Salmo 108
108
SALMO 108
Dios so por yuda nos
(Salmo 57:7-11; 60:5-12)
Kantika. Salmo di David.
1O Dios, mi kurason ta prepará,
mi ke kanta i toka salmo pa Bo;
ban mira, mi alma!
2Lanta, arpa i siter,
mi ke kanta saka solo.
3Mi ke gaba Bo, SEÑOR, serka pueblonan,
kanta bo gloria bou di nashonnan,
4pasobra grandi ta bo amor bondadoso,
asina grandi ku e ta pasa riba shelu;
bo fieldat ta yega te na nubianan.#Salmo 36:5
5Alsa Bo, SEÑOR, te riba shelu,
laga tera ta yen di bo gloria!#Salmo 8:1
6Pa bo yunan stimá por haña libertat:
salba nos ku bo man fuerte, skucha mi!
7Fo'i den su santuario Dios ta bisa:
‘Triunfante lo Mi parti Sihem,
lo Mi midi e vaye di Sukot.
8Guilead ta di Mi, di Mi ta Manase,
Efraim ta e hèlmu pa tapa mi kabes
i Huda lo sirbi Mi pa bastòn di mando.
9Pero Moab lo ta mi palangana,
pa tuma poseshon di Edom
Mi ta pisa mi sambarku riba dje,
riba Filistea lo Mi kanta viktoria!’
10Ken lo hiba mi den e stat fortifiká,
ken ta bai mi dilanti te den Edom,
11si Abo, o Dios, rechasá nos
i no sali mas ku nos trupanan?
12Ai, yuda nos kontra enemigu,
komo yudansa di hende ta enbano.
13Huntu ku Dios nos lo bringa ku kurashi;
t'E lo machiká nos enemigunan.
Currently Selected:
Salmo 108: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
