Salmo 92
92
SALMO 92
Esta grandi ta bo obranan, SEÑOR!
Un Salmo. Un kantika pa dia di Sabat.
1Ta dushi pa alabá SEÑOR,
pa kanta gloria di bo nòmber, o Altísimo;
2pa proklamá bo bondat di mainta
i bo fieldat den ora di anochi,
3tokando e arpa di dies kuèrdè i siter
o ku músika suave di lira.
4Bo echonan, SEÑOR, ta enkantá mi,
dilant'i obra di bo man mi ta grita:
5‘Esta grandi ta bo obranan, SEÑOR,
bo pensamentunan, esta profundo!’
6Hende bobo no ta komprondé,
hende sin sintí no tin idea.
7Maske pekadónan ta bona
manera yerba shimaron
i malechornan tur ta floresé,
esei ta hiba nan porfin na ruina.
8Enkambio Abo, SEÑOR,
Bo ta pa semper elevá.
9Pasobra mira, bo enemigunan, SEÑOR,
bo enemigunan, ata nan a kaba,
tur hasidó di maldat ta plamá.
10Bo a hisa mi kara na laria
manera un toro su kachu.
B'a basha zeta refreskante riba mi,
11m'a mira mi enemigunan kai,
e malbadonan ku a lanta kontra mi,
m'a tende mashá kla kon nan a keha.
12Un bon hende ta bona manera un palma,
e ta krese manera un seder di Libanon.
13Esnan plantá den kas di SEÑOR,
ku ta krese den kurá di nos Dios,
14ta karga fruta te den nan behes;
nan ta keda bèrdè i fresku,
15proklamando kon hustu SEÑOR ta,
Dios, mi Baranka! Nada malu n' tin den djE!
Currently Selected:
Salmo 92: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
