Salmo 48
48
SALMO 48
Herusalèm, siudat di nos Dios
Kantika. Salmo di yunan di Korag.
1SEÑOR ta grandi, digno di alabansa
den siudat di nos Dios,
2su seru santu — altura bunita,
alegria pa henter mundu! —
Seru di Sion, paradero dibino,
siudat di e gran Rei.#Mateo 5:35
3Dios mes a resultá un baluarte
denter di su fòrtinan.
4Pasobra mira, reinan a uni
pa sali huntu kontra dje;
5sobresaltá pa su bista
nan a kore bai spantá.
6Un temblamentu a kohe nan kurpa,
manera ansha di un muhé na parto,
7o manera un orkan di pariba
ku ta splèndu barkunan di Tarsis.
8Tur loke nos a tende nos a mira
den siudat di SEÑOR di universo,
den siudat di nos Dios:
Dios a estables'é pa semper!
9Nos a rekordá bo fabornan, o Dios,
paden di bo tèmpel.
10Manera bo fama, Dios, bo alabansa
ta yega te na skinanan di mundu.
Loke ta sali di bo man ta hustu.
11Laga Seru di Sion ta kontentu
i siudatnan di Huda kanta gloria
di bo desishonnan hustu.
12Kana pasa rònt di Sion
i konta e torennan ku e tin;
13paga atenshon na su murayanan,
ripará su fòrtinan i konta
na tur generashon ku ta bini:
14‘Mira, asina Dios ta,
nos Dios den tur eternidat.
E ta nos guia eternamente!’#48:14 eternamente: segun vershon griego; hebreo no ta kla.
Currently Selected:
Salmo 48: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
