Salmo 103
103
SALMO 103
Mi alma, sí, henter kreashon, alabá SEÑOR pa su bondat
Di David.
1Mi alma, alabá SEÑOR,
tur loke tin den mi, alabá su santu nòmber!
2Mi alma, alabá SEÑOR,
no lubidá ningun di su fabornan:
3E ta pordoná bo tur bo kulpa
i ta kura bo di tur bo dolónan.
4E ta salba bo bida for di graf,
ta rondoná bo ku bondat i ku ternura.
5E ta kolma bo añanan#103:5 añanan: teksto probabel; hebreo no ta kla. ku biennan,
bo hubentut ta renobá manera un águila.
6SEÑOR ta perkurá pa tin hustisia,
pa tur hende oprimí haña derecho.#Salmo 146:7
7El a siña Moises su mandamentunan
i yunan di Israel su echonan.
8SEÑOR ta kompasivo i tierno,
yen di pasenshi i bondat amoroso.#Salmo 145:8; Sirag 2:11; Hakobo 5:11
9E n' ta sigui akusá bo ketu bai,
E n' ta keda rabiá pa semper.
10E n' ta trata nos konforme nos pikánan,
E n' ta paga nos di akuerdo ku nos kulpa.
11Mes altu ku shelu ta fo'i tera
mes inmenso ta su amor riba su fielnan.
12Mes leu ku pabou ta di pariba
E ta tira nos pikánan for di nos.
13Manera un tata ta tierno pa su yunan,
SEÑOR ta tierno pa esnan ku respet'É.
14E sa di ki material nos t'engendrá,
E n' ta lubidá ku nos ta stòf.
15Hende — su bida parse yerba,
manera flor di kunuku e ta floria.
16Ku bientu pasa riba dje, e n' t'ei mas,
su pida tera no sa nada mas di dje.
17Ma bondat di SEÑOR ta eterno,
eterno pa esnan ku respet'É;
su hustisia ta pa yunan di nan yunan,#Isaías 40:6-8
18pa esnan ku ta warda su aliansa
i ta kòrda kumpli ku su òrdunan.
19SEÑOR a pone su trono den shelu,
E ta rei riba tur tur kos.
20Alabá SEÑOR, boso, su angelnan,
sernan tan fuerte i poderoso,
ku ta ehekutá su mandamentunan,
skuchando loke E ta manda.
21Alabá SEÑOR, tur su ehérsitonan,
su sirbidónan, kumplidó ku su deseo.
22Alabá SEÑOR, tur su obranan,
na tur lugá kaminda E ta reina.#Salmo 148
Mi alma, alabá SEÑOR!
Currently Selected:
Salmo 103: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
