Éksodo 31
31
Besalel i Oholiab
(Éksodo 35:30; 36:1)
1SEÑOR a bisa Moises: 2‘Tende, Mi a skohe Besalel, yu di Uri i ñetu di Hur, di tribu di Huda. 3Mi a yen'é ku mi spiritu, Mi a dun'é sabiduria, konosementu i abilidat pa tur tipo di trabou, 4pa diseñá i traha diseño den oro, den plata i den bròns; 5pa sleip i monta piedra presioso, pa traha ku palu i hasi tur sorto di trabou fini. 6Tambe Mi a skohe Oholiab, yu di Ahisamak, di tribu di Dan, pa e yuda Besalel ku e trabou. E otro trahadónan tambe Mi a duna hopi abilidat pa realisá tur loke Mi a ordená bo: 7e tènt di enkuentro, e arka pa warda e dokumento di aliansa, e tapadera di e arka i tur otro opheto den tènt; 8e mesa ku su rekisitonan, e kandelar di oro puru ku tur loke ta pertenesé n'e; e altá pa ofresé sensia; 9e altá pa sakrifisio di kandela i tur loke ta pertenesé n'e; e palangana ku su pedestal; 10e pañanan saserdotal pa bisti den santuario, tantu e pañanan sagrado di saserdote Aaron komo di su yunan; 11e zeta di konsagrashon i e sensia perfumá pa santuario. Nan mester traha tur kos manera Mi a ordená bo.’
Dia di sabat
12SEÑOR a bisa Moises: 13‘Bisa e israelitanan ku nan mester respetá mi dianan di sabat, pasobra sabat ta un señal entre Ami ku boso di generashon pa generashon, pa boso sa ku t'Ami a skohe boso komo mi pueblo. 14Respetá dia di sabat pasobra e ta un dia konsagrá na Mi. Esun ku no respet'é ta haña kastigu di morto, pasobra ken ku traha e dia ei, ta keda eliminá for di su pueblo. 15Seis dia bo tin pa traha, pero e di shete dia ta un dia di sosiegu kompleto, un dia konsagrá na SEÑOR.#Éksodo 20:8-11; 23:12; 34:21; 35:2; Levítiko 23:3; Deuteronomio 5:12-14 Ken ku traha riba dia di sabat ta haña kastigu di morto. 16E israelitanan mester keda selebrá dia di sabat. Ta un determinashon den e aliansa ku ta konta pa semper, pa nan i nan desendientenan. 17Ta un señal di e laso entre Ami ku e israelitanan pa semper. Pasobra den seis dia Ami, SEÑOR, a traha shelu i tera i riba e di shete dia Mi a sosegá pa kohe un rosea.’#Éksodo 20:11
Moises ta risibí e dos tablanan di piedra
18Ora Dios a kaba di papia ku Moises riba Seru Sinai, Dios a dun'é e dokumento di aliansa, dos tabla di piedra, ku Dios mes mes a skibi.
Currently Selected:
Éksodo 31: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
