Micée 2
2
Mawu ná dɔn tó nú acɛgannaganna-kpanúmɛtɔ́ lɛ́ɛ
1Heelú mɛ e nɔ mlɔ́ ayǐ zǎn mɛ bó nɔ gɔn amlɔ dɔ́,
bó nɔ ɖo nǔ nyanya e yě ná wa dó nɔzo yětɔn wú wɛ lɛ́ɛ lin wɛ lɛ́ɛ!
Yě mɛ e ayǐ hɔ́n lě tlóló ɔ́,
yě nɔ́ wa nǔ e yě lin ɔ́,
ɖó yě ɖǒ acɛ tɔn.
2Mɛ ɖé sín gle jló yě ɔ́, yě nɔ́ yí;
mɛɖé sín xwé jló yě ɔ́, yě nɔ́ yí;
yě nɔ́ fán asú mɛ lɛ́ɛ,
bó nɔ́ klá jɛ xwé yětɔn nu,
lobo nɔ yí gǔ e yě ɖu lɛ́ɛ bǐ.
3Énɛ́ ɔ́ wú wɛ Mawu Mavɔmavɔ ɖɔ:
“Un ɖo nǔ nyanya ɖé sín nǔ sɔ́ ɖ'ayǐ nú gbɛtɔ́ mi ɖɔhun lɛ́ɛ wɛ;
mi ná gló ǎ.
Mi ɖo zɔnlin zun wɛ ɔ́,
mi sɔ́ ná nɔ glá awa ǎ, ɖó wǔvɛ́ hwenu wɛ jǎwe.”
4Hwenu e nǔ énɛ́ ɔ́ ná jɛ ɔ́,
è na ji gbɛvíhan élɔ́ nú mi:
“Mǐ ɖíe wá jɛ ya mɛ bǐ din e;
è yǐ ayǐkúngban mǐtɔn lɛ́ɛ sín mǐ sí.
Mɛ e ɖo mǐ nya sín gle mǐtɔn lɛ́ɛ mɛ wɛ lɛ́ɛ
nɔ́ má gle lɛ́ɛ ɖo yěɖée tɛ́ntin.
Étɛ́wú è ka ɖo ajo ja dó mǐ wɛ?
5Énɛ́ ɔ́ wú wɛ hwenu e togun Mawu Mavɔmavɔ tɔn ná lɛ́ má ayǐkúngban lɛ́ɛ ɔ́,
mi mɛ ɖěbǔ ná mɔ ɖě yí ǎ.”
Mɛ e nɔ gbɛ́ Micée sín xó lɛ́ɛ
6Mɛ ɖé lɛ́ɛ nɔ ɖɔ nú mì ɖɔ:
“Gbɔ xógbló énɛ́ ɔ́ ɖɔ!
7Mawu Mavɔmavɔ dó nu togun tɔn wɛ a?
É nɔ yá wǔ sin xomɛ wɛ a?
É nɔ kó wa nǔ gbɔn mɔ̌ ɖ'ayǐ wɛ a?
Amɔ̌, nyɛ ɔ́, mɛ e ɖo nǔ jlɔ́jlɔ́ wa wɛ lɛ́ɛ
kɛ́ɖɛ́ wɛ un ná ɖɔ xó ɖagbe ná.”
8Mawu yí gbe bó ɖɔ:
“Mi húzú kɛntɔ́ togun ce tɔn.
Mɛ ce lɛ́ɛ yi fun ahwan bó lɛ́ kɔ wá kpó jiɖiɖe kpó ɔ́,
mi nɔ yí awu ɖaxó yětɔn dó axɔ́ e yě ɖu dó mi ɔ́ nu.
9Nyɔ̌nu e ɖo togun ce mɛ lɛ́ɛ ɔ́,
mi nɔ nya yě sín xwé yětɔn e yě yí wǎn ná lɛ́ɛ gbe,
bó nɔ ɖe wi e un ɖó ta nú vǐ yětɔn lɛ́ɛ ɔ́ síin,
bɔ é ná nɔ mɔ̌ káká sɔ́yi.
10Mi sí te bo yi,
ɖó vivo sɔ́ tíin nú mi ɖo fí ǎ.
Gbejímánɔ mitɔn lɛ́ɛ zɔ́n,
bɔ wǔvɛ́ ɖaxó ɖo te kpɔ́n mi.”
11Ényí mɛɖé wá xwetɔ́n,
bó ɖo xó ɖɔ dó jɔhɔn mɛ wɛ,
bó ɖó adingban nú mi ɖɔ vɛ̌ɛn
kpó ahan syɛ́nsyɛ́n kpó ná sa
ɖo to élɔ́ mɛ ɔ́,
xówlíɖɔtɔ́ mɔ̌hunkɔtɔn wɛ jɛ xá togun élɔ́.
Mawu ná xo Izlayɛ́li ví e kpo ɖo gbɛ lɛ́ɛ kplé
12Lo ɔ́, Mawu ɖɔ:
“Un ná kplé mi Izlayɛ́li ví e kpo ɖo gbɛ lɛ́ɛ bǐ;
un ná kplé mi ɖó kpɔ́,
lě e è nɔ kplé gbɔ̌ dó wutó mɛ é ɖɔhun;
lě e gbɔ̌hwan nɔ ɖo amagbo mɛ ɔ́ ɖɔhun.
Gbɛtɔ́ ná lɛ́ gɔ́ to mitɔn mɛ,
bɔ è na nɔ se hlǔnhlún mitɔn.
13Mɛ e nɔ hun ali nú mɛ ɔ́ wɛ ɖo nukɔn mitɔn;
mi jɛ miɖée sí.
Mi ná gba to e mɛ mi ɖe ɔ́ sín hɔntogbó bó tɔ́n;
Mawu Mavɔmavɔ axɔ́sú mitɔn ɔ́ wɛ ɖo nukɔn nú mi.”
Currently Selected:
Micée 2: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.