1 Makabeonan 4
4
PROMÉ VIKTORIANAN DI HUDAS MAKABEO (kontinuashon)
Viktoria riba Gorgias na Emaus
(2 Makabeonan 8:23-29,34-36)
1Gorgias a skohe 5000 hòmber di infanteria i 1000 sòldá di kabayeria bon itrein i den anochi nan a sali 2pa ataká e kampamentu di hudiu di sorpresa. Hòmbernan di e fòrti tabata nan guia. 3Ora Hudas a tende e notisia akí, e tambe a sali ku su sòldánan balente pa ataká e ehérsito di rei ku tabata na Emaus, 4miéntras e ehérsito di Gorgias tabata leu for di su kampamentu ainda. 5Den anochi ora Gorgias a yega kampamentu di Hudas, e no a haña ningun hende i el a bai buska nan den seru, pensando ku ta hui e hudiunan a hui pa nan.
6Ora di dia a habri Hudas a yega ku 3000 sòldá den sabana. Nan no tabata dje bon ekipá i armá ei manera nan tabata deseá. 7Nan a mira e ehérsito di pagano bon armá ku harnas i eskudo i ku sòldá di kabayeria rondó di nan pa protegé nan. Tur sòldá di kabayeria tabata bon itrein pa bataya. 8Hudas a bisa e sòldánan ku tabata huntu kuné: ‘No tene miedu di nan kantidat grandi ni di nan atake. 9Kòrda kon nos antepasadonan a keda salbá den Laman Kòrá, ora fárao tabata persiguí nan ku su ehérsito.#Éksodo 14 10Ban anto, laga nos pidi Shelu pa E por ta na nos fabor i rekordá e aliansa ku El a sera ku nos antepasadonan i aplastá e ehérsito akí awe, pa nos mira ku nos mes wowo. 11E ora ei tur pueblo lo haña sa ku ta Un tin ku ta libra i salba Israel.’
12Ora e strañeronan a mira ku e hudiunan tabata bini riba nan, 13nan a sali for di kampamentu pa kuminsá bringa. E sòldánan di Hudas a supla tròmpèt i ataká. 14Nan a derotá e paganonan ku despues a hui bai den sabana. 15Pero esnan ku no por a hui dje lihé ei, e hudiunan a mata ku spada. E persekushon a sigui plama te Guèzèr i te den sabananan di Idumea, Ashdod i Yamnia. Di e paganonan a muri mas o ménos 3000 sòldá.
16Ora Hudas i su ehérsito a regresá di e persekushon, 17el a bisa su sòldánan: ‘Saka botin fo'i boso kabes, tin un bataya mas ta warda nos, 18Gorgias ku su ehérsito ta den serunan no muchu leu for di nos. Ban enfrentá nos enemigunan i bringa kontra nan, despues boso por poderá libremente di e botin.’
19Hudas no a kaba di papia ku ata un grupo di sòldá a aparesé ku tabata wak abou for di riba e serunan. 20Nan a ripará ku e hudiunan a kore ku e ehérsito i a pega e kampamentu di e ehérsito na kandela. E huma ku nan a mira a reda nan esaki. 21Nan a spanta mashá i ora nan a ripará tambe ku e ehérsito di Hudas tabata den sabana kla pa bataya, 22tur a hui bai pais di filisteo.
23Hudas a bai bèk pa sakia e kampamentu; nan a haña oro i plata, tela püs i kòrá püs i hopi otro rikesa mas komo botin. 24Na kaminda pa bolbe kas, nan tabata kanta un kantika di alabansa i gratitut pa Shelu:
‘Yama danki na Señor,
komo E ta bon,
su amor ta eterno.’#1 Krónikanan 16:34; 2 Krónikanan 5:13; 7:3; Esdras 3:11; Salmo 136:1; Yeremías 33:11; Daniel 3:89-90
25E dia ei Israel a keda salbá na un manera grandioso.
Viktoria riba Lisias
(2 Makabeonan 11:1-12)
26E strañeronan ku a skapa a bin konta Lisias tur loke a sosodé. 27Ora Lisias a tende e kosnan akí, el a keda tur turdí i a pèrdè kurashi pasobra no a bai manera e tabata ke ku Israel i kosnan no a resultá manera rei a ordená. 28Den e siguiente aña el a hür 60.000 sòldá bon itrein i 5000 sòldá di kabayeria pa kaba ku e hudiunan. 29Dia nan a invadí Idumea i a lanta nan kampamentu na Bet-Sur, Hudas a sali bai kontra nan ku 10.000 sòldá.
30Ora Hudas a mira kon grandi e ehérsito tabata, el a resa: ‘Sea alabá, Salbador di Israel, Abo ku pa medio di bo sirbidó David#1 Samuel 17 a para atake di e gigante i a entregá ehérsito di filisteonan den man di Yonatan, yu di Saul, i den man di su kargadó di arma.#1 Samuel 14:1-15 31Entregá di mes manera e ehérsito akí tambe den man di bo pueblo Israel i laga kara di e ehérsito akí keda na bèrgwensa, ku tur su poder i su kabainan. 32Hinka spantu den nan kurpa, laga nan arogansia disparsé ora nan derota pinta nan dilanti. 33Tumba nan ku spada di esnan ku ta stima Bo, e ora ei tur ku konosé bo nòmber lo kanta bo alabansa.’
34E ehérsitonan a kuminsá bringa. Den bataya hòmber kontra hòmber Lisias a pèrdè mas o ménos 5000 sòldá. 35Ora el a ripará ku su ehérsito tabata sufri derota i ku esun di Hudas tabata yen di kurashi i dispuesto pa biba òf muri ku honor, el a bai Antiokia bèk. El a buska sòldá pa por invadí Huda atrobe ku un ehérsito muchu mas fuerte.
Ta purifiká tèmpel i bolbe konsagr'é (Hanuká)
(2 Makabeonan 10:1-8)
36E ora ei Hudas i su ruman hòmbernan a bisa: ‘Nos a derotá nos enemigunan, laga nos ban awor pa purifiká tèmpel i bolbe konsagr'é.’ 37E ehérsito kompleto a bini huntu i a forma un proseshon pa subi seru di Sion. 38Ora a mira kon bandoná tèmpel tabata, ku e altá di sakrifisio di kandela profaná, e portanan destruí dor di kandela, e plenchinan yen di mata shimaron manera den mondi òf riba un seru, e salanan tur destruí,#Salmo 74 39nan a sker nan paña, kuminsá lamentá ku stèm duru, stroi shinishi riba nan kurpa, 40benta nan mes plat abou na suela i riba señal di tròmpèt nan a sklama duru na shelu.
41Mesora Hudas a duna su sòldánan òrdu pa ataká e fòrti miéntras e tabata purifiká tèmpel. 42Despues el a skohe saserdotenan ku tabata ireprochabel i fiel na lei 43pa nan purifiká e tèmpel i hiba e piedranan ku kua a profaná tèmpel, un lugá impuru. 44Nan a deliberá kiko nan mester a hasi ku e altá di sakrifisio di kandela profaná. 45Nan a haña un bon idea di kibra e altá impuru ya nunka mas lo e no ta un bèrgwensa pa hudiunan. 46Nan a kibra e altá i nan a pone e piedranan un banda riba seru di tèmpel, na un lugá adekuá en espera di un profeta ku lo disidí kiko ta hasi ku nan. 47E ora ei nan a kohe piedra ku no tabata ikap,#Éksodo 20:25; Deuteronomio 27:5-6 manera lei ta preskribí i nan a traha un altá nobo meskos ku esun anterior. 48Despues nan a rekonstruí e santuario i parti paden di tèmpel i nan a purifiká e plenchinan. 49Nan a traha e ophetonan sagrado di nobo i a bolbe hinka e kandelar, e altá di sakrifisio di kandela, e altá pa kima sensia i e mesa pa pone pan konsagrá#Éksodo 25:23-39; 30:1-5 den tèmpel. 50Nan a kima sensia riba e altá i a sende e lampinan di e kandelar;#Éksodo 30:7-8 tèmpel tabatin lus. 51Tambe nan a pone pan#Génesis 2:2 #Éksodo 25:30 riba e mesa i a kologá e kortinanan. Ku esaki nan tabata kla ku tur nan trabou.
52Riba dia 25 di e di nuebe luna, luna di Kisleu den aña 148 #4:52 Aña 148 ta korespondé ku aña 164 promé ku Kristu. 53nan a lanta mainta trempan i a ofresé un sakrifisio riba e altá nobo di sakrifisio di kandela ku nan a traha, manera lei#Levítiko 1 ta preskribí. 54Riba e mesun dia na e mesun ora ku e paganonan a profaná e altá, e hudiunan a bolbe konsagr'é.#1 Makabeonan 1:54 Nan tabata kanta, kompañá pa muzik di siter, lira i simbal. 55Henter pueblo a benta su mes abou na suela den adorashon i a alabá Shelu ku a pone nan logra. 56Ocho dia largu nan a selebrá e fiesta di konsagrashon di altá. Yen di alegria nan a ofresé sakrifisio di kandela, di alabansa i di gratitut. 57Nan a dòrna fachada di tèmpel ku buibort i eskudo di oro, nan a restourá e portanan di entrada i e kambernan di saserdote i a pone e blatnan nobo pa porta. 58Tabata reina alegria grandi den pueblo pasobra a kita e bèrgwensa ku e paganonan a pone na nan kara.
59Despues di a deliberá ku su rumannan i henter komunidat di Israel, Hudas a stipulá ku miéntras nan ta na bida, tur aña kuminsando dia 25 di luna di Kisleu#Huan 10:22 nan mester selebrá e Fiesta di Konsagrashon di Altá, ocho dia largu, kontentu i alegre.
60Den e tempu ei tambe nan a reforsá seru di Sion ku un muraya altu i torennan fuerte rondó di dje pa evitá ku e paganonan por a bolbe profaná e santuario. 61Hudas a pone un grupo di sòldá na warda einan. Spesialmente Bet-Sur el a reforsá pa e pueblo tin un fòrti pa banda di Idumea.
Currently Selected:
1 Makabeonan 4: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013