2Makabeo 2
2
Nafenin’i Jeremia ny zava-masina momba ny fivavahana
1Hita tao amin’ny fitahirizan-taratasim-panjakana, ny nandidian’i Jeremia#2,1 i Jeremia, dia mpisorona tany Jerosalema, sady anisan’ireo mpaminany malaza tao amin’ny Jody (Jer 11,21). Lehilahy masim-pitondran-tena hatramin’ny fahazazany izy, ka ambara-pahafatiny. An’isan’ny tratran’ny fanenjehana izy, ka lasa babo koa. Ny taratasy lazaina eto, mbola teo am-pelatanan’ny Jody, tamin’ny andro nanoratana ity boky ity, fa efa very izao ka tsy hita intsony. an’ireo nasesitany, haka ny afo masina araka ny voalaza, sy ny namporisihan’ny mpaminany an’ireo voasesitany, 2tamin’ny nanolorany azy ny bokin’ny lalàna anankiray mba tsy hanadino ny didin’ny Tompo sy tsy hirebireby saina amin’ny fahitana ny sampy volamena sy volafotsy mbamin’ny ravaka itafian’ireny. 3Anisan’ny teny toy izany nolazainy tamin’izay ireny, dia ny namporisika azy tsy hampanalavitra ny fony na oviana na oviana ny lalàna.
4Hita tao anatin’izany taratasy izany koa, ny nampitondran’ny mpaminany niaraka taminy, ny tabernakla#2,4 Tabernakla: Ilay Tabernakla nampanaovin’i Môizy (1490 taona talohan’i Jesoa Kristy), dia notahirizina tao amin’ny tempoly tao Jerosalema (Mp 8,4)., sy ny fiara, araka ny didy azony tamin’Andriamanitra, sy ny nankanesany amin’ny tendrombohitra nanihin’i Môizy sy nitazanany ny lovan’Andriamanitra. 5Nony mby teo, nahita trano mitarehin-johy i Jeremia, ka napetrany tao ny tabernakla sy ny fiara mbamin’ny ôtely fandoran-java-manitra, dia notampenany ny vavan’io. 6ary ny sasany tamin’ireo namany niverina hanisy marika famantarana ny làlana, nefa tsy nahazo nahita an’io. 7Fantatr’i Jeremia izany, ka nomeny tsiny ireo: «Tsy maintsy miafina hatrany hatrany izany fitoerana izany, hoy izy taminy, mandra-pahatongan’ny hamorian’Andriamanitra ny vahoakany, sy hamindrany fo aminy. 8Amin’izay vao hambaran’ny Tompo ireo zava-masina ireo, sady hiseho ny voninahitry ny Tompo, mbamin’ny rahona#2,8 Rahona. Rahona mamirapiratra maneho ny voninahitr’Andriamanitra. Tamin’ny andron’i Môizy dia: a) Nisy rahona tao ambonin’ny fiaran’Andriamanitra. b) Nisy rahona nitari-dalana ny zanak’i Israely. d) Nisy rahona tamin’ny tabernakla. - Tamin’ny andron’i Salômôna indray, rehefa nitokanana ny tempoly dia nisy rahona fotsy nanjopiaka nameno ny atiny., toy ny nisehoany tamin’ny andron’i Môizy, sy fony i Salômôna nanao fivavahana mba ho voahasina amim-boninahitra ny tempoly.» 9Voatantara ao koa fa izany mpanjaka manana ny fahendrena izany, dia nanatitra ny soron’ny fitokanana amam-pahavitan’ny fitoerana masina. 10Ary toy ny nivavahan’i Môizy tamin’ny Tompo, ka nilatsaka avy any an-danitra ny afo sy nandevona ny sorona, toy izany koa nivavaka i Salômôna#2,10 Nivavaka i Salômôna dia latsaka ny afo: Tamin’ny fitokanan’i Salômôna ny Tempoly, dia nisy afo avy any an-danitra nandevona sahady ireo biby ndeha hatao fanatitra hodorana (1Mp 8,11; 2Tan 6,14). Ka izany no porofo fa ankasitrahin’Andriamanitra ny manaja sy manome voninahitra ny Tempoly, misy ny fiara, izay tandindon’ny Eglizy ipetrahan’ny Eokaristia Masina. - Ny nivavahan’i Môizy, Lev 10,16,17., dia nilatsaka ny afo avy any an-danitra nandevona ny sorona. 11Hoy i Môizy: «Satria tsy mba nohanina ny sorona noho ny ota, dia nolevonin’ny afo.» 12Ary toy izany no nankalazan’i Salômôna ny fitokanana nandritra ny havaloana.
Ny tahirim-bokin’i Nehemia
13Koa dia samy hita voatantara ireo zavatra ireo àry, na amin’ny taratasy fitahiry na amin’ny taratasy fitadidian’i Nehemia; hita ao koa ny nanorenan’i Nehemia fitahirizam-boky, sy nanangonany tao ny boky momba ny mpanjaka, ny mpaminany, sy ny an’i Davida, mbamin’ny taratasin’ny mpanjakan’i Persa, momba ny fanomezan’izy ireo. 14Toy izany koa i Jodasa nanangona ny boky rehetra niely patrana nandritra ny ady niadiantsika, ka eo an-tananay izany izao. 15Ka raha misy ilanareo amin’izany, maniraha olona hitondra azy ho atỳ aminareo.
Fanasana hankalazana ny fitokanana
16Koa amin’izany rehefa hankalaza ny fetin’ny fanadiovana izahay dia mampitondra ity taratasy ity ho atỳ aminareo; mety tokoa ny hankalazanareo izany andro izany. 17Andriamanitra izay efa namonjy ny vahoakany rehetra, sy efa namerina ho azy rehetra ny lova, ny fanjakana, ny fisoronana, ny fanamasinana, 18araka ny voalazany tamin’ny lalàna, dia antenaintsika fa hamindra fo amintsika vetivety foana sy hamory antsika avy amin’ny tany rehetra ambanin’ny lanitra, ho ao amin’ny fitoerana masina; 19satria ny tenantsika efa nesoriny tamin’ny loza lehibe, ary ny tempoly efa nodioviny#2,19 Tapitra eo ny taratasy faharoa nalefa ho an’ny Jodà any Ejipta; ary hatramin’ity andininy ity ka hatramin’ny faha-33 dia ny sasin-teny nataon’ny mpamorom-boky..
2. SASIN-TENIN’NY MPANORATRA
20Ny tantaran’i Jodasy Makabeo#2,20 Tantaran’i Jodasy Makabeo: Ny tantaran’ny nataony izy sy ny rahalahiny, ao amin’ny boky 1, dia ankevitry ny naharitra 37 taona (171-134 talohan’i Jesoa Kristy). sy ireo rahalahiny, ny nanadiovana ny Tempoly mendrika hohajaina sy ny nitokanana ny ôtely, 21ary koa, ny ady tamin’i Antiôkosy Epifana sy i Eopatôra zanany, 22ny fanampiana malaza avy amin’ny lanitra an’ireo niady tamim-boninahitra hiaro ny fivavahan’ny Jody, fa na dia vitsy isa aza izy ireo dia azony indray ny tany manontolo, nataony vaky nandositra ireo barbarianina sesehena; 23voaveriny ny fitoerana masina malaza eran’izao tontolo izao, voaoriny indray ny lalàna notadiavin’ny sasany hofoanana, fa nomba azy ny fitahiana rehetra avy amin’ny Tompo: 24boky dimy no nitantaran’i Jasôna#2,24 i Jasôna (amin’ny teny grika hoe Jôsoe), dia angamba izy ilay ambasadaoro nirahin’i Jodasy Makabeo tany Rôma (1Mak 8,17)? avy any Sirena an’izany rehetra izany; fa boky iray kosa no handramanay hanafohezana azy. 25Satria nodinihinay ny habetsahan’ny isa ao aminy sy ny fahasahiranana mahazo an’izay te-hamaky hatrany ny filazan’ny tantara, noho ny habetsahan’ny zavatra lazaina ao. 26Koa nikendry mafy izahay, mba hanjary mahafinaritra ny raharaha ho an’izay hianina amin’ny famakiana fotsiny, mora ho an’izay te-handatsaka amin’ny fitadidiana ny zava-niseho, ary mahasoa ho an’ny be sy ny maro tsy an-kanavaka. 27Ho anay izay niandraikitra izany asa fanafohezana izany, tsy dia zavatra mora fa asa nilam-pitsembohana sy fiaretan-tory izany. 28Tsy latsaka noho ny an’izay mandahatra ny fanasana#2,28 Mandahatra ny fanasana: Fomban’ny olona taloha ary ankehitriny koa, raha misy fanasana lehibe hatao, ny manendry olona hifidy ny lohanahandro haroso amin’ny latabatra mbamin’ny zava-pisotro koa, samy amin’ny fotoana mety avy, mba hahafa-po ny mpihinana rehetra. ary mitady hanasoa ny hafa ny hasarotany; kanefa mba ho mendrika ny hankasitrahan’ny maro anay, dia hizaka an-kafaliana izany asa mavesatra izany. 29Ka ny filazana marina ny zavatra tantaraina tsirairay avy, dia avelanay ho anjaran’ny mpamorona ny tantara, fa ny fitsipika momba ny ventin-teny no hikelezanay aina harahina kosa. 30Ny mahazo ny rafitra rehetra momba ny trano, dia adidin’ny tompo-mariky ny trano vao atao avokoa, fa ny mihevitra ny momba ny fampihaingoana azy kosa no tsy maintsy imasoan’izay miandraikitra ny handravaka sy hanoso-doko azy; ary torak’izany indrindra no anay izao, araka ny hevitro. 31Anjaran’ny manao ny tantara ny mamotopototra izay lazainy, ny milaza ny antonanton’ny zavatra rehetra, ny misahirana amin’ny momba ny andinindininy madinika indrindra aza; 32fa izay tsy mikendry afa-tsy ny hanoratra ny fotopotony kosa, dia tokony homen-dalana mba tsy hanampò afa-tsy ny handahatra amin’ny teny fohy; fa tsy mba ny filazana feno ny zava-niseho no imasoany.
33Hatombokay amin’izao àry ny fitantaranay, fa tsy hampianay intsony izay voalaza izay, fa hadalana raha alohan’ny hilazana ny tantara, lava teny; nefa amin’ny tena tantara, fohy teny.
Currently Selected:
2Makabeo 2: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.