Judíti 12
12
1Holofɛ́ni kplá Judíti yi távo tɔn e é tɛ́ é jí. Kpatágan gannú wɛ kpé távo ɔ́ jí. É zɔ́n ɖɔ è nǐ ná ɛ nǔ e émí ɖésúnɔ nɔ́ ɖu é kpó ahan e émí nɔ nu é kpó. 2 Judíti ka ɖɔ n'i ɖɔ: “Un sixú ɖu nǔɖuɖu towe ǎ, un táá wá gba Mawu ce sín sɛ́n. Nǔ e un hɛn wá ɔ́ ná kpé mì.” 3Holofɛ́ni yí gbe n'i ɖɔ: “Hwenu e nǔɖuɖu énɛ́ ɔ́ ka ná vɔ ɔ́, fítɛ́ wɛ mǐ ná ba nǔɖuɖu ɖe nú we? Izlayɛ́li ví ɖěbǔ ɖo ahwankpá mǐtɔn mɛ ǎ.” 4Judíti ka yí gbe n'i ɖɔ: “Nú Sɛ́mɛɖó ce ɖo gbɛ jɛ́n wɛ ɔ́, un ná ɖu nǔ e un hɛn wá ɔ́ fó cóbɔ Aklúnɔ ná bló nǔ e bló gbé é ja gbɔn jǐ ce é ǎ.”
5Hwe nɛ́ nu ɔ́, Holofɛ́ni sín ahwangán lɛ́ɛ kplá ɛ yi goxɔ tɔn mɛ. Fínɛ́ wɛ é dɔ́ amlɔ ɖe káká yi jɛ zǎnvlɔ́ɖówe. Cóbónú hwe ná tɔ́n ɔ́ é ko fɔ́n sí te. 6Judíti ɖɔ è nǐ ɖɔ nú Holofɛ́ni ɖɔ: “Un jló ná tɔ́n bó ná yi xo ɖɛ. Nǎ gbe sɔ́ja towe lɛ́ɛ nú yě ní jó mì dó má yi din.” 7Holofɛ́ni ɖe gbe nú sɔ́ja tɔn lɛ́ɛ ɖɔ nú é jló ná tɔ́n hǔn, è ma dó tagba n'i ó.
Judíti nɔ ahwankpá ɔ́ mɛ nú azǎn atɔn. Zǎn mɛ tɛgbɛ ɔ́, é nɔ́ yi tɔdo Betúli tɔn mɛ, bó nɔ́ lɛ wǔ. 8Nú é tɔ́n sín tɔ ɔ́ mɛ ɔ́, é nɔ́ xo ɖɛ sɛ́ dó Aklúnɔ Mawu Izlayɛ́li tɔn. É nɔ́ byɔ́ ɛ ɖɔ ní xlɛ́ émí ali e émí ná gbɔn dó hwlɛ́n togun émítɔn gán ɔ́ émí. 9Nú é slá wǔ fó ɔ́, é nɔ́ lɛ́ kɔ yi goxɔ tɔn mɛ. É nɔ́ nɔ fínɛ́ káká yi jɛ hwenu e è nɔ sɔ́ nǔɖuɖu tɔn wá n'i hwelɛ́kɔ é.
Holofɛ́ni ylɔ́ agɔ̌ ɖaxó ɖokpó
10Azǎn ɛnɛgɔ́ ɔ́ gbe ɔ́, Holofɛ́ni ylɔ́ agɔ̌ ɖaxó ɖokpó bó da mɛsɛntɔ́ tɔn e sɛkpɔ́ ɛ lɛ́ɛ. É ylɔ́ ahwangán tɔn lɛ́ɛ ǎ. 11É ɖɔ nú Bagowasi agooɖojǐe é nɔ́ kpé nukún dó nǔ tɔn lɛ́ɛ wú é ɖɔ: “Yi mɔ Izlayɛ́li ví nyɔ̌nu e ɖo gɔ̌n towe ɔ́. Tɛ́nkpɔ́n bónú é ní wá ɖu nǔ bó nu ahan xá mǐ. 12Ényí mǐ jó nyɔ̌nu étɔn ɖɔhun dó bó má ɖó xó xá ɛ ǎ bɔ é yi ɔ́, winnyá wɛ é ná nyí nú mǐ, é ná ko mǐ.”
13Bagowasi tɔ́n sín Holofɛ́ni sín goxɔ ɔ́ mɛ, bó yi Judíti gɔ́n. É ɖɔ n'i ɖɔ: “Mɛsɛntɔ́ ɖagbe ɖagbe. Gǎn ce ɖo te kpɔ́n we ɖo goxɔ tɔn mɛ. Wǎ yi gɔ̌n tɔn, ma xo kpɔ́n ó, é ná sɔ́ we su. Awǎjijɛ mɛ wɛ a nǎ nu vɛ̌ɛn kpó mǐ kpó ɖe, bɔ égbé ɔ́, a nǎ cí ahwli Asilíi tɔn lɛ́ɛ ɖɔhun, yě mɛ e ɖo Nabukodonɔzɔ́ɔ sín hɔnmɛ lɛ́ɛ ɖɔhun.” 14Judíti yí gbe n'i ɖɔ: “Mɛ nǎhún wɛ un ka nyí bó ná gbɛ́ nǔ nú Sɛ́mɛɖó ce? Nǔ e é ba ɔ́ bǐ wɛ un ná bló, bɔ é ná nyí awǎjijɛ nú mì, un ná nɔ́ flín káká yi kúzán gbe ce.” 15Judíti sí te, bó dó awu tɔn ɖagbe ɖagbe lɛ́ɛ kpó nǔ e nyɔ̌nu nɔ́ dó dó ba acɔ́ lɛ́ɛ kpó. Mɛsɛntɔ́ tɔn yi Holofɛ́ni sin goxɔ mɛ, bó tɛ́ gbɔ̌nyú gbɔn nukɔn nú ahwangán ɖaxó ɔ́. Bagowasi wɛ ná gbɔ̌nyú énɛ́ lɛ́ɛ Judíti ɖɔ é ní nɔ́ dlɛ́n ɖ'é jí, bó nɔ́ ɖu nǔ. 16Judíti byɔ́ Holofɛ́ni sín goxɔ mɛ, bó dlɛ́n dó anyǔ lɛ́ɛ jí. Holofɛ́ni sín hǔn gbadó, bɔ é dán ɖě wa gbɔn. Azɔn ɖokpó ɔ́, é jló ná ɖó xó xá ɛ tlóló. Sín hwenu e é mɔ ɛ é jɛ́n é kó ɖo te kpɔ́n hwenu e é ná kplá ɛ byɔ́ xɔ tɔn mɛ, bó ba ɛ é. 17Holofɛ́ni ɖɔ n'i ɖɔ: “Nu ahan bo j'awǎ xá mǐ.” 18Judíti yí gbe n'i ɖɔ: “Ɛɛn gǎn ce, un ná nu ahan, ɖó sín hwenu e è ji mì ɔ́, mɛɖé ná mì susu sɔ lě ǎ.”
19Bɔ Judíti ɖu nǔ, bó nu ahan e mɛsɛntɔ́ tɔn bló ɖ'ayǐ n'i ɔ́ ɖo Holofɛ́ni nukɔn. 20Ɖɛkpɛ Judíti tɔn lú Holofɛ́ni, bɔ é jɛ ahan nu jí. É nu ahan sɔ mɔ̌ gbeɖé kpɔ́n ɖo gbɛ tɔn mɛ ǎ.
Currently Selected:
Judíti 12: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.