Ezekiel 48
48
E tereno pa e tribunan den parti nort
1-7‘E frontera parti nort ta kore via di Hètlon, e kaminda pa Hamat i Haser-Enon; e tereno di Damasko i Hamat ta keda nort di e frontera akí. For di e frontera akí e siguiente tribunan ta haña nan parti; kada un di nan ta haña un tereno ku ta ekspandé for di Laman Mediteráneo te na e frontera parti ost: Dan, Asher, Naftali, Manase, Efraim, Ruben i Huda.
E tereno konsagrá na SEÑOR
8Na parti zùit di e tereno di Huda for di e frontera parti ost te na Laman Mediteráneo e tereno ku boso mester apartá ta keda. E ta diesdos kilometer i mei hanchu; e largura ta meskos ku di e otro terenonan. E tèmpel lo ta meimei. 9E parti di e tereno ku boso mester konsagrá na Mi mester ta diesdos kilometer i mei largu i dies#48:9 dies: teksto probabel, kompará 45:1; hebreo tin: sinku kilometer hanchu.
10Mester partié entre e siguiente gruponan: Tin un pida destiná pa e saserdotenan; e ta sinku kilometer di nort te zùit i diesdos kilometer i mei di ost te wèst. Ei meimei mi santuario ta bini. 11E tereno akí ta na disposishon di e saserdotenan sagrado, desendientenan di Sadok; kontrali na e levitanan nan a keda sirbi Mi fielmente i nan no a bira lomba pa Mi huntu ku e israelitanan. 12P'esei nan ta haña un tereno apartá for di e otronan, un tereno mashá sagrado, banda di esun di e levitanan.
13E levitanan ta haña un pida pegá ku esun di e saserdotenan; e tambe ta midi diesdos kilometer i mei pa sinku kilometer. E dos pidanan huntu ta midi antó diesdos kilometer i mei pa dies#48:13 dies: segun vershon griego; hebreo tin: sinku kilometer. 14No mag bende ni kambia nada for di dje: e pida di mas mihó di e pais no mag pasa den otro man: e ta konsagrá na Mi.
15E pida sobrá di diesdos kilometer i mei pa dos kilometer no ta sagrado; e ta destiná pa e siudat, komo lugá di biba i kunuku di yerba. 16E ta forma un firkant, na banda nort, zùit, ost i wèst e largura ta dos i un kuart kilometer. 17Rondó di e siudat, den tur direkshon, tin un pida bashí di 125 meter. 18Loke ta sobra ta un tereno di sinku kilometer largu na parti wèst i sinku kilometer largu na parti ost di e siudat, ku ta keda pegá ku e tereno sagrado. Esaki ta e tera ku ta produsí kuminda pa e hendenan ku ta traha den siudat. 19Tur hende ku ta traha den siudat, for di kua tribu ku e por ta, mag labra e pida tera akí.
20Henter e tereno ku mester keda apartá komo tereno sagrado lo ta antó diesdos kilometer i mei pa diesdos kilometer i mei, ku tereno di e siudat inkluí.
E tereno destiná pa e gobernante
21E tereno ku sobra na kada banda di e tereno sagrado i di e tereno di e siudat ta pa e gobernante; e ta kore paralelo ku e parti di e tribunan, diesdos kilometer i mei, for di Laman Mediteráneo te na e frontera parti ost. E tereno sagrado ku e santuario ta keda meimei di nan. 22Ku eksepshon di e tereno di levitanan i e tereno di e siudat, ku ta keda meimei di e terenonan di e gobernante, henter e tereno entre Huda i Benhamin ta pa e gobernante.
E tereno pa e tribunan den parti zùit
23-27Sobrá di e tribunan tambe, nan kada un ta haña un tereno ku ta ekspandé for di Laman Mediteráneo te na e frontera parti ost: Benhamin, Simeon, Isakar, Zebulon i Gad. 28Na banda zùit di e tereno di Gad e frontera parti zùit di e pais ta kore. E ta kore di Tamar pa e awa di Meriba-Kadesh, despues via di e roi ku ta forma frontera ku Egipto te ora e sali na Laman Mediteráneo.
29Esaki ta e pais ku boso mester tira lòt parti entre e tribunan di Israel i esaki ta e partinan ku kada un mester haña.’ Esei ta loke SEÑOR, mi Dios, ta bisa.
E portanan di siudat
30Esakinan ta e entradanan di siudat. Na banda nort e muraya ta dos kilometer i un kuart largu 31i e tin tres porta, ku, meskos ku tur e otronan, ta yamá na un di e tribunan di Israel: Porta di Ruben, Porta di Huda i Porta di Levi. 32Na banda ost tambe e muraya ta dos kilometer i un kuart largu ku tres porta: Porta di Jozef, Porta di Benhamin i Porta di Dan. 33E muraya na banda zùit tambe ta dos kilometer i un kuart largu i tin tres porta: Porta di Simeon, Porta di Isakar i Porta di Zebulon. 34E muraya na banda wèst, tambe dos kilometer i un kuart largu, tin tres porta: Porta di Gad, Porta di Asher i Porta di Naftali. 35Largura total di e murayanan rondó di e siudat ta anto nuebe kilometer. For di awor e siudat lo yama: SEÑOR ta aya!#Revelashon 21:12-13
Currently Selected:
Ezekiel 48: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013