Sɛ́núnywɛ́ 12
12
1Nǔgbó wɛ, yɛ towe e ɖe tɛgbɛ é ɖo nǔ bǐ mɛ.
Mawu dɔn tónú Kannáa tomɛ nu lɛ́ɛ ɖó jlɛ̌ jí
2Kpɛɖé kpɛɖé wɛ a nɔ dɔn tó nú mɛ e hu hwɛ lɛ́ɛ. A nɔ ɖɔ hwɛ e yě hu lɛ́ɛ nú yě, dó gba akpá nú yě. Hwenɛ́nu ɔ́, yě hɛn ɔ́, yě ná sɛ yi zɔ nú nǔ nyanya, lobo ná ɖi nǔ nú hwi Aklúnɔ. 3 Mɔ̌ wɛ a blǒ gbɔn nú mɛ e nɔ ayǐkúngban towe mímɛ́ ɔ́ jí ɖ'ayǐ lɛ́ɛ é. 4A gbɛ́ wǎn nú yě ɖó nǔ baɖabaɖa e yě nɔ́ wa lɛ́ɛ é wú: azě, vodúnnú wiwa, 5yɔkpɔ́vú huhu, gbɛtɔ́ lan ɖuɖu kpódó gbɛtɔ́ hun nunu kpán sín agbanɖutɛn, bɔ è nɔ ɖu káká yi jɛ adɔ e ɖo xomɛ é jí; mɛ e mɔ nǔ énɛ́ lɛ́ɛ sín awo nǔgbó nǔgbó lɛ́ɛ bǐ wɛ ɖó hǔn kpa yětɔn. 6Mɛjitɔ́ e nɔ́ hu vǐ e ma ɖó ahwanjɛmɛjítɔ́ ǎ nɛ́ lɛ́ɛ é ɔ́, a jlǒ ná vɔ yě bǐ ɖo daágbó mǐtɔn lɛ́ɛ sín alɔ wú. 7A jlǒ ɖɔ to élɔ́ e a yí wǎn ná hú to ɖě lɛ́ɛ bǐ é ní yí Mawu ví e jɛ xá, bó ná nɔ mɛ lɛ́ɛ é. 8 É ɖo mɔ̌ có a kú nǔbláwǔ nú mɛ énɛ́ lɛ́ɛ ɖésú, ɖó gbɛtɔ́ e yě nyí é wú. A sɛ́ gbɔ̌nvɛ ɖaxó ɖé lɛ́ɛ dó, bɔ yě jɛ nukɔn nú ahwangɔnu towe, bó ná dó gba yě dó kpɛɖé kpɛɖé. 9A hɛn ɔ́, a nǎ kó jó mɛ e gbɛ́ wǎn nú we nɛ́ lɛ́ɛ nyi mɛ e nɔ se tónú nú we lɛ́ɛ sín alɔ mɛ. A ka lɛ́ hɛn ɔ́, a nǎ gba adǎnkanlin baɖabaɖa lɛ́ɛ dó ɖo nukún xwixwe ɖokpó mɛ, ɖo mɛ nú má blá wǔ nú mɛ sín gbeɖiɖe ɖokpó mɛ, ɖo zalili ɖokpó géé mɛ. 10Lo ɔ́, gbɔn hwɛɖónúmɛ kpódó xomɛnyínyɔ́ towe kpán gbla mɛ ɔ́, a nǎ yě hwenu nú yě ná dó ya hwɛ yětɔn lɛ́ɛ ví, có a ka tunwun ɖɔ nǔnyanyawatɔ́ wɛ yě nyí, bɔ yě kún sɔ́ sixú húzú jijɔ gbeɖé ó. 11Nǔgbó ɔ́, kúnkan e è dǒ nu é wɛ yě kó nyí sín bǐbɛ́mɛ ɖokpóó.
Ényí a ma ɖó hwɛ nú yě ǎ ɔ́, mɛ ɖé wɛ dó xɛsi nú we wú wɛ ǎ. 12Nǔgbó ɔ́, mɛ̌ wɛ sixú glá kanbyɔ́ we ɖɔ: Ani a ka wa nɛ́? Mɛ̌ ká sixú xo gbeta towe nyi kɛ́n? Mɛ̌ wɛ ká ná jɛ hwɛ dó wǔ we, ɖó a vɔ togun e hwi ɖésú ɖó é wú? Mɛ̌ wɛ ka glá, bó ná yi hwɛɖɔxɔsá, bó ná nɔ mɛ nɛ́ lɛ́ɛ jí, bó ná ɖɔ hwɛ xá we? 13Mɛtí, ɖó hwɛ mɛ vo ɔ́, Mawu ɖě sɔ́ tíin, bó nɔ́ kpé nukún nǔ bǐ wú ǎ. A ma to nɔ dó hwɛ agɔ ǎ ɔ́, é jɛ xá nú a nǎ ɖe xlɛ́ ɛ ǎ. 14Axɔ́sú ɖě abǐ gǎn ɖě ká sɔ́ ɖe bó ná jɛ ahwan mɛ e a dɔn tó ná lɛ́ɛ é jí ǎ.
Mawu kpa acɛ ɖo wɛ̌kɛ́ ɔ́ nu kpódó hwɛjijɔ kpán
15Hwɛjijɔnɔ wɛ nú we, Aklúnɔ; nǔ e wú wɛ a nɔ kpa acɛ nú wɛ̌kɛ́ ɔ́ bǐ kpó hwɛjijɔ kpán é nɛ́. Hwɛɖónúmɛ e sɛ́nbá má ɖó ná xo ǎ é ɔ́, nyí nǔ bó jɛ xá gǎnhúnǔ towe ǎ. 16Nǔgbó ɔ́, hlɔ̌nhlɔ́n towe mɛ wɛ hwɛjijɔ towe wú kun sín; a nyɔ̌ xomɛ dó yě bǐ wú, ɖó hwi wɛ kpa acɛ nú nǔ bǐ. 17Mɛ e ma ɖi nǔ nú gǎnhúnǔ towe ǎ lɛ́ɛ kɛ́ɖɛ́ wɛ a nɔ ɖe gǎnhúnǔ towe xlɛ́, bɔ mɛ e nɔ kpɔ́n nukún mɛ nú we lɛ́ɛ ná bo tlɛ ɖe kúnnu nú gǎnhúnǔ towe ɔ́, a nɔ xwe nu yětɔn dó xɔ. 18Amɔ̌, hwi mɛ e ma nɔ kpɔ́n dó hlɔ̌nhlɔ́n e a ɖǒ ɔ́ wú dó wa nǔ ǎ é ɔ́, a nɔ ɖɔ hwɛ dó jlɛ̌ jí. A ɖo mǐ nu kpó xomɛnyínyɔ́ ɖaxó kpán, ɖó hwenu e é jló we ɔ́ wɛ a nɔ wa nǔ dó.
Mawu ná kplɔ́n ɖokpó togun tɔn
19Aklúnɔ, nǔ e kplɔ́n togun towe gbé wɛ a ja bó wa nǔ gbɔn mɔ̌ ɔ́ ɖíe: mɛ e nɔ se tónú nú we é ɖó ná yí wǎn nú gbɛtɔ́. A nǎ nukúnɖíɖó ɖaxó ɖé vǐ towe lɛ́ɛ, ɖó a nɔ zɔ́n bɔ hwɛ yětɔn lɛ́ɛ nɔ́ vɛ́ nú yě. 20Kú wɛ jɛ xá kɛntɔ́ vǐ towe lɛ́ɛ tɔn lɛ́ɛ, có a sɔ́ sɔxwixwe kpódó xomɛfífá kpán dó dɔn tó nú yě, ɖó a jlǒ ná ná hwenu kpódó wlɛnwín kpán yě nú yě ná jó dǎnúwiwa yětɔn dó. 21É ɖo mɔ̌ có a lɛ́ ɖó hwɛ nú vǐ towe lɛ́ɛ kpódó xomɛnyínyɔ́ ɖaxó ɖé kpán. Hwi wɛ jɛ akɔ xá tɔ́gbó yětɔn lɛ́ɛ, lobo dó nǔ ɖagbe bǐ kpá nú yě. 22A nɔ dɔn tó nú kɛntɔ́ mǐtɔn lɛ́ɛ ɖo alɔ bǐ jí bó ná dó ná kplɔ́n mǐ. Gbɔn mɔ̌ ɔ́, a ɖo kplɔ́nkplɔ́n mǐ wɛ ɖɔ mǐ ni nɔ flín xomɛnyínyɔ́ towe hwenu e mǐ ná ja hwɛ ɖó nú mɛ ɖě lɛ́ɛ gbé é, lobo ka ná gán jɛ nǔbláwǔkúnúmɛ towe wú, hwenu e a nǎ ja hwɛ ɖó nú mǐ gbé é.
Mawu nɔ́ dɔn tó nú kanlinsɛntɔ́ lɛ́ɛ
23Mɛ e ɖo lɛnzɔn yětɔn lɛ́ɛ mɛ ɔ́, yě zán gbɛ nyanya lɛ́ɛ é ɔ́, a sɔ́ kanlin baɖabaɖa e yě nɔ́ sɛn lɛ́ɛ é dó dó ya nú yě. 24Nǔgbó ɔ́, yě flú gbɔn ali e nɔ dɔn mɛ bú lɛ́ɛ é bǐ xo: kanlin baɖabaɖa, kan nylánylá e mɛ bǐ gbɛ́ wǎn ná lɛ́ɛ é wɛ yě sɔ́ dó ɖó nǔmɛsɛn yětɔn lɛ́ɛ ná, bó nɔ́ jó yě dó bɔ yě nɔ́ zán yɔkpɔ́vú ayimasɔgbenánɔ lɛ́ɛ ɖɔhun. 25Énɛ́ ɔ́, ɖi yɔkpɔ́vú ayimasɔgbenánɔ lɛ́ɛ ɖɔhun ɔ́, a dɔn tó nú yě dó gbɔ́ yě ko. 26Lo ɔ́, mɛ e ma mɔ nǔ jɛ tódɔnnúmɛ énɛ́ ɔ́ mɛ ǎ lɛ́ɛ ɔ́, Mawu ná ɖó hwɛ nú yě lě e é jɛ xá gbɔn é. 27Ɖó nǔ énɛ́ lɛ́ɛ bǐ wú wɛ bǎ e hɔn ná wɛ yě ɖe lɛ́ɛ wá xo yě. Kanlin nɛ́ lɛ́ɛ nɔ́ ɖo ya dó nú yě wɛ, bɔ yě nɔ́ ɖo xomɛ sin dó yě wɛ; kanlin nɛ́ lɛ́ɛ e cí nǔmɛsɛn ɖɔhun nú yě lɛ́ɛ wá ɖo tó dɔn nú yě wɛ. Énɛ́ ɔ́, lo wɛ nukún yětɔn wá hun, bɔ yě mɔ nǔ jɛ nǔ élɔ́ mɛ ɖɔ mɛ e yě ɖe kɔ dó ɖ'ayǐ é wɛ nyí Mawu nǔgbó nɛ́.
Currently Selected:
Sɛ́núnywɛ́ 12: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.