Éksodo 37
37
Trahamentu di e arka
(Éksodo 25:10-22)
1Besalel a traha e arka di palu di akasia: un meter bintisinku largu, setentisinku sèntimeter hanchu i setentisinku sèntimeter altu. 2El a fur'é di paden i di pafó ku oro puru i a traha un leshi di oro rònt di dje. 3El a traha kuater renchi di oro i a pega nan na e kuater pianan, dos na kada banda di e arka. 4Tambe el a traha bara di palu di akasia i a fura nan ku oro. 5El a pasa nan den e renchinan na kada banda di e arka pa por karga e arka.
6Besalel a traha un tapa di oro puru: un meter bintisinku largu i setentisinku sèntimeter hanchu. 7El a traha na rant di kada banda kòrtiku un kerubin di oro batí, 8tur na un ku e tapa. 9E kerubinnan tabata ku kara pa otro den direkshon di e tapa i tabata protegé e tapa ku nan alanan habrí.
Trahamentu di e mesa
(Éksodo 25:23-30)
10Tambe Besalel a traha un mesa di palu di akasia: un meter largu, sinkuenta sèntimeter hanchu i setentisinku sèntimeter altu. 11El a fur'é ku oro puru i a traha un leshi di oro rònt di dje. 12El a traha un rant, hanchura di un man, na e mesa i rònt di e rant un leshi di oro. 13El a traha kuater renchi di oro i a pega nan na e skinanan na e kuater pianan. 14E renchinan tabata serka di e rant pa por pasa e baranan di karga e mesa. 15El a traha e baranan di palu di akasia i a fura nan ku oro. 16Tambe Besalel a traha e rekisitonan ku tabata pertenesé na e mesa: e skòternan, e skalchinan, e kòmchinan i e kanikanan pa sakrifisio di biña, tur di oro puru.
E kandelar
(Éksodo 25:31-40)
17Tambe Besalel a traha un kandelar di oro puru. Su pia, bara i e adornonan, esta e kèlki-, kònòpi- i blachinan tabata tur na un. 18For di e bara tabata sali seis brasa, tres na kada banda. 19Na kada un di e seis brasanan tabatin tres kèlki den forma di flor di mangel, ku tantu nan kònòpinan komo nan blachinan 20i na e bara di e kandelar kuater kèlki, tambe den forma di flor di mangel ku kònòpi i blachi. 21Bou di kada par di brasa ku tabata sali for di e bara tabatin un kònòpi di flor. 22Tur kònòpi i brasa tabata trahá na un ku e kandelar: ún pida oro batí. 23Tambe el a traha shete lampi di zeta pa e kandelar, ku nan snùiter i baki di oro puru. 24Pa e kandelar ku tur loke ta pertenesé n'e Besalel a usa trinta kilo di oro puru.
E altá pa ofresé sensia
(Éksodo 30:1-5)
25Besalel a traha un altá di palu di akasia pa ofresé sensia. E altá tabata firkant: sinkuenta sèntimeter largu i sinkuenta sèntimeter hanchu. E tabata un meter altu. E kachunan tabata tur na ún ku e altá. 26El a fura e blat ariba, e bandanan i e kachunan ku oro puru i a traha un leshi di oro rònt di dje. 27Na kada banda bou di e leshi, el a pega dos renchi di oro. E renchinan tabata pa pasa e baranan ora ta karga e altá. 28El a traha e baranan di palu di akasia i a fura nan ku oro.
Preparashon di sensia i di zeta pa konsagrá
(Éksodo 30:22-38)
29Besalel a prepará tambe e zeta sagrado i e sensia puru di holó dushi manera un trahadó di perfume ta traha perfume.#Éksodo 30:22-38
Currently Selected:
Éksodo 37: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
