Judíti 15
15
1Ée Asilíi sín sɔ́ja e ɖo goxɔ yětɔn yětɔn lɛ́ɛ mɛ e se nǔ e jɛ ɔ́, yě sɔ́ sixú ɖɔ xó lɔlɔ́ ǎ. 2Xɛsi jɛ yě jí bɔ yě jɛ sísɔ́sísɔ́ jí, bɔ yě bǐ hɔn jó ahwankpá yětɔn dó. Mɛ ɖokpó ɖokpó hɔn dó ta tɔn jí, mɛ ɖě gbɔn ayǐkúngban wɛnjɛ ɔ́ jí, mɛ ɖě gbɔn sókan mɛ. 3Sɔ́ja e ɖó gɔnu ɖo sókan mɛ lɛ́ lɛ̌ dó Betúli lɛ́ɛ lɔmɔ̌ hɔn. Hwenɛ́nu ɔ́ Izlayɛ́li ví súnnu e sixú fun ahwan ɔ́ bǐ jɛ Asilíinu lɛ́ɛ gúdo. 4Oziyási sɛ́ wɛnsagun dó Bɛtomɛsitayímu, dó Bebayi, dó Coba, dó Kola kpó Izlayɛ́li to ɔ́ bǐ kpó ɖɔ è ni ɖɔ nǔ e jɛ ɔ́ bǐ nú yě. É byɔ́ mɛ bǐ ɖɔ yě ni jɛ kɛntɔ́ lɛ́ɛ gúdo bó hu yě. 5Ée Izlayɛ́li ví lɛ́ɛ se mɔ̌ ɔ́, yě bǐ jɛ kɛntɔ́ lɛ́ɛ gúdo bó nya yě káká yi Coba. Jeluzalɛ́munu lɛ́ɛ kpó mɛ e ɖo sókan mɛ lɛ́ɛ kpó ɖésú wá. Yě se nǔ e jɛ ɖo Asilíi sín ahwankpá ɔ́ mɛ ɔ́. Galadinu lɛ́ɛ kpó Galiléenu lɛ́ɛ kpó tɔ́n ahwan kɛntɔ́ ɖó aja jí bó hu yě káká yi Damási. 6Mɛ e kpo ɖo Betúli lɛ́ɛ jɛ te wá Asilíinu lɛ́ɛ sín ahwankpá mɛ. Yě bɛ́ ahwan dɔkun yětɔn kɔn nyi kpɔ́. 7Ée Izlayɛ́li ví lɛ́ɛ hu Asilíinu lɛ́ɛ bó lɛ́ kɔ wá ɔ́, yě bɛ́ dɔkun yětɔn lɛ́ɛ. Mɛ e ɖo gleta lɛ́ɛ kpó mɛ e ɖo gletoxo e ɖo sókan mɛ lɛ́ɛ ɖésú wá.
Sɛwánúmaɖɔ
8Vɔ̌sánú-xwlémawutɔ́ ɖaxó Yowakímu kpó kplékplé mɛxó Izlayɛ́li tɔn lɛ́ɛ, yě mɛ e nɔ nɔ Jeluzalɛ́mu lɛ́ɛ, yě bǐ wá Betúli. Yě jló ná wá kpɔ́n nǔ ɖagbe Aklúnɔ wa nú Izlayɛ́li é. Yě wá kpɔ́n Judíti, bó dó kú n'i. 9Yě zɔn kpɔ́ byɔ́ xwé tɔn gbe, bó dó gbe n'i ɖɔ: “Susu ɖaxó ɖokpó wɛ a nyǐ nú Jeluzalɛ́mu susu ɖaxó Izlayɛ́li tɔn ɔ́, é nyí susu ɖé nú togun mǐtɔn é.” 10Hwɛ ɖésú wɛ bló nǔ énɛ́ lɛ́ɛ bǐ! A wa ɖagbe ɖo Izlayɛ́li bɔ nǔwiwa towe nyɔ́ Mawu nukún mɛ. Aklúnɔ Nǔbǐwúkpétɔ́ ní xo ɖɛ dó jǐ towe káká sɔ́yi. Bɔ togun ɔ́ bǐ yí gbe ɖɔ: “Axoaɖi!” 11Izlayɛ́li ví lɛ́ɛ bɛ́ nǔ ɖo Asilíinu lɛ́ɛ sín ahwankpá mɛ nú azǎn gban. Yě sɔ́ Holofɛ́ni sín goxɔ ɔ́ nú Judíti, agban tɔn e sɔ́ kpatágan dó bló lɛ́ɛ, kɔ́fu tɔn lɛ́ɛ kpó azinkpo tɔn lɛ́ɛ kpó. Judíti bɛ́ nǔ lɛ́ɛ ɖě dó sɔ́tócí jí, bó bɛ́ ɖěe kpo lɛ́ɛ dó kɛkɛ́ví mɛ, bɔ sɔ́ dɔn. 12Nyɔ̌nu lɛ́ɛ bǐ nɔ wa mɔ ɛ, bó nɔ́ dó kpa gbe n'i. Yě ɖe nɔ kpɔ́ bó kpa han n'i. Judíti nɔ kɛ́n folówa bó nɔ́ ná nyɔ̌nu e xwedó e lɛ́ɛ. 13Judíti kpó nyɔ̌nu ɛnɛ lɛ́ɛ kpó sɔ́ olívutín dó bló ɖuɖéjígbákún ná. Judíti ɖo nukɔn nú togun ɔ́ bǐ, bó ɖo we ɖu wɛ, bɔ nyɔ̌nu lɛ́ɛ ɖo gúdo tɔn. Súnnu lɛ́ɛ xwedó yě kpó ahwanfunnú yětɔn lɛ́ɛ kpó. Yě lɔmɔ̌ xwe aza bó ɖo han ji wɛ kpó awǎjijɛ kpó. 14Judíti dó han dó dó kú nú Mawu, bɔ togun ɔ́ bǐ yí han ɔ́ n'i.
Currently Selected:
Judíti 15: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.