Bokin’i Daniela 14
14
I BELA SY ILAY BIBILAVA
I Daniela sy ireo mpisoron’i Bela
1Ary i Daniela nihinana teo amin’ny latabatry ny mpanjaka, ka nahazo haja mihoatra ny sakaizany rehetra.
2Tamin’ny Babilônianina, dia nisy sampy anankiray atao hoe Bela#14,2 Bela: Mpanjaka fahiny tao Babilôna, ka nony efa maty izy, dia natsangan’ny vahoakany ho isan’ireo andriamanitra., izay nandaniana lafarina 12 artaba#14,2 Artaba: famarana fampiasa tany Babilôna izay misy 72 setiera (raha araka ny filazan’i Masindahy Epifana sy i Masindahy Isidore de Séville) fa samy hafa be ihany ny fatrany araka ny filazan’ny sasany., ondry 40, ary divay enina metreta#14,2 Metreta: Izany hoe, famarana amin’ny teny grika, dia angamba ilay mahalany 72 setiera, fa tsy ilay an’ny Rômanina 88 setiera. isan’andro. 3Ny mpanjaka koa nanaja an’io sy nandeha nivavaka taminy isan’andro; fa i Daniela kosa nivavaka tamin’Andriamanitra. Ka hoy ny mpanjaka taminy: «Nahoana ianao no tsy mba mivavaka amin’i Bela?» 4Dia hoy ny navaliny azy: «Satria tsy mba izay sampy nataon’ny tanan’olombelona, fa ilay Andriamanitra velona, Izay nahary ny lanitra sy ny tany sady manam-pahefana amin’ny nofo rehetra ihany no ankalazaiko.» 5Ary hoy ny mpanjaka taminy: «Ataonao fa tsy zavatra velona va i Bela? Tsy hitanao va ity zavatra rehetra haniny sy sotroiny isan’andro?» 6Sady nitsiky i Daniela no namaly hoe: «Aoka tsy ho diso hevitra amin’izany ianao, ry mpanjaka; fa fotaka ny ao anatin’izy io, ary varahina ny ivelany, ka tsy mbola nihinana na inona na inona izy.» 7Tezitra ny mpanjaka ka niantso ireo mpisoron’i Bela sy nanao taminy hoe: «Raha tsy lazainareo amiko izay mihinana ireny fanatitra ireny dia maty ianareo; 8fa raha voasehonareo amiko kosa fa i Bela no mihinana ireny dia i Daniela no maty, satria niteny ratsy an’i Bela izy.»
9Ary nisy 70 lahy ny mpisoron’i Bela afa-tsy ny vady aman-janany#14,9 Aman-janaka: Ny lazaina amin’izany, dia ny ankizy rehetra na kely na lehibe.. Dia nankany amin’ny tempolin’i Bela ny mpanjaka sy i Daniela. 10Ka hoy ireto mpisoron’i Bela: «Izahay handeha hivoaka; fa ianao kosa, ry mpanjaka, asaovy apetraka ny hanina, ary asaovy aroso ny divay rehefa voaharoharo#14,10 Divay efa voaharoharo: Araka ny fanaon’ny taloha, dia asiana rano na zava-manitra ny divay (Ohab 9,2)., dia hidio ny varavarana, sady asio tombokase amin’ny fanombohan-kasenao. 11Ary rahampitso maraina, rehefa miditra ianao, ka hitanao fa tsy lanin’i Bela izany rehetra izany, dia ho faty izahay, na hoe i Daniela no ho faty kosa, fa nandainga namely anay.» 12Tsaroany tao an-tsainy fa nasiany fidirana miafina tao ambany latabatra, ka teo mandrakariva no nidirany sy nahatongavany handany ny fanatitra. 13Nony nivoaka izy ireo, ka efa nasain’ny mpanjaka napetraka teo anoloan’i Bela koa ny hanina, i Daniela kosa, nandidy ireo mpanompony hitondra lavenona, ary naeliny manerana ny Tempoly teo anatrehan’ny mpanjaka irery ihany, vao nivoaka izy ireo, dia nohidiany ny varavarana, sady nasiany tombokase tamin’ny fanombohan-kasen’ny mpanjaka, dia lasa nandeha izy. 14Ny mpisorona kosa nony alina, niditra araka ny fanaony, niaraka tamin’ny vadiny aman-janany, dia nihinana sy nisotro izay rehetra teo. 15Nifoha maraina koa ny mpanjaka, ary i Daniela koa. 16Ary hoy ny mpanjaka: «Tsy nahafahana va ny tombokase, ry Daniela?» Hoy ny navaliny hoe: «Tsy nahafahana, ry mpanjaka ô.» 17Raha vao novohain’ny mpanjaka ny varavarana, ka nojereny ny latabatra, dia niantso izy tamin’ny feo avo nanao hoe: «Lehibe ianao, ry Bela ô, sady tsy misy fitaka aminao.» 18Latsaky ny hehy anefa i Daniela, ary notazoniny tsy handroso alohaloha kokoa ny mpanjaka, nilazany hoe: «Jereo ny gorodom-bato, diniho fa dian’iza ireo?» 19Ka hoy ny mpanjaka: «Dian-dehilahy sy zaza amam-behivavy no hitako», sady tezitra mafy izy. 20Ary nasainy nosamborina ireo mpisorona, mbamin’ny vady aman-janany, dia nasehon’ireo azy ny varavarana miafina nidirany sy nahatongavany hihinana izay teo ambony latabatra. 21Nasainy novonoina ho faty izy ireo, ary i Bela natolony eo am-pelatanan’i Daniela, dia noravany hatramin’ny tempoliny.
I Daniela mamono ilay Bibilava
22Nisy dragona lehibe koa, ary nankalazain’ny Babilônianina. 23Ka hoy ny mpanjaka tamin’i Daniela: «Hataonao hoe varahina koa va io? Jereo fa velona izy, mihinana sy misotro izy. Koa amin’izao tsy ho azonao lazaina fa tsy andriamanitra velona izy io.» 24Fa hoy ny navalin’i Daniela: «Mivavaka amin’ny Tompo Andriamanitro aho; satria Izy no Andriamanitra velona, fa ity tsy andriamanitra velona akory. 25Aoka ianao, ry mpanjaka ô, hanome alalana ahy fa hovonoiko tsy amin-tsabatra na tehina io dragona io.» Hoy ny mpanjaka: Omeko àlalana ianao. 26Dia nalain’i Daniela ny ditin-kazo sy ny sabora ary ny volo, nataony indray mahandro ireo dia novolavolainy ho boribory vao natsipiny tao am-bavan’ity dragona. Ka niatatra ny dragona. Dia hoy izy: «Io ilay nankalazainareo!»
27Nony nandre izany ny Babilônianina dia nirehitra mafy ny fahatezerany, ka nivory hanohitra ny mpanjaka izy, sy nanao hoe: «Tonga Jody ny mpanjaka, fa i Bela noravany, ny dragona nasainy novonoina; ary ny mpisorona naripany.» 28Koa nankao amin’ny mpanjaka izy ireo, dia nanao taminy hoe: «Atolory anay i Daniela fa raha tsy izany, ianao sy ny ankohonanao no hataonay maty.» 29Hitan’ny mpanjaka, fa niantoraka taminy tamin-kasiahana izy ireo.
I Daniela tao an-davaky ny liona
30Natsipiny tao an-davaky ny liona izy, dia nipetraka tao henemana. 31Liona fito no tao an-davaka, vatana roa#14,31 Vatana roa: Angamba vatan’olombelona izay nohelohin-ko faty izany. sy ondry roa isan’andro no fanome azy ireo; nefa tsy nomena izany fihinany izany izy ireo tamin’izay, mba hihinanany an’i Daniela.
32Tany Jodea kosa, i Habakoka#14,32 I Habakoka: I Habakoka mpaminany dia tsy tokony ho velona tamin’ny andro nanjakan’i Sirosa, fa olon-kafa mitondra ny anarany no tondroina eto., mpaminany, tamin’izany andro izany, nony avy nahandro koba izy, sy namotipotika mofo tao anaty vilany dia nankany an-tsaha izy, nitondra izany ho an’ny mpijinja variny. 33Fa hoy ny Anjelin’ny Tompo tamin’i Habakoka hoe: «Ento mankany Babilôna iny sakafonao entinao iny, ho an’i Daniela ao an-davaky ny liona.» 34Ary hoy i Habakoka: Tsy mbola nahita an’i Babilôna akory aho, tompoko, ary tsy fantatro akory izany lavaka izany. 35Dia noraisin’ny Anjely avy eo an-tampon-dohany izy ka nentiny tamin’ny volon-dohany tamim-pahafainganana indrindra, araka ny fomban’izy fanahy, ary napetrany tao Babilôna, teo ambonin’ilay lavaky ny liona. 36Ary i Habakoka niantso hoe: «Ry Daniela mpanompon’Andriamanitra ô, raiso ny sakafo alefan’Andriamanitra ho anao.» 37Ka hoy ny navalin’i Daniela: «Andriamanitra ô, tsarovanao tokoa aho, fa tsy mandao an’izay tia Anao Ianao.» 38Dia nitsangana hihinana i Daniela. Ary nataon’ny Anjely tao amin’ny fitoerany indray, niaraka tamin’izay, i Habakoka.
39Nony tamin’ny andro fahafito, tonga ny mpanjaka hitomany an’i Daniela; nanatona ny lavaka izy, dia nijery ary indro i Daniela nipetraka teo afovoan’ny liona. 40Niantso izy tamim-peo avo hoe: «Lehibe Ianao, ry Tompo Andriamanitr’i Daniela, ary tsy misy hafa, afa-tsy Ianao ihany!» 41Dia noesoriny avy tao an-davaky ny liona izy. Ary ireo nitady hahafaty azy kosa no nasainy natsipy tao, ka voarapaka vetivety foana, teo imasony. 42Tamin’izany ny mpanjaka nanao hoe: «Aoka ny mponina rehetra eran’ny tany rehetra hatahotra ny Andriamanitr’i Daniela; fa Izy no Mpamonjy, Izy no manao famantarana amam-pahagagana eto ambonin’ny tany; Izy no nanafaka an’i Daniela tao an-davaky ny liona.»
Currently Selected:
Bokin’i Daniela 14: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.