Salmo 56
56
SALMO 56
Mi ta konfia den SEÑOR, anto kiko hende por hasi mi!
Pa maestro di kanto. Na weis di ‘Palomba silensioso di lehania’. Di David. Na stèm mediano. Ora filisteonan a deten'é na Gat.#1 Samuel 21:13-15
1Tene piedat di mi, o Dios,
pasobra hendenan ta wak mi,
henter dia nan ta ataká mi
i nan ta hinka mi den pèrtá.
2Henter dia mi enemigunan ta lur mi,
un trupa grandi ta bringa mi, Dios Altísimo.
3Dia mi sinti miedu,
mi ta sigui konfia den Bo:
4den Dios, kende su palabra mi ta gaba,
den Dios mi ta pone mi konfiansa;
mi no tin miedu di nada,
anto kiko hende por hasi mi?#Salmo 118:6; Hebreonan 13:6
5Henter dia nan ta trose mi palabranan,
nan ta blo pensa pa hasi mi daño.
6Skondí nan ke kohe mi den trampa,
nan ta spioná mi andá,
wardando e momento pa mata mi.
7Pa hende ku tantu maldat
akaso lo tin skapatorio?
Dios, den bo furia dal e hendenan abou!
8Kuantu be mi a dualu,
Abo so a hiba kuenta di esei.
Bo ta tuma nota di mi lágrimanan;
Bo no a skibi nan den bo buki?
9Sigur sigur, dia mi yama Bo,
mi enemigunan lo hala atras;
mi tin sigur: Dios ta huntu ku mi.
10Den Dios, kende su palabra mi ta gaba,
den SEÑOR, — su palabra mi ta gaba —
11den Dios mi ta pone mi konfiansa,
mi no tin miedu di nada,
anto kiko hende por hasi mi?
12E promesanan, o Dios, ku mi a hasi,
ainda nan no ta kumplí;
awor lo mi kumpli ku nan,
ofresiendo mi gradisimentu.
13Pasobra B'a salba mi di morto,
Bo a warda mi pia pa mi n' kai,
pa mi por kana den presensia di Dios,
den lus ku ta bida pa hende.
Currently Selected:
Salmo 56: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
