Hlɔ̌manu Xónusɔ́ɖóte
Xónusɔ́ɖóte
Pɔ́lu wɛ wlán wěma élɔ́ sɛ́ dó klísusɛntɔ́ e ɖo Hlɔ̌ma lɛ́ɛ, bó tín Wɛn Ɖagbe ɔ́ mɛ nú yě céɖécéɖé, lobo ɖɔ nú yě ɖɔ émí jló ná wá ba yě kpɔ́n; Hlɔ̌ma toxo ɔ́ wɛ nyí tota nú to e ɖo Hlɔ̌manu lɛ́ɛ sín acɛ mɛ lɛ́ɛ. Wěma ɔ́, akpá we wɛ è mǎ ɖó: akpá nukɔntɔn ɔ́ nyí nǔkplɔ́nmɛ lɛ́ɛ (1—11), bɔ akpá wegɔ́ ɔ́ nyí lě e è nǎ bló nǔ e nǔkplɔ́nmɛ lɛ́ɛ ɖɔ ɖ'é jí gbɔn é (12—15). Pɔ́lu ɖe xlɛ́ ɖo akpá nukɔntɔn ɔ́ mɛ ɖɔ gbɛtɔ́ lɛ́ɛ bǐ wɛ hu hwɛ; Jwifu kpó mɛ e ma nyí Jwifu ǎ kpó bǐ wɛ hu hwɛ; yě ká sixú hwlɛ́n yěɖée gán ɖó yě nɔ́ nyi sɛ́n ɔ́ wú ǎ. Mawu ná hwlɛngán ɔ́ ɖo fɛ́nú tɔn mɛ; é sɔ́ mɛ e ɖi nǔ nú Jezu lɛ́ɛ dó húzú hwɛjijɔnɔ (3.24-25). Énɛ́ ɔ́ nɔ́ zɔ́n bɔ è nɔ byɔ́ gbɛ yɔ̌yɔ́ mɛ, gbɛ yɔ̌yɔ́ e mɛ Yɛsinsɛn nɔ ná fífá kpó ɖuɖéjí kpó mɛ ɖe é mɛ. Jwifu e gbɛ́ Klísu lɛ́ɛ lɔ hɛn ɔ́, yě ná byɔ́ gbɛ yɔ̌yɔ́ énɛ́ mɛ; nú yě ɖi nǔ mɛ e ma nyí Jwifu ǎ lɛ́ɛ ɖɔhun ɔ́, yě ná byɔ́ gbɛ yɔ̌yɔ́ énɛ́ ɔ́ mɛ (9—11). Đo wěma ɔ́ sín akpá wegɔ́ ɔ́ mɛ ɔ́, Pɔ́lu kplɔ́n nǔ klísusɛntɔ́ lɛ́ɛ dó lě e yě ná nɔ́ wa nǔ gbɔn ɖo yěɖée tɛ́ntin é kpó lě e yě ná nɔ́ wa nǔ gbɔn ɖo gbɛtɔ́ bǐ tɛ́ntin é kpó wú. Xó tají e ɖo fí ɔ́ wɛ nyí ɖɔ è nǐ yí wǎn nú Mawu bó yí wǎ nú nɔzo mɛtɔn. Pɔ́lu dó gbe sɛ́ dó gbɛtɔ́ gěgé ɖo Hlɔ̌ma lobo kpa susu nú Mawu dó sú ta nú wěma ɔ́ (16).
Nǔ tají tají e ɖo wěma ɔ́ mɛ lɛ́ɛ
Pɔ́lu dó gbe sɛ́ dó Hlɔ̌manu lɛ́ɛ (1.1-17)
Mɛ bǐ wɛ hwlɛngán sín nǔ hu dó (1.18—3.20)
Nú è ɖi nǔ nú Jezu ɔ́, è nɔ mɔ hwlɛngán (3.21—4.25)
Gbɛ yɔ̌yɔ́ e mɛ e ɖo bǔ xá Klísu lɛ́ɛ nɔ́ mɔ é (5—8)
Nǔ e Mawu jló ná wa nú Izlayɛ́li togun ɔ́ é (9—11)
Lě e klísusɛntɔ́ ɖó ná zán gbɛ gbɔn é (12—15)
Tomɛ yiyi Pɔ́lu tɔn lɛ́ɛ sín tito kpó gbedómɛ tɔn lɛ́ɛ kpó (16)
Currently Selected:
Hlɔ̌manu Xónusɔ́ɖóte: FONDC
Highlight
Share
Copy
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.