Salmo 88
88
SALMO 88
Ousilio, SEÑOR! Mi ta serka di muri!
Un kantika, Salmo di yunan di Korag. Pa maestro di kanto. Na weis di ‘Mahalat’. Na ora di aflikshon. Poema didáktiko di Heman, e ezrahita.
1SEÑOR Dios, mi Salbador,
den dia mi ta grita ousilio,
anochi mi ta buska bo presensia.
2Mare mi súplika por yega serka Bo,
tende mi, mi ta sklama na Bo.
3Mi kurason ta kargá di fèrdrit,
mi ta serka reino di morto.
4Nan ta konta mi den esnan
ku ya a baha den buraku,
mi ta parse un hòmber sin forsa.
5Mi paradero ta denter di morto,
manera esnan ku a muri den bataya
i kende, drumí den nan graf,
Bo a lubidá kompletamente:
nan ta ranká for di bo man.
6B'a tira mi den e pos di mas hundu,
den regionnan skur, den abismo.
7Bo furia ta duru riba mi,
Bo a laga bo olanan suta mi.
8B'a alehá mi konosínan fo'i mi,
Bo a duna nan disgustu di mi.
Un prezu mi ta, sin salida,
9mi wowo ta skur di fèrdrit.
Tur dia, SEÑOR, mi ta yama Bo
i mi ta alsa mi mannan na Bo.
10Bo ta hasi milager pa mortonan?
Spiritunan lo lanta pa alabá Bo?
11Sa proklamá bo bondat den graf antó,
bo fieldat den lugá di putrishon?
12Den e tiniebla ei nan sa di bo milagernan,
di bo hustisia den e tera di olvido?#Job 10:21-22; Salmonan 6:5; 115:17; Isaías 38:18-19; Sirag 17:27-28; Barug 2:17-18
13Ma ami ta sigui sklama na Bo, SEÑOR,
mainta ya mi orashon ta alkansá Bo.
14Pakiko rechasá mi, SEÑOR,
pakiko skonde bo Kara pa mi?
15Fo'i ten mi ta'ta mucha mi a sufri
i mi a biba na boka di buraku;
m'a soportá kos teribel di bo parti,
te pone man na kabes.
16Bo furia ta pasa riba mi,
bo horornan ta kaba ku mi bida;#Job 6:4
17nan ta rondoná mi henter dia
manera un inundashon,
tur pareu nan ta tapa mi abou.
18Bo a pone tur hende,
ku tabata mi amigu i kompañero, alehá fo'i mi;
awor ta skuridat ta mi kompaño!
Currently Selected:
Salmo 88: PBDC13
Highlight
Share
Compare
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
