Silaki ví 24
24
SƐ́NÚNYWƐ́ KPÓDÓ SƐ́N Ɔ́ KPÓ
(24.1—32.13)
Kpikpa xógbe Sɛ́núnywɛ́ tɔn
1Sɛ́núnywɛ́ ɖésú ji kpikpa han nú éɖée;
togun tɔn Izlayɛ́li mɛ wɛ é tɛ afɔ tɔn ayǐ ɖe.
2Ɖo Nǔbǐwúkpétɔ́ ɔ́ sín agun mɛ ɔ́,
é ná yí xó ɖo nǔwúkpíkpé tɔn nukɔn;
é ná ɖe afɔtayǐ tɔn xlɛ́.
3É ɖɔ: “Nǔbǐwúkpétɔ́ ɔ́ sín nu mɛ wɛ un tɔ́n sín,
bɔ ahǔn ɖɔhun ɔ́, un cyɔ́n ayǐkúngban ɔ́ jí.
4 Un jɛ agban ɖó jǐ aga vóéé,
bɔ axɔ́súzinkpo ce jínjɔ́n akpɔ́kpɔ́ jí.
5Nyɛ ɖokpónɔ lɛ́ dó jǐnukúnsin ɔ́ kpé tó.
Un ɖi zɔnlin gbɔn xu lɛ́ɛ glɔ́.
6Un kpa acɛ dó xu e ɖo xixo wɛ é,
kpódó ayǐkúngban ɔ́ bǐ kpán jí,
un kpa acɛ dó togun lɛ́ɛ bǐ, kpó to lɛ́ɛ bǐ kpán jí.
7Yě bǐ gɔ́n wɛ un ba tɛnmɛ ɖe;
fí e ná nyí ce bɔ un ná jɛ agban ɖó é.
8Bɔ mɛ e ɖó wɛ̌kɛ́ ɔ́ bǐ ɔ́,
ɖɔ lě e un ná bló gbɔn ɔ́ nú mì;
mɛ e ɖó mì e xlɛ́ fí e un ná nɔ é mì.
É ɖɔ nú mì ɖɔ: ‘Jɛ agban ɖó Jakɔ́bu xwé;
ayǐkúngban e nyí towe ɔ́ ní nɔ Izlayɛ́li.’
9Sín bǐbɛ́mɛ, hwenu e gbɛ ɔ́ má kó tíin ǎ é ɖokpóó wɛ é kó ɖó mì,
bɔ un sɔ́ ná bú sín ayǐkúngban ɔ́ jí gbeɖé ǎ.
10Ɖo goxɔ mímɛ́ ɔ́ mɛ ɔ́, un xwlé vɔ̌sísá ɖo Nǔbǐwúkpétɔ́ ɔ́ nukɔn,
bó dó jɛ agban ɖó Sinyɔ́ɔ só ɔ́ jí.
11Aklúnɔ sɔ́ mì jínjɔ́n Jeluzalɛ́mu to e é yí wǎn ná é mɛ,
bɔ un vlɔ́n acɛkpikpa ce nyi ayǐ.
12Un dó ɖɔ do ɖo togun xɔ susu ɖokpó mɛ,
bó jínjɔ́n ayǐ ɖo Aklúnɔ ɔ́ sín ayǐkúngban jí.
13Fínɛ́ wɛ un su ɖe,
ɖi Libáan sín sɛ́dlutín ɖokpó ɖɔhun;
ɖi siplɛ́tín ɖɔhun ɖo Elimɔ só jí.
14Un su ɖi dětín e è dǒ ɖó gbětótló mɛ tɔ tó ɖo Ɛni-Gedi é ɖɔhun;
atín wǎnnɔ Lolié e ɖo Jeliko é ɖɔhun;
ɖi olívutín ɖagbe ɖé ɖɔhun ɖo ayǐkúngban wɛnjɛ jí,
ɖi platánitín e sí te yi jǐ aga vóéé é ɖɔhun.
15Célu ce sín wǎn gba kpé fí bǐ ɖi kanɛ́lu ɖɔhun;
fántín wǎn ɖagbenɔ abǐ nǔsáwǔ wǎn ɖagbe ɖagbe ɖěvo lɛ́ɛ ɖɔhun,
ɖi zǎlínkpɔ́n sín azɔ ɖɔhun ɖo goxɔ mímɛ́ ɔ́ sá.
16Ɖi zunmɛtín ɖaxó ɖɔhun ɔ́,
un vun ala ce ɖagbe ɖagbe lɛ́ɛ.
17Un cí vǐwuntín e ama tɔn gbló,
bɔ sɛ́ tɔn lɛ́ɛ nɔ́ dó sínsɛ́n ɖagbe gěgé sín akpá é ɖɔhun.
19Mi wá gɔ̌n ce mi mɛ e un ɖo jlǒjló wɛ lɛ́ɛ é;
mi wá sɔ́ atínsínsɛ́n ce lɛ́ɛ dó gɔ́ xo nú miɖée.
20Tamɛ lin dó wǔ ce víví hú wǐin;
è ɖǒ mì ɔ́, é víví hú wǐindɔ́ ɖokpó.
21Mɛ e ɖu mì lɛ́ɛ bǐ wɛ xovɛ́ ná lɛ́ sin.
Mɛ e nɔ nu mì lɛ́ɛ ɔ́, kɔ ná lɛ́ xú yě.
22Mɛ e nɔ se tónú nú mì é ná ɖu winnyá ǎ.
Mɛ e wa azɔ̌ xá mì é ná wa azɔ̌ nyi do ǎ.”
Sɛ́núnywɛ́ kpó sɛ́n Mawu tɔn kpán
23Sɛ́núnywɛ́ énɛ́ lɛ́ɛ bǐ ɖo akɔjijɛ Mawu Nǔbǐwúkpétɔ́ ɔ́ tɔn sín wěma mɛ.
Sɛ́n e Mɔyízi zɔ́n mǐ ɖɔ mǐ ní xwedó e wɛ.
É wɛ é sɔ́ dó así nú togun Izlayɛ́li tɔn sín agun lɛ́ɛ bǐ.
25Sɛ́núnywɛ́ gɔ́ sɛ́n ɔ́ túnflá,
ɖi lě e Picɔ́ni abǐ Tígli sín tɔ ɔ́ nɔ́ gɔ́ túnflá xwejí nukɔntɔn ɔ́ hwenu é ɖɔhun.
26É nɔ́ túnflá nú nǔtunwuntunwun, ɖi lě e Efláti abǐ Judɛ́ɛn tɔ nɔ gɔ́ túnflá gbɔn,
ɖo nǔkún-yiya hwenu é ɖɔhun.
27É nɔ́ gba nǔkplɔ́nmɛ kɔn nyi ayǐ kpɔ́ gégé,
ɖi lě e Nilu abǐ Gihɔ́nni tɔ nɔ gba kpé fí bǐ vǐwun gbigbɛ hwenu é ɖɔhun.
28Mɛ e jɛ Sɛ́núnywɛ́ kplɔ́n jí é sixú tunwun i fó gbeɖé ǎ.
Mɛ e sɔ́ gbɛninɔ tɔn bǐ dó ɖo tamɛ lin d'é wú wɛ é sixú mɔ nǔ jɛ dɔkun e ɖ'é mɛ é bǐ wú gbeɖé ǎ.
29Nǔgbó ɔ́, Sɛ́núnywɛ́ sín nǔ linlin lɛ́ɛ gbló ada hú xu;
tito tɔn lɛ́ɛ gɔ́ngɔ́n hú agbetɔ awoyó.
30Bɔ nyɛ ɔ́, un cí tɔhwín e gosín tɔzan mɛ é ɖɔhun,
ɖi tɔsisa e sa byɔ́ jikpá ɖé mɛ é ɖɔhun.
31Un ɖɔ: “Un ná hú sin nú jikpá ce;
un ná ná sin folówa ce lɛ́ɛ.”
Din ɔ́ ɖíe tɔhwín ce ká húzú tɔsisa,
bɔ tɔsisa ɔ́ húzú xu é.
32É nyí mɔ̌ ɔ́, un ná za wě nú nǔkplɔ́nmɛ ce,
bɔ é ná kɔ́n ayǐtéhɔ̌nnu ɖɔhun; un ná sɛ́ wěziza tɔn dó fí línlín.
33Un ná fúnfún nǔkplɔ́nmɛ kɔn nyi ayǐ,
ɖi gbeyíɖɔ lɛ́ɛ sín xó ɖɔhun;
un ná jó e dó nyi ayǐ nú kúnkan e ná wá wá lɛ́ɛ é.
34Mi mɔ ɖɔ é kún nyí nyɛ ɖokpónɔ wú wɛ un ɖo azɔ̌ wa wɛ ó,
lo ɔ́, mɛ e ɖo Sɛ́núnywɛ́ ba wɛ lɛ́ɛ é bǐ wú wɛ.
Currently Selected:
Silaki ví 24: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.