1 Makabeonan 6
6
KONTRA-ATAKE DI E SEÑORNAN GRIEGO
Fin di Antíoko IV
(2 Makabeonan 1:11-17; 9; 10:9-11)
1Miéntras rei Antíoko IV tabata marcha dor di e region ost di Eufrat, el a tende di un siudat na Persia, yamá Elimes, famoso pa su rikesa na oro i plata. 2Tèmpel di e siudat ei tabata mashá riku; eiden tabatin eskudo, korasa i arma di oro ku Alexander e Masedonio, yu di Filipo, a laga atras. Alexander tabata e promé rei ku a goberná imperio griego. 3Antíoko a yega i a purba konkistá i sakia e siudat, pero e no a logra, pasobra e habitantenan a deskubrí su plannan. 4Nan tabata kla pará pa bringa kontra dje i el a kore limpi bai. Mashá desapuntá Antíoko a bandoná e lugá ei i a bai Babilonia bèk.
5Antíoko tabata na Persia ainda, ora el a haña notisia ku e hudiunan a derotá e ehérsitonan ku a bai pais Huda: 6nan a derotá Lisias ku a sali na kabes di un ehérsito fuerte i nan a bira mas fuerte, debí na e armanan, ekipo i botin grandi ku nan a kita for di e ehérsitonan derotá. 7Nan a tumba e altá#1 Makabeonan 1:54; 4:45 di dios falsu ku Antíoko a traha riba e altá di sakrifisio di kandela na Herusalèm i nan a drecha e murayanan altu rondó di tèmpel. Tambe nan a traha un muraya rondó di Bet-Sur, un di e siudatnan di rei mes.
8Ora rei a tende esei el a keda babuká, tabata un shòk asina grandi p'e ku el a tira su kurpa riba kama bira malu di fèrdrit, pasobra su soño a kai na awa. 9Asina el a keda vários dia largu, pasobra kada be di nobo e tabata haña atake di depreshon. El a realisá ku e tabata bai muri. 10P'esei el a laga yama su amigunan i bisa nan: ‘Soño a hui for di mi wowo i mi kurason ta kibrá di ansha. 11Mi a bisa den mi mes: Esta un martirio mi bida a bira i esta un laman di sufrimentu a basha riba mi. Di kon? Mi no tabata generoso i kerí durante mi gobernashon? 12Ma awor mi ta rekordá e daño ku mi a hasi Herusalèm, pasobra mi a hòrta tur opheto di uso di oro i di plata ku tabatin aya. Mi a manda sòldá pa sin motibu kaba ku e habitantenan di Huda. 13Awor mi sa ku ta p'esei e desasternan akí ta pasa ku mi i ata mi ta muri di fèrdrit grandi riba suela strañero.’
Antíoko V ta sigui su tata komo rei
14E ora ei Antíoko a yama Filipo, un di su amigunan, serka dje i a enkarg'é ku gobernashon di henter su reino. 15El a dun'é su korona, su mantel real i su renchi di seyo ku intenshon ku Filipo lo kria i eduká su yu Antíoko pa bira rei despues. 16Antíoko a muri aya na aña 149.#6:16 Aña 149 ta korespondé ku aña 163 promé ku Kristu.
17Ora Lisias a tende ku Antíoko a muri, el a hasi e hóben Antíoko rei na lugá di su tata. Lisias a kri'é fo'i dia e tabata mucha i a yam'é Eupator.#6:17 Eupator ta nifiká: yu di un tata noble.
Hudas Makabeo ta sitia e fòrti na Herusalèm
18E hendenan ku tabata okupá e fòrti tabata molestiá e hudiunan den bisindario di tèmpel kontinuamente. Nan tabata purba na tur manera di hasi nan daño i mantené e strañeronan na poder. 19P'esei Hudas a disidí di kita nan for di kaminda. El a hasi un yamada na henter pueblo pa bai sitia e fòrti. 20E pueblo a bini huntu i a kuminsá sitia e fòrti na aña 150.#6:20 Aña 150 ta korespondé ku aña 162 promé ku Kristu. Nan a traha plataformanan móbil pa batrei i otro mashinnan pa sitia.
21Algun hòmber huntu ku poko israelita ku a bira lomba pa nan religion i djòin nan, a logra pasa dor di e blokeo. 22Nan a bai serka rei i a bis'é: ‘Ta ki dia porfin bo ta hasi hustisia pa nos i venga nos rumannan? 23Ta nos aki a sirbi tata di su mahestat ku amor, nos sí a biba segun su mandamentunan i a kumpli ku su òrdunan. 24P'esei nos kompatriotanan a bin sitia e fòrti i bira lomba pa nos, pió ainda: kua di nos ku a kai den nan man, nan a laga mata i nan a hòrta nos propiedat. 25No ta riba nos so nan a pone man pa mata nos, pero riba tur nan bisiñanan tambe. 26I pió ainda, awor nan a sitia e fòrti na Herusalèm pa nan konkist'é i nan a reforsá e tèmpel i Bet-Sur. 27Si su mahestat no kaba ku nan lihé, nan lo hasi pió ainda i su mahestat lo no por para nan mas.’
Bataya na Bet-Zakaria
(2 Makabeonan 13:1-17)
28Ora rei a tende esei, el a rabia. El a reuní tur su amigunan, e komandantenan di infanteria i esnan di kabayeria. 29Di e otro reinonan i di e islanan griego tambe el a hür sòldá, 30di moda ku su ehérsito tabata konsistí di 100.000 sòldá di infanteria, 20.000 di kabayeria i 32 olefante itrein pa bataya. 31Nan a pasa Idumea, sitia Bet-Sur, bringa dianan largu i a traha otro mashinnan pa sitia. Pero e hudiunan a lansa un atake, pega e mashinnan na kandela i bringa ku mashá kurashi.
32E ora ei Hudas a kita sitio dje fòrti, lanta su kampamentu na Bet-Zakaria i blòkia e kaminda, nort di kampamentu di rei. 33Mainta hopi trempan, purá purá rei a laga su ehérsito pasa pa e kaminda ku ta bai Bet-Zakaria. E trupanan a bai para kla pa bringa i nan a supla tròmpèt. 34Nan a duna e olefantenan djus di drùif i figo pa prepará nan pa bataya. 35Nan a repartí e bestianan den e diferente gruponan di sòldá i a pone 1000 sòldá bistí ku korasa i hèlmu di bròns huntu ku kada olefante. Huntu ku kada olefante nan a pone 500 sòldá di kabayeria bon itrein. 36E sòldánan di kabayeria akí no tabata skit for di e bestia, unda ku e olefante bira, nan tabata bira su tras. 37Riba kada bestia tabatin toren fuerte di palu, duru mará ku faha. Kada toren tabatin un dak. Ademas di e kuidadó di e bestia tabatin tambe kuater sòldá ku for di eiriba tabata tuma parti na e bataya. 38Sobrá sòldá di kabayeria rei a pone na e dos alanan di e ehérsito, tantu pa trese bruhamentu komo pa protegé e filanan di sòldá. 39Segun solo tabata bria riba e eskudonan di oro i bròns, e serunan tabata reflehá e brio manera antorcha sendé. 40Un parti di e ehérsito real a plama riba kabes di e serunan i e otro na partinan mas abou. Asina nan a avansá den un formashon perfekto. 41Spantu a drenta kurpa di tur ku a tende e gritamentu di e multitut, e bochincha di e marcha masal i e zonido di nan armanan. Echo ta ku e ehérsito tabata sumamente grandi i fuerte. 42Hudas i su ehérsito a kuminsá ataká i 600 sòldá di rei a pèrdè nan bida.
43Elazar Avaran a ripará ku un di e olefantenan, ku tabata mas grandi ku tur, tabata tapá ku un korasa real. El a pensa ku ta rei tabata riba e bestia akí, p'esei el a disidí 44di sakrifiká su mes pa salba su pueblo i haña un nòmber inmortal. 45Sin miedu el a ranka bai riba e bestia, pasa meimei di e filanan di sòldá, partiendo sla mortal na man drechi i na man robes, di manera ku na tur dos banda e hendenan a habri kaminda p'e. 46El a drenta bou di e olefante i hink'é mata. E bestia a sak den otro riba Elazar ku a muri ei mes.
47Ora e hudiunan a mira poder militar di e reino i e gana di bringa di e ehérsito, nan a retirá.
Ta sitia tèmpel
(2 Makabeonan 13:18-23)
48Awor e ehérsito real a ranka sali kontra e hudiunan na Herusalèm. Rei a lanta un kampamentu kontra Huda i seru di Sion. 49Mientrastantu el a sera pas ku e habitantenan di Bet-Sur, ku a bandoná e siudat. Nan no tabatin kuminda mas pa por a sobrebibí e sitio pasobra tabata den Aña di Sabat, esta aña di sosiegu#Éksodo 23:11; Levítiko 25:1-7 pa tera. 50Rei a invadí Bet-Sur i a pone un grupo di sòldá pa tene warda einan.
51Rei a sitia tèmpel pa basta tempu. El a lanta plataforma pa para tira, pa mashinnan di guera, pa aparatonan pa tira kandela i pa batrei pa tira flecha i slengu. 52Esnan den e tèmpel sitiá tambe a traha mashinnan pa usa kontra esnan di e enemigunan i nan a bringa pa largu tempu. 53Pero no tabatin kuminda den mangasina, pasobra tabata den e di shete aña i esnan ku ker a skapa for di teritorio pagano i ku nan a trese Huda bèk a kome e delaster reservanan. 54Mashá tiki hende hòmber a sobra den santuario, pasobra hamber tabata mata nan; p'esei kada un a bai su kas bèk.
Libertat di religion!
(2 Makabeonan 13:23-26; 11:22-26)
55Filipo, ku rei a nombra for di tempu e tabata na bida pa eduká su yu Antíoko pa bira rei, 56a bini bèk for di Persia i Media ku ehérsitonan di rei i awor e tabata purba yega na poder. 57Ora Lisias a tende esei, e tabata ke duna señal pa e sitiadónan retirá mas pronto posibel. El a bisa rei, e komandantenan di guera i e sòldánan: ‘Dia pa dia nos ta bai mas atras, kuminda ta bira skars, e lugá ku nos ta sitia ta fuerte i ta nos ta responsabel pa reino. 58P'esei laga nos duna e hendenan akí man, sera pas ku nan i ku henter nan pueblo. 59Laga nos pèrmití nan biba segun nan kustumbernan, manera nan tabata hasi ántes. Pasobra nos a abolí nan kustumbernan, nan a sinti nan ofendí i a hasi tur e kosnan akí.’
60Rei i su komandantenan a bai di akuerdo ku e proposishon akí i rei a manda su funshonarionan pa sera pas ku e enemigu, ku a aseptá esaki. 61Rei i su komandantenan a hura ku nan lo kumpli ku e kombenio. En bista di esaki e defensornan a bandoná e fòrti. 62Rei a subi seru di Sion i ora el a ripará kon fuerte e lugá tabata, el a kibra e huramentu i a ordená pa basha e muraya rondó di e siudat abou. 63Despues purá el a lanta su kampamentu i a sali bai Antiokia. Aya el a topa ku Filipo ku tabatin e siudat den su poder; el a bringa kontra dje i a poderá ku violensia di e siudat.
Currently Selected:
1 Makabeonan 6: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013