseñansa, 8i papia na un manera sano ku niun hende no por kondená. Ya asina bo kontrinkante lo no tin nada malu di bisa i su kara ta keda na bèrgwensa.
9Katibu mester someté nan na nan shon den tur kos i komplasé nan sin pusta boka ku nan. 10Nan no mester kohe kos di nan shon, pero demostrá ku por konfia nan den tur kos. Asina ta mustra den tur kos kon bunita e siñansa tokante Dios, nos Salbador, ta.
11Pasobra Dios a mustra su bondat dor di ofresé salbashon na tur hende. 12Bondat di Dios ta siña nos renunsiá un bida sin Dios, ku pashon mundano, i hiba un bida prudente, rekto i dediká na Dios, riba e mundu akí, 13miéntras nos ta warda ansiosamente riba e dia felis ku nos speransa lo bira realidat. Esei ta e dia ku gloria di nos gran Dios i Salbador Hesu-Kristu lo ta manifestá.#2:13 Esei…manifestá; otro posibel tradukshon: Esei ta e manifestashon glorioso di e gran Dios i di nos Salbador Hesu-Kristu. #2 Pedro 1:1 14Ta Hesu-Kristu a entregá su bida pa nos#Mateo 20:28; Marko 10:45; Galatanan 1:4; 1 Timoteo 2:6 pa por libra nos di tur maldat#Salmo 130:8; Mateo 20:28 i purifiká nos, di manera ku nos por bira su mes pueblo,#Éksodo 19:5; Deuteronomio 4:20; 7:6; 14:2; 1 Pedro 2:9 zeloso pa hasi bon obra.
15Papia di tur e kosnan ku mi a bisa akí i usa nan pa kurashá i refutá, ku tur outoridat. No laga niun hende despresiá bo.
Currently Selected:
Tito 2: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013