1 Makabeonan 2
2
Resistensia
1Den e tempu ei Matatías, yu di Huan i ñetu di Simeon, un saserdote desendiente di Yoyarib,#1 Krónikanan 24:7; Nehemías 11:10 a bandoná Herusalèm i a bai biba na Modein. 2E tabatin sinku yu hòmber: Huan, konosí komo Gadi, 3Simon, konosí komo Tasi, 4Hudas, yamá Makabeo, 5Eleazar, yamá Avaran, i Yonatan, yamá Afus.
Lamento pa e siudat santu
6Ora Matatías a mira e aktonan di blasfemia ku tabata tuma lugá na Hudea i na Herusalèm, 7el a bisa:
‘Ai di mi, pakiko mi a nase
pa mi mester mira ruina di mi pueblo
i di e siudat santu?
Mi mester keda sinta aki, man krusá,
miéntras e siudat ta den man enemigu,
i tèmpel ta den man strañero?
8Tèmpel a bira manera un hòmber sin honor.
9Nan a bai ku tur su ophetonan magnífiko di uso.
Nan a mata su yu chikitunan riba su plenchinan,
su yònkumannan a kai pa spada enemigu.
10Tin un pueblo ku no a konkistá su palasionan
i no a poderá di su botin?
11Nan a kita tur su prenda for di dje;
un ten un muhé liber, awe el a bira katibu.
12Mira, nan a destruí nos santuario,
un ten nos bunitesa i gloria,
paganonan a profan'é.#Salmonan 74:3-7; 79:1
13Pakiko sigui biba?’
14Matatías i su yu hòmbernan a sker nan paña, bisti paña di saku i tene rou pisá.
Matatías ta rebeldiá
15Un dia e funshonarionan di rei, ku mester a obligá e pueblo stòp di kumpli ku lei, a bini e siudat Modein pa ofresé sakrifisio. 16Hopi israelita a bai serka nan. Matatías i su yu hòmbernan tambe mester a bai.
17E funshonarionan di rei a bisa Matatías: ‘Bo ta un lider ku fama i bon nòmber den e siudat akí i bo yunan i ruman hòmbernan ta pará bo tras. 18Abo bini dilanti promé i kumpli ku e òrdu di rei manera tur e otro pueblonan i hendenan di Hudea i esnan ku a keda atras na Herusalèm tambe a hasi. E ora ei bo i bo yu hòmbernan lo pertenesé na e grupo di faboritonan di rei. Tambe nan lo honra abo i bo yu hòmbernan ku oro i plata i hopi otro regalo mas.’
19Pero Matatías a rospondé na bos altu: ‘Asta ora tur e pueblonan ku ta kai bou di rei obedes'é, bira lomba pa religion di nan antepasadonan i skohe pa kumpli ku òrdu di rei, 20ami, mi yu hòmbernan i mi ruman hòmbernan sí ta keda fiel na e aliansa di nos antepasadonan. 21Dios warda nos di neglishá lei i mandamentunan. 22Nos no ta obedesé òrdu di rei i desviá ningun banda di nos religion.’
23Ora Matatías a kaba di papia un hòmber hudiu a bini dilanti i den presensia di nan tur el a kima sensia riba altá di Modein manera rei a ordená. 24Ora Matatías a mira loke a sosodé, el a bira furioso, su sanger a herebé, un rabia hustifiká a drent'é; el a bai i dal e hòmber mata riba e altá di dios falsu. 25Djei el a bira mata e funshonario di rei tambe, ku a bini pa obligá e pueblo ofresé sakrifisio i el a destruí e altá di dios falsu. 26El a sali na defensa di lei meskos ku Pinhas a hasi kontra Zimri, yu hòmber di Shalum.#Numbernan 25:6-15
27Despues Matatías a grita duru den henter siudat: ‘Tur hende ku ke defendé lei i ku ta fiel na e aliansa sigui mi!’
28E mes i su yu hòmbernan a hui bai den seru. Nan a bai laga tur loke nan tabatin atras den siudat.#2 Makabeonan 5:27
Resistensia pasivo
29Den e tempu ei hopi hòmber ku ker a atené nan estriktamente na lei a bai biba leu den desierto 30ku nan kasá, nan yu i nan bestianan di kria, pasobra nan tabata biba bou di opreshon pisá.
31E funshonarionan di rei i e divishon di ehérsito ku tabata na Herusalèm, e siudat di David, a haña e siguiente rospondi: ‘Tin un grupo di hende ku no ke obedesé rei i nan a bai skonde den desierto.’ 32E ora ei e funshonarionan a sali ku hopi sòldá tras di e hudiunan, buska nan i lanta nan kampamentu enfrente di nan. E sòldánan a forma un kareda i para kla pa bringa ku nan riba sabat.#2 Makabeonan 6:11 33E funshonarionan a bisa nan: ‘Basta awor! Sali i obedesé òrdu di rei, asina boso ta salba boso bida.’ 34Pero nan a kontestá: ‘Nos no ta sali ni obedesé òrdu di rei; si nos hasi esei nos ta profaná sabat.’#Éksodo 20:8-11
35Mesora e sòldánan a kuminsá ataká nan. 36Pero e hudiunan no a resistí, nan no a tira ningun piedra riba e sòldánan ni blòkia e lugánan kaminda nan tabata skonde. 37Nan a bisa: ‘Laga nos tur muri ku un konsenshi limpi, shelu i tera ta nos testigu ku boso no tin niun derechi di mata nos.’
38Asina ta ku e sòldánan a ataká riba sabat. E hudiunan, nan kasá-, yu- i bestianan a muri. Na tur un mil hende asina a pèrdè nan bida.
39Ora Matatías i su amigunan a tende loke a pasa, nan a tene rou pisá. 40Despues nan a bisa otro: ‘Si nos tur hasi meskos ku nos rumannan i no bringa kontra e pueblonan pagano pa defendé nos bida i nos leinan, pronto nan lo bari nos for di riba mundu.’ 41E dia ei nan a yega na e desishon: ‘Ken ku ataká nos riba sabat, nos tambe ta bringa; asina nos tur no ta muri meskos ku nos rumannan a muri kaminda nan tabata skondí.’
Tin desaroyo den e lantamentu
42Den e tempu ei partido di e hasideonan a djòin e hudiunan. Nan tabata israelitanan balente, ku tabata defendé lei ku alma i kurpa. 43Tambe tur esnan ku ker a skapa di e mizeria akí a djòin i reforsá e grupo di Matatías. 44Asin'ei nan a forma un ehérsito i den nan rabia nan a dal e paganonan mata; den nan furia nan a mata tambe e hudiunan ku a stòp di kumpli ku lei. Esnan ku a sobra a hui bai e pueblonan rondó di nan pa skapa nan bida. 45Matatías i su amigunan a pasa tur kaminda den pais i basha altánan di diosnan falsu abou. 46Ku violensia nan a sirkunsidá tur mucha hòmber sin sirkunsishon ku nan a haña na Israel. 47Nan a persiguí e funshonarionan arogante di rei i tur kos a bai bon. 48Di e manera akí nan a protegé lei kontra pueblonan i reinan pagano i nan no a baha kabes pa e malechor Antíoko.
Último palabranan di Matatías
49Ora Matatías a ripará ku su dianan tabata kontá, el a bisa su yunan: ‘Nos ta biba den un tempu di arogansia i insulto; Señor ta furioso riba nos i ta kastigá nos duru. 50P'esei, mi yunan, defendé lei i duna boso bida pa e aliansa ku nos antepasadonan a sera. 51Kòrda e kosnan ku nan a hasi ten di nan ten, i trata di haña gran honor i fama inmortal pa boso mes.
52Abraham a mustra di ta fiel, ora Dios a pon'é na prueba i p'esei Dios a konsider'é un hende hustu.#Génesis 15:6; 22:15-18; Hakobo 2:21-23
53Na momento di tentashon, Jozef a kumpli ku lei i el a bira gobernador di Egipto.#Génesis 39:7-10; 41:40-41
54Nos antepasado Pinhas a sali na defensa di lei i p'esei el a haña e siguransa ku tarea di saserdosio lo keda den su famia pa semper.#Numbernan 25:6-15; 1 Makabeonan 2:26
55Yozue a kumpli ku su mishon, p'esei el a bira hues di Israel.
56Kaleb a duna su testimonio dilanti henter e komunidat, p'esei el a heredá un pida tereno.#Numbernan 13:1—14:12,24; 26:65; Yozue 1:1-9
57Pa motibu di su dedikashon, David a heredá trono real#2 Samuel 7 pa semper.
58Pasobra el a sali na defensa di lei,#2 Reinan 2:11 Elías tabata tumá na shelu,#1 Reinan 19:10,14
59Hananías, Azarías i Mishael tabata konfia den Dios, p'esei nan a skapa for di kandela.#Daniel 3
60Daniel tabata inosente, p'esei el a skapa di boka di leon.#Daniel 6:1-24; Daniel 14:30-42
61Asina boso por mira di nos antepasadonan ku ken ku pone su konfiansa den Dios, lo no tambaliá ningun momento.
62No tene miedu di palabranan di un malechor, pasobra su gloria ta bira mèst pa bichi.
63Awe e ta sali,
mañan e no t'ei mas;
e ta bolbe bira stòf,
su plannan ta kaba na nada.#Salmo 37:1-2,10,35-36
64Muchanan, sòru pa boso ta fuerte i balente, para firme ora ta trata asuntu di lei, esei lo pone boso haña gloria.
65Mi sa ku boso ruman Simeon ta un bon konsehero, tende di dje semper, lo e ta un tata pa boso. 66Hudas Makabeo, ku for di yòn tabata un sòldá balente, lo para na kabes di boso ehérsito. E lo guia e guera kontra paganonan. 67Reuní tur e hendenan ku ta kumpli ku lei rondó di boso, 68e ora ei boso por venga nos pueblo i paga e paganonan bèk loke nan a hasi ku nos. Kumpli ku mandamentunan di lei.’
69Despues Matatías a bendishoná nan i a muri. 70Matatías a bai sosegá na aña 146.#2:70 Aña 146 ta korespondé ku aña 166 promé ku Kristu. Su yu hòmbernan a der'é den graf di su antepasadonan na Modein i henter Israel a tene un temporada di rou pisá p'e.
Currently Selected:
1 Makabeonan 2: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013