Hwɛɖɔtɔ́ Xónusɔ́ɖóte
Xónusɔ́ɖóte
Hwɛɖɔtɔ́ lɛ́ɛ sín wěma ɔ́, nǔ e jɛ hwenu e è yǐ Kanáa to ɔ́ gúdo ɔ́ sín xó wɛ è ɖɔ d'é mɛ. Akɔta lɛ́ɛ ɖokpó ɖokpó ɖo ayǐkúngban tɔn jí. Lo ɔ́, axɔ́sú ɖě kó ɖe bó ná kpa acɛ nú yě ǎ. Togun ɔ́ nɔ́ jó Mawu Mavɔmavɔ dó hwɛhwɛ, bó nɔ́ sɛn vodún. Énɛ́ ɔ́, Mawu ɖe gbe bɔ akɔta ɖěvo lɛ́ɛ wá tɔ́n ahwan Izlayɛ́li bó ɖu ɖo jǐ tɔn. Nú togun ɔ́ lɛ́ kɔ sín hwɛ tɔn lɛ́ɛ gúdo, bó sú xó ylɔ́ Mawu Mavɔmavɔ ɔ́, Mawu nɔ́ sɛ́ “hwɛɖɔtɔ́” dó bónú yě ná hwlɛ́n togun tɔn. Hwɛɖɔtɔ́ wěwe wɛ; yě wɛ nyí: Ɔtiniyɛ́li, Ehúdi, Camugáa, Debola, Jedenyɔ́ɔ, Tola, Yayíi, Jɛfutée, Ibusáni, Elɔ́ni, Avidɔni kpódó Sanmusɔ́ɔn kpó.
“Hwɛɖɔtɔ́” énɛ́ lɛ́ɛ cí hwɛɖɔtɔ́ égbé tɔn lɛ́ɛ ɖɔhun ǎ. Nukɔntɔ́ abǐ gǎn wɛ yě nyí, bó nɔ́ nɔ akɔta ɖokpó abǐ gěgé nu. Đo hwɛɖɔtɔ́ lɛ́ɛ sín wěma mɛ ɔ́, nǔ ɖokpó ɔ́ jɛ azɔn mɔ̌kpán. Togun ɔ́ nɔ́ se tónú nú Mawu ǎ bó nɔ́ sɛn vodún. Mawu nɔ́ ɖe gbe bɔ togun ɔ́ sín kɛntɔ́ lɛ́ɛ nɔ́ tɔ́n ahwan ɛ ɖó hwɛ e é hu ɔ́ wú. Togun ɔ́ nɔ́ sú xó ylɔ́ Mawu Mavɔmavɔ bɔ é nɔ́ sɛ́ mɛ e ná hwlɛ́n ɛ ɔ́ dó e. Togun ɔ́ nɔ́ tunwun nǔ e Mawu nɔ́ wa n'i lɛ́ɛ nú hwenu ɖé bó nɔ́ lɛ́ jɛ vodún sɛn jí. Énɛ́ ɔ́, nǔ ɖokpó ɔ́ nɔ́ lɛ́ bɛ́: é fun ahwan din ɔ́, é ná vo din. Ahwan zǐngídi kpó ayi ma jɛ ayǐ kpó sín hwenu ɖé wɛ. “Hwe énɛ́ ɔ́ nu ɔ́, axɔ́sú ɖě ɖo Izlayɛ́li ǎ, bɔ mɛ ɖokpó ɖokpó nɔ́ wa nǔ e jló e ɔ́.” (21.25)
Nǔ tají tají e ɖo wěma ɔ́ mɛ lɛ́ɛ
Izlayɛ́li ví lɛ́ɛ jɛ agban ɖó Kanáa (1)
Mawu sɛ́ hwɛɖɔtɔ́ lɛ́ɛ dó Izlayɛ́li (2.1—3.6)
Hwɛɖɔtɔ́ Ɔtiniyɛ́li, Ehúdi kpó Camugáa kpó (3.7-31)
Hwɛɖɔtɔ́ Debola, Balaaki kpó Yaɛ́li kpó (4—5)
Hwɛɖɔtɔ́ Jedenyɔ́ɔ (6—8)
Axɔ́sú Abimɛlɛ́ki sín tan (9)
Hwɛɖɔtɔ́ Tola, Yayíi kpó Jɛfutée kpó (10.1—12.7)
Hwɛɖɔtɔ́ Ibusáni, Elɔ́ni kpó Avidɔni kpó (12.8-15)
Hwɛɖɔtɔ́ Sanmusɔ́ɔn (13—16)
Dan sín vǐ lɛ́ɛ kpó sinsɛnxɔ yětɔn kpó (17—18)
Akɔta Izlayɛ́li tɔn ɖě lɛ́ɛ fun ahwan xá akɔta Bɛnjamɛ́ɛ tɔn (19—20)
Currently Selected:
Hwɛɖɔtɔ́ Xónusɔ́ɖóte: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.