Sɛ́núnywɛ́ 10
10
SƐ́NÚNYWƐ́ KPÓDÓ TOGUN MAWU TƆN SÍN TAN KPÁN
(10—19)
1 Sɛ́núnywɛ́ ɔ́ cyɔ́n alɔ gbɛtɔ́ nukɔntɔn e Mawu ɖó e ɖóɖó é jí. Énɛ́ gúdo ɔ́, hwenu e é wá jɛ hwɛ mɛ é ɔ́, Sɛ́núnywɛ́ wɛ wá ɖe e sín mɛ, 2lobo ná ɛ acɛ ná dó nɔ nǔ bǐ nu.
3 Lo ɔ́, gbɛtɔ́ nyanya ɖé sɔ́ xomɛsin dó ɖe kɔ dó Sɛ́núnywɛ́ ɔ́. Lobɔ é kú, ɖó é jɛ ma bo hu nɔví tɔn wútu. 4 Éyɛ́ wú wɛ tɔ ɖaxó ɖé wá ɖi sin, bó cyɔ́n ayǐkúngban ɔ́. Sɛ́núnywɛ́ ɖokpó ɔ́ jɛ́n lɛ́ wá hwlɛ́n ɛ gán. É kplá gbɛtɔ́ tónú se nú Mawu tɔ́ ɔ́ gbɔn sin nukún mɛ kpódó tɔjíhún atín tɔn kpowun ɖé kpán.
5 Hwenu e akɔta lɛ́ɛ bǐ ɖó gbe kpɔ́, bó ná dó nǔ nyanya sin ɔ́, è dɔn tó nú yě, bɔ yě sixú se nǔ jɛ yěɖée gbe mɛ ǎ. Hwenɛ́nu ɔ́, Sɛ́núnywɛ́ mɔ gbejí nɔ nú Mawu tɔ́ ɖé, bó hɛn ɛ ɖó zɔ nú nǔwanyido bǐ. É ná ɛ hlɔ̌nhlɔ́n. Tónú se nú Mawu tɔn zɔ́n bɔ é ɖó wǎn yíyí nú Mawu hú gǎn wǎn yíyí e é ɖó nú xo tɔn mɛ ví é.
6 Hwenu e mɛ e nɔ ɖe kɔ dó Mawu lɛ́ɛ ɖo kúkú wɛ é ɔ́, Sɛ́núnywɛ́ ɖokpó ɔ́ jɛ́n lɛ́ hwlɛ́n tónú se nú Mawu tɔ́ ɖé gán. É kpé wú bó hɔn ɖo myɔ e ja dó toxo atɔ́ɔ́n lɛ́ɛ jí é nukɔn. 7Nǔwiwa mɛdídá énɛ́ lɛ́ɛ tɔn sín wuntun gěgé lɛ́ kpo ɖo ayǐ éhɔ́nmɛ. Ayǐkúngban xúxú e kpo ɖo azɔ si wɛ é, atín e sínsɛ́n yětɔn má nɔ́ myá gbeɖé ǎ é kpódó jɛgó-bócyɔ e nɔ́ flín nyɔ̌nu nǔmaɖitɔ́ ɖé é kpán . 8Ɖó mɛ énɛ́ lɛ́ɛ zɛ sín Sɛ́núnywɛ́ li jí. Hwenɛ́nu ɔ́, yě ji ɖagbe ma tunwun yětɔn sín ya. Hú mɔ̌ ɔ́, yě jó nǔ nyanya wiwa yětɔn lɛ́ɛ sín wuntun dó nyi ayǐ. Nǔ nyí mɔ̌ bónú nǔ nyanya wiwa yětɔn má bú nyǐ gbeɖé ó. 9Lo ɔ́, Sɛ́núnywɛ́ wá ɖe ɖɛ mɛsɛntɔ́ tɔn lɛ́ɛ sín awěxomɛ yětɔn lɛ́ɛ mɛ.
10 Tónú se nú Mawu tɔ́ ɖé hɔn jɛ gbě, bó ná dó sixú gló nɔví tɔn e ɖo xomɛ sin dó e wɛ lɛ́ɛ é. Sɛ́núnywɛ́ kplá ɛ gbɔn ali jlɔ́jlɔ́ ɖé jí, bó xlɛ́ ɛ axɔ́súɖuto Mawu tɔn, bó hun sinsɛnnú lɛ́ɛ xlɛ́ ɛ. É ná ɛ ɖuɖéjí ɖo azɔ̌ syɛ́nsyɛ́n tɔn mɛ, bó ná ɛ ajɔ gěgé ɖo gǎndídó tɔn lɛ́ɛ mɛ. 11Hwenɛ́nu lo ɔ́, mɛ e dɔkun myá nukún ná lɛ́ɛ nɔ́ ba ná wlɔ́ ɛ ɖu. Sɛ́núnywɛ́ ká dó alɔ ɛ, bó dó dɔkun dɔkun jí n'i. 12É cyɔ́n alɔ jǐ tɔn, bónú kɛntɔ́ tɔn lɛ́ɛ má kpé wǔ tɔn ó. É hwlɛ́n ɛ sín mɛ e ɖo mɔ ɖó n'i wɛ lɛ́ɛ lɔ mɛ, lobo ná ɛ ɖuɖéjí ɖo ahwan syɛ́nsyɛ́n ɖé mɛ, bónú é ná dó tunwun ɖɔ gbejí nɔ nú Mawu syɛ́n hú gǎn nǔ bǐ.
13 Hwenu e è sa gbɛtɔ́ e nɔ sí Mawu é ɖěvo é ɔ́, Sɛ́núnywɛ́ lɛ́ kɔ sín gǔdo tɔn ǎ, lo ɔ́ é hwlɛ́n ɛ ɖo hwɛ sí. 14Sɛ́núnywɛ́ jɛ te xwedó e byɔ́ dotɔ mɛ; é ɖe kɔ dó e hwenu e è zě e dó gǎn é ǎ; lo ɔ́, é ná ɛ axɔ́sú sín acɛkpikpa, bɔ éyɛ́ wú ɔ́, yě mɛ e dó ya syɛ́nsyɛ́n n'i lɛ́ɛ wá ɖo acɛ tɔn mɛ. Sɛ́núnywɛ́ bló mɔ̌, bó dó ɖe xlɛ́ ɖɔ nǔvúɖótɔ́ wɛ nyí mɛ e dó hwɛ agɔ n'i lɛ́ɛ é, lobɔ nyǐkɔ tɔn sɔ́ ná kpo sácí gbeɖé ǎ.
Nǔ e jɛ ɖo Ejípu tomɛ tíntɔ́n hwenu é (Akpá nukɔntɔn ɔ́)
a. Tíntɔ́n sín Ejípu tomɛ
15 Sɛ́núnywɛ́ ɖe togun mímɛ́ Mawu tɔn sín akɔta e ɖo acɛ kpa n'i wɛ é lɔ mɛ. 16Sɛ́núnywɛ́ byɔ́ mɛsɛntɔ́ Mawu tɔn ɖé sín ayi mɛ, lobo kpé ahwan xá axɔ́sú gláglá ɖé lɛ́ɛ. É ɖu ɖo yě jí gbɔn nǔjíwǔ e é jlɛ́ lɛ́ɛ gbla mɛ. 17É ná yě mɛ e nyí Mawu tɔn lɛ́ɛ ajɔ azɔ̌ syɛ́nsyɛ́n e yě wa lɛ́ɛ é tɔn, lobo kplá yě gbɔn ali ɖagbe ɖagbe ɖé jí. É húzú bibɛtɛn nú yě ɖo kéze mɛ, lobo ka nyí wěziza yětɔn ɖo zǎn mɛ. 18É bló bɔ yě xo Xu Vɔvɔ ɔ́ zlɛ́ sin ma xo afɔ, lobo kplá yě gbɔn agbetɔ awoyó tɛ́ntin. 19É syɔ́ kɛntɔ́ yětɔn lɛ́ɛ dó xu mɛ, bó xo cyɔ yětɔn lɛ́ɛ nyi agě jí. 20Hwenɛ́nu wɛ mɛ e nɔ se tónú nú Mawu lɛ́ɛ bɛ́ dɔkun mɛ e nɔ ɖe kɔ dó Mawu lɛ́ɛ tɔn. Yě ji han mlá nyǐkɔ mímɛ́ towe Aklúnɔ. Yě ɖó gbe kpɔ́, bó kpa susu nú gǎnhúnǔ towe e hwlɛ́n yě gán é. 21Ɖó Sɛ́núnywɛ́ hun nu nú ɖɛ̌títɛ́nɔ; é zɔ́n bɔ yɔkpɔ́vú lɛ́ɛ nɔ ɖɔ xó gbe lélé.
Currently Selected:
Sɛ́núnywɛ́ 10: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.